CIPOLWG

Glanhau Traeth y Rhyl

Mae sesiwn glanhau’r traeth wedi’i drefnu ar draeth y Rhyl, o faes parcio Theatr y Pafiliwn, LL18 3AQ ar Awst 26 o 3pm tan 4pm.

Mae croeso i wirfoddolwyr ymuno â’r digwyddiad sydd wedi ei drefnu gan dîm Risg Llifogydd Cyngor Sir Ddinbych gydag offer yn cael ei ddarparu gan Gadwch Gymru’n Daclus.

Mae’r bartneriaeth yn gweithio i fynd i'r afael ag effaith sbwriel morol yn yr ardal a all greu rhwystrau mewn dyfrffyrdd a draeniau, gan atal llif y dŵr, ac arwain at fwy o berygl o lifogydd yn lleol yn bellach i fyny’r afon.

Gall cael gwared ar y sbwriel oddi ar y traeth hefyd gefnogi amddiffynfeydd naturiol fel glannau, twyni a dolydd morwellt gan eu bod yn gallu cynnal eu swyddogaeth naturiol fel amddiffynfeydd yn erbyn y môr yn well. Mae'r sesiwn casglu sbwriel, sydd wedi dod yn ddigwyddiad misol, hefyd yn helpu i wella'r amgylchedd i drigolion lleol ac ymwelwyr.

I gael mwy o wybodaeth am ymuno â’r digwyddiad, cysylltwch â claudia.smith@denbighshire.gov.uk / 07785517398 am fwy o fanylion.

Sesiynau galw heibio ar gyfer gweithredwyr sydd â diddordeb i drafod y Broses Trosglwyddo Asedau Cymunedol ar gyfer Neuadd y Dref, Dinbych

Gwahoddir partïon sydd â diddordeb i fynychu sesiynau galw heibio i ddysgu mwy am y broses Trosglwyddo Asedau Cymunedol arfaethedig ar gyfer Neuadd y Dref, Dinbych.

Bydd y sesiynau yn gyfle i grwpiau cymunedol, sefydliadau a phartïon eraill sydd â diddordeb drafod y posibilrwydd o drosglwyddo Neuadd y Dref a gofyn cwestiynau am y broses.

Cynhelir y sesiynau galw heibio yn Llyfrgell Dinbych (Sgwâr y Neuadd, Dinbych, LL16 3NU):

Ddydd Mawrth, 11 Awst 2026 – rhwng 9.00am ac 1.00pm

Dydd Mercher, 12 Awst 2026 – rhwng 1.00pm a 5.00pm

Nid oes angen i chi wneud apwyntiad. Mae croeso i bartïon sydd â diddordeb fynychu ar unrhyw adeg yn ystod y sesiynau.

Diben y sesiynau yw darparu rhagor o wybodaeth a chyfle i drafod fel rhan o'r broses Trosglwyddo Asedau Cymunedol ar gyfer Neuadd y Dref, Dinbych.

Cysylltwch gydag assetmanagement@Denbighshire.gov.uk os oes gennych chi unrhyw gwestiynau

Mae dros 1,100 o blant eisoes yn mwynhau Sialens Ddarllen yr Haf yn Llyfrgelloedd Sir Ddinbych!

Mae dros 1,100 o blant eisoes wedi cofrestru ar gyfer Sialens Ddarllen yr Haf eleni yn Llyfrgelloedd Sir Ddinbych – ac mae digon o amser o hyd i ymuno â'r hwyl!

Ydych chi'n chwilio am weithgareddau am ddim i ddiddanu'r plant dros wyliau'r haf? Yn gweld eisiau ffrindiau a chyd-ddisgyblion? Mae gan eich llyfrgell leol bopeth sydd ei angen arnoch.

Mae cofrestru ar gyfer Sialens Ddarllen yr Haf yn gwbl RHAD AC AM DDIM, ac mae'n ffordd wych o annog plant i barhau i ddarllen drwy gydol gwyliau'r haf. Cofrestrwch a dewch i'r llyfrgell dair gwaith i fenthyg a dychwelyd llyfrau er mwyn ennill medal a thystysgrif. Mae'r Sialens yn rhedeg tan ddiwedd mis Medi, felly mae digon o amser o hyd i gymryd rhan.

Yn ogystal â'r Sialens Ddarllen, mae llyfrgelloedd ledled Sir Ddinbych yn cynnal amrywiaeth o ddigwyddiadau am ddim i gadw plant yn brysur ac yn cael hwyl drwy gydol y gwyliau.

