Y Cyngor yn llongyfarch disgyblion ar ganlyniadau TGAU

Mae Cyngor Sir Dinbych yn llongyfarch disgyblion Sir Ddinbych sy'n derbyn eu canlyniadau TGAU heddiw (Dydd Iau, 20fed Awst).

Dywedodd y Cynghorydd Diane King, Aelod Arweiniol y Cabinet dros Addysg, Plant a Theuluoedd:

“Ar ran y Cyngor, hoffwn ddymuno llongyfarchiadau mawr i'r rhai sy'n derbyn eu canlyniadau TGAU heddiw.

Bydd eu canlyniadau heddiw yn helpu i lunio a phenderfynu ar eu camau nesaf o ran addysg.

Hoffwn hefyd estyn fy niolch i'r staff rhagorol yn ein holl ysgolion y mae eu hymroddiad a'u hymrwymiad i addysgu meddyliau ifanc yn gwneud diwrnodau fel hyn yn bosibl.

Llongyfarchiadau i bob disgybl ar eu cyflawniadau heddiw, dymunaf y gorau iddynt yn eu camau nesaf.”

Cynigion Heol y Felin wedi’u dylunio i gefnogi economi ymwelwyr Llangollen

Mae cynlluniau wedi’u cyflwyno ar gyfer cyfleuster cartrefi modur arhosiad byr newydd ym Maes Parcio Heol y Felin yn Llangollen fel rhan o brosiect ehangach i gefnogi twristiaeth, gwella isadeiledd ymwelwyr a rhoi budd i fusnesau lleol.

Mae’r cynnig yn cynnwys chwe bae dros nos ar gyfer cartrefi modur ac isadeiledd cysylltiedig, gan annog ymwelwyr i aros am gyfnod hirach yn y dref a gwario mewn siopau, caffis, bwytai ac atyniadau lleol.

Mae’r cais cynllunio yn dilyn gwaith gwella a wnaed eisoes ym Maes Parcio Heol y Felin, sydd wedi helpu i sicrhau bod y safle’n fwy diogel, mwy deniadol a mwy croesawgar i breswylwyr, ymwelwyr a busnesau.

Mae’r gwelliannau’n cynnwys disodli pafinau bloc sydd ar goll ac sydd wedi torri, trwsio ffensys rhwng rhan uchaf y maes parcio a’r A539, ailbeintio llinellau baeau parcio, gosod seddi newydd, rheiliau a dodrefn stryd newydd, uwchraddio’r goleuadau a gosod mannau newydd i groesi’r llwybr troed.

Bwriedir i’r gwelliannau hyn, a ariennir gan grant, ategu’r ddarpariaeth arfaethedig ar gyfer Lleoedd Parcio Dros Nos i Gartrefi Modur, yn amodol ar ganiatâd cynllunio, trwy greu porth ymwelwyr o ansawdd uwch ger canol tref Llangollen.

Ni fydd y prosiect yn golygu colli 29 o ofodau parcio yn ystod y dydd ar y safle. Bydd yr ardal yn dal i fod ar gael fel ardal aml-ddefnydd yn ystod y dydd a bydd modd i geir barcio rhwng y baeau cartrefi modur. Gyda’r nos, mae angen mwy o le rhwng cartrefi modur er mwyn bodloni gofynion diogelwch tân. Dyna pam mae’r trefniadau dros nos yn wahanol i’r defnydd parcio yn ystod y dydd.

Meddai’r Cynghorydd Barry Mellor, Aelod Arweiniol yr Amgylchedd a Chludiant: “Mae’r cynnig hwn yn cefnogi economi ymwelwyr Llangollen mewn modd cyfrifol a reolir. Trwy ddarparu cyfleusterau dynodedig arhosiad byr dros nos ar gyfer defnyddwyr cartrefi modur, gallwn annog ymwelwyr i dreulio mwy o amser yn y dref a chefnogi busnesau lleol, wrth helpu i leihau effaith achosion o aros dros nos heb awdurdod. Mae hefyd yn bwysig ein bod yn glir na fyddai’r cynllun yn cael gwared ar 29 o ofodau parcio yn ystod y dydd. Byddai’r maes parcio yn dal i fod ar gael i’w ddefnyddio yn ystod y dydd a byddai’r gosodiad dros nos yn adlewyrchu’r lle ychwanegol sydd ei angen er mwyn bodloni gofynion diogelwch cartrefi modur.

Mae’r cynnig ym maes parcio Heol y Felin yn ffurfio rhan o brosiect cyffredinol Lleoedd Parcio Dros Nos i Gartrefi Modur Sir Ddinbych. Ei nod yw mynd i’r afael ag achosion pan fo perchnogion cartrefi modur yn aros dros nos heb awdurdod mewn lleoliadau ar draws y sir lle nad oes hawl gyfreithiol i gysgu dros nos mewn cerbyd.

Mae’r cynllun wedi’i greu i helpu i atal problemau amgylcheddol a chymdeithasol a achosir gan wersylla anghyfreithlon, a darparu gwell cyfleusterau ar gyfer y rheiny sydd am aros dros nos am gyfnod byr mewn cartrefi modur a faniau gwersylla.

Ar draws Sir Ddinbych, bydd y prosiect yn cyflwyno cynigion ar gyfer ardaloedd dynodedig i gartrefi modur a faniau gwersylla aros dros nos mewn pum lleoliad, gan ganolbwyntio ar leoedd sydd eisoes yn boblogaidd gydag ymwelwyr ac sy’n agos at fusnesau lleol a allai elwa o fwy o ymwelwyr.

Bydd ceisiadau cynllunio’n cael eu cyflwyno ar gyfer pob safle i alluogi gosod yr isadeiledd perthnasol. Ariennir y gwaith arfaethedig gan gyllid y Pethau Pwysig, Llywodraeth Cymru sy’n cefnogi gwelliannau i isadeiledd hanfodol i ymwelwyr, a Chronfa Effaith Balchder Bro Llywodraeth y DU.

Mae’r safleoedd, gan gynnwys Heol y Felin, wedi’u dewis oherwydd eu bod yn fannau problemus ar gyfer achosion o aros dros nos heb awdurdod, maen nhw’n boblogaidd gyda thwristiaid ac mae busnesau gerllaw a allai elwa o ymwelwyr yn defnyddio cyfleusterau dynodedig.

Byddai’r cyfleusterau yn darparu mannau parcio arhosiad byr dros nos i gartrefi modur am uchafswm o ddwy noson mewn meysydd parcio cyhoeddus neu ardaloedd sy’n eiddo i’r Cyngor sy’n agos at drefi ac amwynderau presennol.

Ym mhob safle, bydd y canolbwynt ar ddarparu mannau parcio dros nos diogel, wedi’u cefnogi gan gyfleusterau sylfaenol i wagio dŵr gwastraff a dŵr budr ac ail-lenwi cartrefi modur gyda dŵr ffres. Bydd y lleoedd parcio yn rhai llawr caled i aros am gyfnodau byr yn unig. Ni chaniateir barbeciwiau, tanau, adlenni na phebyll.

Bwriedir galluogi defnyddwyr cartrefi modur sy’n aros ar safleoedd Cyngor Sir Ddinbych i dalu am aros yno trwy dariff newydd ar yr ap parcio ceir presennol ar eu ffôn symudol neu beiriannau talu ar y safle.

Os caiff caniatâd cynllunio ei roi, bydd gwaith ar Heol y Felin yn cynnwys mesurau i atal parcio heb awdurdod a chefnogi gwell rheolaeth ar aros dros nos.

Gwaith uwchraddio toeau yn mynd rhagddo mewn dwy ysgol yn y Rhyl

Mae gwaith uwchraddio i doeau dwy ysgol gynradd yn y Rhyl yn mynd rhagddo yn rhan o raglen barhaus o foderneiddio adeiladau.

Mae'r ddau brosiect yn rhan o raglen waith cynnal a chadw hirdymor fesul cam i wella'r toeau. Mae'r prosiect yn Ysgol Emmanuel yn ei bedwerydd cam, a’r prosiect yn Ysgol Christchurch yn y chweched cam a'r cam olaf.

Yn ysgol Christchurch, mae'r gwaith yn canolbwyntio ar do gwastad yr ysgol ac yn cynnwys gosod to ffelt newydd a gwydn ynghyd â gwella inswleiddio thermol yn sylweddol.

Gwaith ar y to gwastad Ysgol Christchurch

Bydd y gwaith uwchraddio hefyd yn cynnwys gosod 47 o ffenestri to newydd yn lle'r hen rai, a fydd yn cyd-fynd â'r ffenestri mwy newydd sydd eisoes wedi'u gosod yn yr ysgol. Bydd y ffenestri to hefyd yn cael eu disodli a'u moderneiddio ar yr un pryd.