Peidiwch â cholli'r cyfle i gwrdd â'r awdur lleol, sydd wedi ennill gwobrau, Oliver Sykes, a fydd yn ymweld â llyfrgelloedd y Rhyl, Prestatyn a Llanelwy gyda'i sioe un dyn newydd sbon, Diesel and Me. Yn seiliedig ar ei blentyndod ei hun, mae'r sioe'n ddathliad doniol, bywiog a chynnes o gymuned a'r teulu rydym yn ei greu o'n cwmpas, ac mae'n addas ar gyfer plant pump oed a throsodd a'r oedolion sy'n dod gyda nhw.

Bydd plant sy'n cofrestru ar gyfer Her Ddarllen yr Haf hefyd yn cael eu cynnwys mewn tyniad gwobr i ennill £50 o docynnau sinema, drwy garedigrwydd Cyngor Llyfrau Cymru.

Thema Sialens Ddarllen yr Haf 2026 yw ‘Cyfrolau’n Canu’, a gyflwynir gan The Reading Agency mewn partneriaeth â llyfrgelloedd cyhoeddus ac gyda chefnogaeth Universal Music Group UK. Mae'r thema'n annog plant i archwilio'r cysylltiad rhwng straeon a chaneuon, gan ddarganfod sut y gall darllen a cherddoriaeth ysbrydoli dychymyg a chreadigrwydd.

I ddod o hyd i'ch llyfrgell agosaf a gweld beth sy'n digwydd yr haf hwn, ewch i'n gwefan.

Cadeirydd y Cyngor yn ymweld â Llyfrgell Rhuthun

Ymwelodd Cadeirydd Cyngor Sir Ddinbych, y Cynghorydd Bobby Feeley, â Llyfrgell Rhuthun yn ddiweddar i ddysgu mwy am yr ystod eang o wasanaethau, gweithgareddau a chymorth sydd ar gael i drigolion lleol.

Helen White, Heidi McDougall, Cyng. Bobby Feeley, Vanessa Hill

Ymunodd y Prif Weithredwr, Helen White, Pennaeth Tai a Chymunedau, Heidi McDougall, y Prif Lyfrgellydd, Debbie Owen, a Rheolwr Llyfrgell Rhuthun, Vanessa Hill, â'r Cynghorydd Feeley yn ystod yr ymweliad.

Cafodd y Cynghorydd Feeley gyfle i gwrdd â staff y llyfrgell a gweld drosti ei hun sut mae'r llyfrgell wedi datblygu i fod yn llawer mwy na lle i fenthyg llyfrau. Yn ogystal â'i chasgliad helaeth o lyfrau, mae'r llyfrgell yn cynnig mynediad am ddim at dechnoleg a chymorth digidol, clybiau swyddi, sesiynau Dechrau Da ac Amser Rhigwm i blant ifanc a theuluoedd, grwpiau crefft a darllen, yn ogystal â darparu lle croesawgar lle gall pobl gael mynediad at gyngor a chymorth gan amrywiaeth o wasanaethau.

Gyda Her Ddarllen yr Haf – Cyfrolau’n Canu yn cael ei chynnal ar hyn o bryd mewn llyfrgelloedd ledled Sir Ddinbych, roedd yr ymweliad hefyd yn tynnu sylw at y rôl bwysig sydd gan lyfrgelloedd wrth annog plant i ddatblygu cariad gydol oes at ddarllen. Mae'r Her yn cynnig amrywiaeth o weithgareddau hwyliog ac am ddim drwy gydol gwyliau'r haf, gan helpu plant i barhau i ddarllen wrth fwynhau llyfrau, cerddoriaeth a chreadigrwydd.

Un o uchafbwyntiau'r ymweliad oedd gweld gwasanaeth Cyngor ar Bopeth Sir Ddinbych sydd wedi'i leoli yn y llyfrgell, lle mae cynghorwyr cyfeillgar a gwybodus wrth law i helpu pobl gydag ystod eang o broblemau, boed yn fawr neu'n fach.

Aeth y grŵp hefyd i archwilio archif y llyfrgell yn yr islawr, sy'n gartref i gasgliad gwerthfawr o gyhoeddiadau hanesyddol sy'n adrodd hanes cyfoethog Rhuthun a'i phobl.

Daeth yr ymweliad â llawer o atgofion yn ôl i'r Cynghorydd Feeley hefyd. Cofiodd ymweld â'r adeilad am y tro cyntaf yn 1986 fel Cynghorydd newydd ar Gyngor Dosbarth Glyndŵr, pan oedd yr adeilad yn Siambr y Cyngor, cyn iddo gael ei drawsnewid yn y llyfrgell boblogaidd sydd wedi gwasanaethu'r gymuned ers dechrau'r 1990au.

Dywedodd y Cynghorydd Bobby Feeley:

"Roedd hi'n bleser mawr ymweld â Llyfrgell Rhuthun a gweld yr amrywiaeth anhygoel o wasanaethau sydd ar gael yno. Mae llyfrgelloedd heddiw yn llawer mwy na mannau i fenthyg llyfrau – maen nhw'n ganolfannau cymunedol croesawgar lle gall pobl o bob oed ddysgu, cwrdd ag eraill, cael cymorth a chymryd rhan mewn gweithgareddau.

"Roedd yn hyfryd gweld Her Ddarllen yr Haf ar waith, yn ysbrydoli plant a theuluoedd i fwynhau darllen gyda'i gilydd dros wyliau'r haf. Roedd hefyd yn arbennig iawn cael ailymweld ag adeilad sydd â chymaint o atgofion personol i mi a gweld sut mae wedi esblygu i fod yn adnodd mor bwysig i'r gymuned. Hoffwn ddiolch i'r staff am y croeso cynnes ac am bopeth maen nhw'n ei wneud i gefnogi trigolion bob dydd."

I ddod o hyd i leoliad eich llyfrgell agosaf, ewch i'n gwefan.

Digwyddiad ymgysylltu cyhoeddus OBR yn Rhuthun

Mae Adeiladwaith OBR yn cynnal digwyddiad ymgysylltu cyhoeddus i drafod y gwaith sy'n mynd rhagddo i Sgwâr San Pedr a Chae Ddôl.

Gall mynychwyr drafod datblygiad y gwaith gyda thîm y safle a gweld amserlenni'r prosiect. Bydd OBR hefyd yn rhannu eu gweithgareddau arfaethedig er budd y gymuned yn y digwyddiad.

📅 18 Awst

📍 Clwb Rygbi Rhuthun

⏰ 16:00 – 19:30

Newidiadau i brawf traffig Prestatyn

O ddydd Sadwrn 15 Awst, mae trefniant newydd yn cael ei gyflwyno.

Caiff trefniant newydd ei gyflwyno i brawf traffig Prestatyn fel rhan o ymdrechion parhaus y cyngor i wella llif y traffig a lleihau tagfeydd yng nghanol y dref.

O ddydd Sadwrn 15 Awst, bydd cerbydau yn gallu troi i'r dde o'r B5120 Ffordd Pendyffryn, Prestatyn (wrth deithio o gyfeiriad yr orsaf fysiau/Lidl) i lawr Ffordd y Bont tuag at y gylchfan fach, er mwyn cyrraedd busnesau ar waelod y Stryd Fawr a Pharc Manwerthu Parc Prestatyn.

Bwriad y drofa ychwanegol i’r dde yw lleihau nifer y cerbydau sy'n teithio drwy Barc Manwerthu Parc Prestatyn i gyrraedd busnesau ar ben isaf y Stryd Fawr. Drwy ddarparu llwybr mwy uniongyrchol i yrwyr, mae'r cyngor yn gobeithio gallu lleddfu'r pwysau ar ffyrdd lleol a gwella mynediad i drigolion, ymwelwyr a busnesau.

Awgrymodd gwaith modelu traffig blaenorol ar gyfer yr ardal na fyddai troi i'r dde yn y lleoliad yma yn bosib oherwydd lled y ffordd a chyfyngiadau cysylltiedig y briffordd. Fodd bynnag, yn dilyn gwaith manwl ac adolygiad o'r gofod sydd ar gael ar y ffyrdd, nodwyd datrysiad sy'n caniatáu i'r drofa i’r dde ddigwydd yn ddiogel.

Anogir modurwyr i gymryd gofal ychwanegol wrth deithio drwy'r ardal wrth i ddefnyddwyr y ffyrdd ymgyfarwyddo â'r trefniant newydd. Bydd arwyddion priodol mewn lle i gyfeirio gyrwyr.

Bydd y cyngor yn monitro symudiadau traffig a lefelau tagfeydd yn ystod y cyfnod prawf er mwyn asesu effeithiolrwydd y newidiadau a phenderfynu unrhyw welliannau yn y dyfodol a allai fod eu hangen.

Digwyddiadau Cymunedol

Yn chwilio am rywbeth i'w wneud dros yr haf?☀️

Beth am ddod draw i un o'r digwyddiadau cymunedol, a gynhelir o'r 4ydd hyd at yr 17eg o Awst.

Annog trigolion ac ymwelwyr i leihau'r risg o danau gwyllt yng nghefn gwlad

Mae ymwelwyr â chefn gwlad Sir Ddinbych yn cael eu hannog i ymddwyn yn gyfrifol yr haf hwn er mwyn helpu i leihau'r risg o danau gwyllt.

Mae Cyngor Sir Ddinbych a Thirwedd Cenedlaethol Bryniau Clwyd a Dyffryn Dyfrdwy yn rhannu’r cyngor hwn yn dilyn tywydd poeth a sych ac achosion diweddar o danau gwyllt ar draws Gogledd Cymru.