Gwaith ar y ffenestri, Ysgol Christchruch

Ar hyn o bryd mae gwaith yn cael ei wneud ar ran o do ar oledd yn Ysgol Emmanuel, sydd uwchben dwy ystafell ddosbarth tuag at flaen yr adeilad.

To ar oledd Ysgol Emmanuel

Mae'r hen deils clai wedi cael eu tynnu, ac mae’r gwaith o osod y deunydd inswleiddio 120mm yn mynd rhagddo ar hyn o bryd.

Deunydd inswleiddio newydd ar to Ysgol Emmanuel

Pan fydd hyn wedi’i gwblhau, bydd y to ar oleddf wedi'i wneud o fetel, gan ddisodli'r hen deils, a bydd yn cyd-fynd â'r toeau eraill a gwblhawyd yn ddiweddar ar yr adeilad.

Mae'r gwaith uwchraddio hwn i'r ddau safle yn cyflwyno manteision effeithlonrwydd ynni a manteision strwythurol, gan foderneiddio agweddau allweddol a lleihau rhwymedigaethau cynnal a chadw yn y dyfodol a sicrhau bod y ddwy ysgol yn parhau i fod yn gynaliadwy ar gyfer cenedlaethau'r dyfodol.

Mae’r ddau brosiect yn cael eu harwain a’u rheoli gan Dîm Cynnal a Chadw Adeiladau’r Cyngor.

Disgwylir i'r gwaith ar y ddau safle ddod i ben yn yr hydref.

Mae'r gwaith hwn yn cael ei ariannu drwy Raglen Cynnal a Chadw Cyfalaf Ysgolion.

Dywedodd y Cynghorydd Diane King, Aelod Arweiniol Addysg, Plant a Theuluoedd:

“Mae'r gwaith hwn yn rhan o'n rhaglen barhaus i wella safleoedd ein hysgolion, gan wella eu heffeithlonrwydd a diogelu cyfanrwydd toeau'r ysgolion ar gyfer y dyfodol ar yr un pryd.

Bydd y gwaith hwn yn dod i ben yn y ddwy ysgol yn yr hydref.”

Cyflwyno prydau ysgol iachach cyn y daw rheoliadau newydd Llywodraeth Cymru i rym

Mae’r gwaith yn parhau i hybu bwyta’n iach mewn ysgolion er budd iechyd a lles y disgyblion. 

Bu Gwasanaeth Arlwyo Cyngor Sir Ddinbych yn newid bwydlenni ysgol yn raddol yn ystod y deunaw mis diwethaf. Gwnaed hynny gan fod Llywodraeth Cymru wedi diwygio’r Rheoliadau Bwyta’n Iach mewn Ysgolion (2025) a bod y newidiadau’n dod i rym ar Hydref 31 eleni.

Yn unol â’r Canllaw Bwyta’n Iach, bydd y gofynion statudol newydd yn effeithio ar y bwyd a ddarperir gydol y diwrnod ysgol.

I gynorthwyo disgyblion a staff arlwyo i bontio’n esmwyth i’r drefn newydd, mae’r Gwasanaeth Arlwyo wedi addasu’r bwydlenni’n raddol i fodloni gofynion y rheoliadau newydd.

Mae ein bwydlen faethlon fesul tair wythnos eisoes yn bodloni’r safonau newydd, gan gynnwys:

•  Gwell Dewisiadau o Bwdin: Darperir iogwrt Llaeth y Llan a phwdinau â ffrwythau deirgwaith yr wythnos bellach, a phwdinau pob â ffrwythau ddwywaith yr wythnos.
•  Mwy o Lysiau: Mae’r staff arlwyo wedi ehangu’r dewis o lysiau bob dydd i sicrhau y gall pob disgybl gael o leiaf dau lysieuyn bob dydd.
•  Maint Platiau:  Dechreuir gweini prydau o wahanol faint i Fabanod a Phlant Iau ym mis Hydref. Cyflwynir hyn yn raddol gyda’r nod o gydymffurfio’n llwyr yn syth ar ôl hanner tymor mis Hydref.
•  Dietau Arbennig: I fodloni anghenion dietegol myfyrwyr yn ddiogel, mae’n rhaid i rieni bellach ddarparu tystiolaeth feddygol ffurfiol i’r gwasanaeth arlwyo fel y gall staff ddarparu prydau addas.