Mae Ceidwaid Cefn Gwlad yn barod i ymateb i adroddiadau am danau gwyllt, a gofynnir i ymwelwyr ddilyn cyngor ar atal tanau mewn gwarchodfeydd natur, parciau gwledig ac ardaloedd cyhoeddus agored eraill:

Peidiwch â chynnau tanau na barbeciw; dewch â phicnic yn lle
Diffoddwch sigaréts yn llwyr
Os gwelwch dân gwyllt neu os ydych yn arogli mwg trwm, ewch i le diogel ar unwaith.
Ffoniwch 999 a gofynnwch am y gwasanaeth tân. Byddwch yn barod i roi lleoliad manwl gywir neu nodwedd amlwg yn yr ardal.

Anogir ymwelwyr hefyd i ddefnyddio safleoedd gwersylla sefydledig sydd â chyfleusterau, er mwyn helpu i leihau'r pwysau ar y timau sy'n monitro safleoedd poblogaidd cefn gwlad.

BBQ

Dywedodd y Cynghorydd Alan James, yr Aelod Arweiniol dros Ddatblygu Lleol a Chynllunio yng Nghyngor Sir Ddinbych: "Gyda'r tywydd sych hirfaith, rydym yn arbennig o bryderus ynghylch y risgiau o danau gwyllt sy'n gysylltiedig â gwersylla mewn ardaloedd anghysbell.

"Gall tanau mewn glaswellt, rhedyn a grug ledaenu'n gyflym mewn amodau sych a gwyntog. Os gwelwch yn dda, ceisiwch osgoi tanau agored a diffodd deunyddiau ysmygu yn llwyr."

"Rydym yn annog pobl i ddefnyddio safleoedd gwersylla swyddogol a dilyn rheolau'r safle. Bydd ymddwyn yn synhwyrol yn ystod y tywydd poeth hwn yn helpu i gadw ymwelwyr yn ddiogel, cefnogi ein timau a lleihau'r pwysau ar adnoddau.

Ychwanegodd, "Mae'n arbennig o bwysig ein bod oll yn dilyn y canllawiau hyn o ystyried y pwysau presennol ar Wasanaeth Tân ac Achub Gogledd Cymru, sy'n delio â thanau gwyllt ar draws y rhanbarth ar hyn o bryd."

2026 Dyddiadau ar gyfer gwiriad pwysau carafanau am ddim a chyngor ar ddiogelwch

Mae Safonau Masnach Sir Ddinbych a Chonwy yn cynnig sesiynau pwyso a chyngor am ddim ar gyfer carafanau a faniau gwersylla.

Gall preswylwyr sy’n mynd ar wyliau mewn carafán neu fan wersylla wneud yn siŵr nad ydynt yn gorlwytho eu carafán a rhoi eu hunain mewn perygl.

Mae’r sesiynau pwyso a chyngor am ddim ar gyfer carafanau ar gael i drigolion Sir Ddinbych a Chonwy, ac i’r rheini mewn ardaloedd awdurdodau lleol eraill os gallant deithio i’r lleoliad.

Sesiwn gyngor yw hwn, ac ni chymerir unrhyw gamau os canfyddir gorlwytho neu faterion eraill, ond byddwn yn gweithio gyda chi i leihau'r llwyth. Bydd swyddogion y cyngor yng nghwmni swyddog o adran Diogelwch Cymunedol Heddlu Gogledd Cymru a fydd yn rhoi cyngor diogelwch ymarferol i gadw'ch car a'ch carafan yn ddiogel.

Bydd y gwiriadau pwysau rhad ac am ddim yn cael eu cynnal ar y bont bwyso ar yr A525 rhwng Rhuddlan a Llanelwy ar y dyddiadau a’r amseroedd canlynol:

Dydd Gwener 17/07 – 10am-3pm
Dydd Gwener 28/08 – 10am-3pm

Nid oes angen apwyntiad ar gyfer y sesiynau yma ac mae croeso i breswylwyr fynychu unrhyw un o’r sesiynau a restrir a darganfod a ydynt o fewn y pwysau cyfreithlon ar gyfer eu cerbydau.

Gellir dod o hyd i'r bont bwyso ar ffordd yr A525 rhwng Rhuddlan a Llanelwy, tua thri chwarter milltir o Ruddlan, a leolir yn y gilfan, bydd arwyddion yn nodi bod y bont bwyso ar waith.

Os oes gennych unrhyw gwestiynau am yr uchod, cysylltwch ag adran Safonau Masnach Sir Ddinbych ar tradingstandards@denbighshire.gov.uk ewch i'w tudalen Facebook, yn yr un modd cysylltwch â Safonau Masnach Conwy ar trading.standards@conwy.gov.uk