Ddechrau’r tymor ym mis Medi, bydd bwydlenni ysgol yn symud yn nes at gydymffurfio’n llwyr â’r ddeddfwriaeth drwy ddarparu bara gwenith cyflawn hanner a hanner yn unig. Ni fyddwn ond yn rhoi caws, tiwna mayonnaise ac wy mayonnaise mewn brechdanau ac ni fyddwn yn darparu ham mwyach, gan fod y rheoliadau newydd yn cyfyngu ar gig wedi’i brosesu.

Meddai’r Cynghorydd Diane King, Aelod Arweiniol Addysg, Plant a Theuluoedd:  “Wrth wella bwydlenni ysgol yn raddol i gydymffurfio â’r rheoliadau newydd, rydym wedi helpu disgyblion i ddod yn gyfarwydd â dewisiadau iachach mewn ffordd gadarnhaol a phwyllog. Mae hynny hefyd wedi sicrhau bod ein hysgolion yn gwbl barod am y rheoliadau newydd.

“Hoffwn hefyd ddiolch i’n staff arlwyo ymroddgar am eu gofal, proffesiynoldeb a’u hymrwymiad cyson i addasu bwydlenni, cefnogi ein disgyblion a rhoi’r newidiadau hyn ar waith yn ein holl ysgolion. Mae’r newidiadau’n gam pwysig ymlaen wrth hybu iechyd a lles ein plant a phobl ifanc.”

Cau Ffyrdd Fesul Cam ar gyfer Cam 3 Taith Prydain yn Sir Ddinbych

Cynghorir defnyddwyr ffyrdd i gynllunio ymlaen llaw ar ddydd Gwener, 21 Awst 2026, gan y bydd cau ffyrdd fesul cam dros dro ar waith ar draws rhannau o’r sir i hwyluso Cam 3 o ras feicio Taith Prydain Lloyds.

Mae Cyngor Sir Ddinbych wedi gwneud Gorchymyn Rheoleiddio Traffig Dros Dro er mwyn cynnal y ras yn ddiogel drwy'r sir rhwng 10am a 12pm.

Bydd y gorchymyn yn cyflwyno cau ffyrdd fesul cam, clirffyrdd, ac atal cyfyngiadau cyflymder dros dro ar rannau o'r llwybr tra bod y ras yn mynd heibio.

Yn ystod y digwyddiad:

• Bydd ffyrdd ar hyd y llwybr ar gau dros dro wrth i'r ras agosáu ac yn ailagor cyn gynted ag y bydd yn ddiogel gwneud hynny.
• Bydd cyfyngiadau clirffyrdd mewn grym, sy'n golygu na ddylai cerbydau stopio na pharcio ar rannau o'r ffordd yr effeithir arnynt.
• Tra bydd ffyrdd ar gau, bydd y Terfyn Cyflymder Cenedlaethol yn berthnasol i gerbydau awdurdodedig sy'n ymwneud â’r ras. Bydd mynediad i gerddwyr drwy gydol y digwyddiad.

Ffyrdd yr effeithir arnynt

Bydd y ffyrdd canlynol yn cau fesul cam a bydd cyfyngiadau cysylltiedig rhwng 10am a 12pm ar 21 Awst:

• A541, Troeon Rose Garden Bodfari hyd at ffin y sir
• A541, o B5429 Llandyrnog hyd at droeon Rose Garden Bodfari
• A541, Cornel Blue Hand Bodfari at gyffordd B5429 Llandyrnog
• Ffordd Bodfari, Trefnant
• B5428, o groesffyrdd Pen Cae Du at oleuadau traffig Trefnant
• B5428, cyffordd Lon Jack Ffrwn at groesffyrdd Pen Cae Du, Trefnant
• B5428, o gyffordd Ffordd Bryn y Garn at gyffordd Lon Jack Ffrwn, Henllan
• Lôn Garn, Henllan
• Stryd Tŷ Coch, Henllan
• Stryd Llindir, Henllan
• B5382 Ffordd Henllan at ffin y Sir, Henllan

Yn ogystal â’r darn hwnnw o’ A525 goleuadau traffig Trefnant at Fferm Tŷ Newydd, Trefnant sy’n ymestyn i gyfeiriad y gogledd o’i chyffordd â’r A541 at ei chyffordd â’r B5429.

Anogir defnyddwyr ffyrdd i ganiatáu amser ychwanegol ar gyfer eu teithiau ac ystyried llwybrau amgen lle bo modd yn ystod cyfnod y digwyddiad.

Taith Prydain yw prif ras feicio broffesiynol y DU ac mae'n denu beicwyr elitaidd o bob cwr o'r byd. Mae Sir Ddinbych yn falch o groesawu'r digwyddiad ac arddangos cymunedau a thirweddau'r sir i gynulleidfa genedlaethol.

 Llun: Pexels

Croesawu Dinasyddion Prydeinig Newydd i Sir Ddinbych mewn Seremoni Ddinasyddiaeth

Daeth trigolion o wyth gwlad gwahanol yn ddinasyddion swyddogol Prydeinig mewn seremoni ddinasyddiaeth a gynhaliwyd yng Nghyngor Sir Ddinbych ar 28 Gorffennaf. Yn ystod o seremoni, croesawyd dinasyddion newydd oedd yn wreiddiol o'r Philipinau, Unol Daleithiau America, Bangladesh, Colombia, Uganda, Nepal, India a Sri Lanka, gan nodi'r cam olaf yn eu taith i ddod yn ddinasyddion Prydeinig.

Trefnwyd y digwyddiad arbennig gan Wasanaethau Cofrestru Sir Ddinbych, ac yn bresennol roedd Cadeirydd y cyngor, y Cynghorydd Bobby Feeley; y Cynghorydd Joan Butterfield sydd hefyd yn Faer y Rhyl; Is-Arglwydd Raglaw Clwyd, Rob Jones; ac Uchel Siryf Clwyd, David Jones.

Yn ystod y seremoni, gwnaeth y dinasyddion newydd naill ai lw neu gadarnhad o deyrngarwch i'w Fawrhydi Brenin Siarl III a gaddo eu teyrngarwch i'r Deyrnas Unedig, ei gwerthoedd democrataidd, ei hawliau a'i rhyddid.

Croesawyd y dinasyddion newydd gan y Cofrestrydd Arolygol Sharon Evans, oedd yn gweithredu ar ran Swyddfa Gartref y DU a Gwasanaeth Fisâu a Mewnfudo'r DU. Wrth siarad yn ystod y seremoni, atgoffwyd y mynychwyr fod dinasyddiaeth Brydeinig nid yn unig yn dod â hawliau a chyfleoedd, ond hefyd gyfrifoldebau, gan gynnwys parchu eraill, cynnal gwerthoedd democrataidd a chyfrannu'n gadarnhaol at gymdeithas.

Roedd y seremoni hefyd yn cydnabod pwysigrwydd y doniau, y cefndiroedd a'r profiadau amrywiol y mae dinasyddion newydd yn eu dwyn i Sir Ddinbych a'r DU.

Dywedodd Cadeirydd Cyngor Sir Ddinbych, y Cynghorydd Bobby Feeley: "Roedd yn bleser croesawu ein dinasyddion Prydeinig mwyaf newydd i Sir Ddinbych. Mae seremonïau dinasyddiaeth bob amser yn achlysuron arbennig, gan ddathlu nid yn unig gyflawniad unigol ond hefyd yr amrywiaeth gyfoethog sy'n cryfhau ein cymunedau.

"Rydym wrth ein bodd bod y trigolion hyn wedi dewis gwneud Sir Ddinbych yn gartref iddynt ac yn estyn croeso cynnes iddynt fel aelodau o'n cymunedau."

Yn dilyn y seremoni, cyflwynwyd tystysgrifau dinasyddiaeth a rhodd bach o groeso gan y cyngor i bob dinesydd newydd cyn tynnu llun grŵp.

Daeth y seremoni i ben gyda llongyfarchiadau i bawb a dderbyniodd ddinasyddiaeth a chroeso cynnes i'r gymuned leol.

Dirwyo tipiwr anghyfreithlon a ollyngodd sbwriel wrth ymyl bin yn Rhuallt

Mae rhywun a ollyngodd wastraff o’r cartref yn anghyfreithlon wrth ymyl bin ar Ffordd Treffynnon yn Rhuallt wedi cael dirwy o £250 yn sgil ymchwiliad gan Dîm Troseddau Amgylcheddol Cyngor Sir Ddinbych.

Wedi derbyn adroddiad o dipio anghyfreithlon, aeth swyddogion yno a chanfod nifer o sachau o wastraff domestig wedi’u gollwng wrth ymyl bin y Cyngor.

Chwiliodd y swyddogion drwy’r gwastraff a dod o hyd i dystiolaeth o bwy oedd yn gyfrifol.

Wedi ymchwilio ymhellach, daethpwyd o hyd i’r troseddwr a chafodd Rhybudd Cosb Benodedig o £250.

Mae’r achos hwn yn dangos nad yw’n dderbyniol i bobl ollwng gwastraff wrth ymyl biniau sbwriel. Darperir biniau i bobl rhoi darnau bach o sbwriel ynddynt, ac nid gwastraff masnachol neu ddomestig.

Meddai’r Cynghorydd Barry Mellor, Aelod Arweiniol yr Amgylchedd a Chludiant: “Mae ein neges yn glir: nid ydym yn goddef tipio anghyfreithlon a gwaredu gwastraff yn anghyfrifol yn Sir Ddinbych. Byddwn yn dal i gymryd camau cadarn yn erbyn y rhai sy’n cyfrannu at droseddau amgylcheddol ac yn gweithio i gadw ein Sir yn lân ac yn ddiogel i bawb.”

Timau’r Cyngor yn dod at ei gilydd ar gyfer Sioe Dinbych a Fflint

Mae timau Cyngor Sir Ddinbych wrthi’n gwneud y paratoadau terfynol i ddod ag ystod o feysydd gwasanaeth i Sioe Dinbych a Fflint eleni, a fydd yn cael ei chynnal yn Y Green, Dinbych, ddydd Iau 20 Awst 2026.

Bydd cyfle i’r rhai sy’n ymweld â stondin y Cyngor gyfarfod staff o sawl tîm a dysgu mwy am y gwaith sy’n cael ei wneud ar draws y sir i gefnogi cymunedau, diogelu’r amgylchedd lleol a helpu Sir Ddinbych i ymateb i heriau newid hinsawdd.

Bydd Gwasanaethau Fflyd yn arddangos detholiad o gerbydau trydan, yn cynnwys cerbydau fflyd y Cyngor a cherbydau trydan wedi’u darparu gan werthwyr, i amlygu sut mae’r dechnoleg hon yn helpu i ddarparu cludiant glanach a lleihau allyriadau. Bydd staff ar gael i sgwrsio gydag ymwelwyr a dangos y rôl y gall cerbydau trydan ei chwarae wrth leihau allyriadau, gwella ansawdd yr aer a chefnogi cludiant cyhoeddus a phreifat sy’n fwy cynaliadwy.

Bydd tîm Hinsawdd y Cyngor hefyd wrth law i drafod eu rhaglen waith yn gysylltiedig â mynd i’r afael â newid hinsawdd a chefnogi uchelgeisiau ehangach y Cyngor i leihau allyriadau carbon a diogelu bioamrywiaeth. Bydd cyfle i ymwelwyr ddysgu mwy am y camau ymarferol sy’n cael eu cymryd ar draws gwasanaethau’r Cyngor, a sut y gall unigolion, busnesau a chymunedau gymryd rhan hefyd.

Bydd aelodau o’r tîm Risg Llifogydd ar gael i egluro’r gwaith pwysig y maent yn ei wneud i reoli a lleihau risg llifogydd ar draws Sir Ddinbych, yn cynnwys sut maent yn gweithio gyda chymunedau a sefydliadau partner i wella dealltwriaeth, parodrwydd a gwytnwch.

Bydd yr Ymgynghorwyr Ailgylchu o Wasanaeth Gwastraff ac Ailgylchu Cyngor Sir Ddinbych hefyd yn y sioe, i siarad gydag ymwelwyr am ailgylchu, lleihau gwastraff a sut y gallwn gefnogi aelwydydd i ailgylchu’n fwy effeithiol. Bydd y tîm yn darparu gwybodaeth ddefnyddiol, cyngor a gweithgareddau hwyliog i helpu trigolion i ddeall beth y gellir ei ailgylchu, sut i ailgylchu’n gywir a sut y gall newidiadau bach yn y cartref wneud gwahaniaeth mawr.

Dywedodd y Cynghorydd Barry Mellor, Aelod Arweiniol yr Amgylchedd a Chludiant yng Nghyngor Sir Ddinbych: “Mae Sioe Dinbych a Fflint yn gyfle gwych i’n preswylwyr ac ymwelwyr siarad yn uniongyrchol gyda’n timau a darganfod mwy am y gwaith sy’n cael ei wneud ar draws Sir Ddinbych. O gerbydau trydan a gweithredu ar newid hinsawdd i risg llifogydd ac ailgylchu, bydd ein staff yno i ateb cwestiynau, rhannu cyngor ac egluro sut mae’r gwasanaethau hyn yn cefnogi cymunedau ar draws y sir.”

Mae’r Cyngor yn annog unrhyw un a fydd yn mynychu’r sioe i alw heibio’r stondin, cwrdd â’r timau a dysgu mwy am y gwasanaethau sy’n helpu i greu Sir Ddinbych sy’n fwy gwyrdd, diogel a chynaliadwy.

Gwaith adnewyddu sylweddol ar floc Ysgol Uwchradd Prestatyn bron a gorffen

Mae gwaith adnewyddu ar floc llawn yn ysgol fwyaf Sir Ddinbych bron a gorffen.

Bloc 2 Ysgol Uwchradd Prestatyn

Dechreuodd y gwaith ar Floc 2 yn Ysgol Uwchradd Prestatyn ym mis Mehefin a chafodd y bloc cyfan ei ail-fodelu’n llwyr.

Mae’r gwaith bron a gorffen o ran ailweirio, ail-sgimio ac ailosod tri dosbarth TG, dau ddosbarth economeg y cartref, dwy swyddfa, ystafell staff, a phum dosbarth arall.

Gwaith moderneiddio dosbarth TG

Bydd y gwaith, a wneir gan Bryn Build Ltd, yn golygu moderneiddio 12 ystafell.

Mae’r prosiectau’n cael eu harwain a’u rheoli gan Dîm Cynnal a Chadw Adeiladau y Cyngor.

Yn ogystal â moderneiddio’r ystafelloedd, mae’r offer a’r dechnoleg yn cael eu huwchraddio.

Gwaith moderneiddio dosbarth economeg y cartref

Mae’r gwaith adnewyddu wedi ei ddylunio ar y cyd ag athrawon yn yr ysgol, i sicrhau bod y dyluniad yn cyd-fynd â gweithrediadau o ddydd i ddydd y dosbarthiadau.

Mae’r cynllun newydd hefyd wedi ei ddylunio o amgylch dau lifft a osodwyd yn flaenorol, gan eu hintegreiddio yn well i’r adeilad a llif y dosbarthiadau.

Yn ogystal â’r gwaith adnewyddu’r bloc, mae’r dosbarth drama, sydd uwch ben neuadd yr ysgol, hefyd yn cael ei ailfodelu, gyda bloc lifft newydd sbon, wedi ei adeiladu a’i ychwanegu i sicrhau mynediad hygyrch i’r dosbarth a adnewyddwyd.

Bydd y prosiectau hyn yn cael eu trosglwyddo ym mis Medi, cyn i’r tymor ddechrau.

Mae’r prosiectau’n cael eu hariannu trwy Raglen Cynnal a Chadw Cyfalaf Ysgolion ynghyd â chefnogaeth gan Foderneiddio Addysg, gyda dros £600,000 yn cael ei fuddsoddi yn yr ysgol trwy’r prosiectau hyn.

Gwaith moderneiddio

Meddai’r Cynghorydd Diane King, Aelod Arweiniol Addysg, Plant a Theuluoedd:

“Mae’r prosiect enfawr hwn wedi ei glustnodi ac yna ei weithredu i foderneiddio bloc arall yn Ysgol Uwchradd Prestatyn.

Mae’r gwaith wedi bod yn helaeth, gydag ailweirio ac ail-ddylunio cyfan yn digwydd, gan olygu edrychiad newydd ffres a chyfleusterau o ansawdd uwch i floc prysur iawn yn yr ysgol.

Edrychaf ymlaen at weld y bloc yn agor ar gyfer y flwyddyn ysgol newydd, ac i’r disgyblion a’r staff gael ei ddefnyddio.”

Etifeddiaeth coeden dderwen hanesyddol wedi'i diogelu am flynyddoedd i ddod

Mae gwaith i ddiogelu etifeddiaeth coeden dderwen hanesyddol yn Rhuthun wedi'i gwblhau'n ddiweddar.

Credir bod yr hen goeden dderwen wedi bod yn sefyll yng Nghae Ddôl ers dros 500 mlynedd, ac yr oedd yn cael ei hedmygu'n fawr gan ymwelwyr â'r parc am genedlaethau cyn iddi ddod i lawr yn ystod Storm Darragh yn 2024.

Fodd bynnag, ar ôl cwblhau prosiect diweddar a oedd yn ceisio diogelu etifeddiaeth y goeden, gall trigolion ac ymwelwyr edmygu'r goeden dderwen unwaith eto yn ei ffurf newydd yn y parc.

Ar ôl iddi syrthio yn ystod Storm Darragh, comisiynodd tîm coed y Cyngor y gweithiwr coed lleol, Stephen Faherty, i gerflunio'r boncyff i greu sedd lle gall pobl sy'n mynd heibio edmygu ei faint a'i statws, tra cafodd ei ganghennau mawr eu cerflunio’n i greu meinciau unigryw i greu man eistedd newydd.

Dywedodd Stephen Faherty:

“Roedd yn bleser cael fy ngwahodd gan Gyngor Sir Ddinbych i weithio ar y prosiect hwn. Rwyf wedi byw yn yr ardal ac felly rwy’n deall pa mor bwysig yw'r goeden i gymuned Rhuthun.

“O ran y prosiect hwn, yr oedd hi'n bwysig creu rhywbeth a fyddai'n dod â'r gymuned at ei gilydd a thalu teyrnged i'r goeden hanesyddol a safai yno unwaith.

“Cafwyd yr ysbrydoliaeth ar gyfer y prosiect o'r ffordd yr oedd y goeden dderwen wedi cwympo yn dilyn y storm, wrth i’r meinciau o amgylch y boncyff bwysleisio maint y goeden.”

Dywedodd y Cynghorydd Barry Mellor, Aelod Arweiniol yr Amgylchedd a Chludiant:

“Rydym ni’n deall pa mor arwyddocaol oedd yr hen goeden dderwen i Gae Ddôl, ac yr ydym ni’n falch o'r ffordd y mae'r prosiect wedi diogelu ei hetifeddiaeth ar gyfer cenedlaethau'r dyfodol. Rydym ni’n gobeithio trwy ddefnyddio pren yr hen goeden dderwen i greu ardal ar yr un safle, y bydd yn caniatáu i ymwelwyr gadw cysylltiad â’r hen goeden.

“Hoffwn ddiolch i dîm coed y Cyngor ac i Stephen am eu gwaith caled wrth gwblhau'r prosiect hwn, ac rwy'n gobeithio y gall cymuned Rhuthun yn awr ddechrau creu atgofion newydd yn y man cymunedol newydd hwn.”

Tipiwr anghyfreithlon yn cael Rhybudd Cosb Benodedig o £250 yn dilyn ymchwiliad yn y Rhyl

Mae Cyngor Sir Ddinbych wedi cyflwyno Rhybudd Cosb Benodedig o £250 i breswylydd ar ôl canfod eu bod yn gyfrifol am dipio gwastraff y cartref yn anghyfreithlon ar Elwy Street yn ochr gorllewinol y Rhyl.

Cafodd yr achos o dipio anghyfreithlon, oedd yn cynnwys sawl bag du o wastraff domestig, ei adrodd i Dîm Troseddau Amgylcheddol a Newid Ymddygiad y Cyngor. 

Gan weithio’n agos gyda phreswylwyr lleol ac adolygu fideo teledu cylch caeëdig o’r ardal, bu modd i Swyddogion gasglu tystiolaeth a arweiniodd at adnabod yr unigolyn oedd yn gyfrifol.  Yn dilyn ymchwiliad, cyflwynwyd Rhybudd Cosb Benodedig o £250.

Yn hytrach na’u herlyn drwy’r llysoedd, cyflwynodd y Cyngor Rybudd Cosb Benodedig fel dull arall o ddelio â’r drosedd.

Mae tipio anghyfreithlon yn drosedd sydd yn difetha cymunedau lleol, yn niweidio’r amgylchedd ac yn rhoi byrdwn ariannol diangen ar drethdalwyr drwy’r gost o glirio gwastraff sydd wedi’i adael yn anghyfreithlon.  Mae Cyngor Sir Ddinbych wedi ymrwymo i gymryd camau gweithredu cadarn yn erbyn y rhai sy’n dewis gwaredu gwastraff yn anghyfreithlon.

Meddai Jonathan Brittain-Hughes, Rheolwr Troseddau Amgylcheddol Cyngor Sir Ddinbych:

Mae tipio anghyfreithlon yn gwbl annerbyniol ac rydym wedi ymrwymo i weithredu yn erbyn y rhai sy’n difetha ein cymunedau drwy waredu eu gwastraff yn anghyfreithlon.

"Mae’r achos yma’n dangos pwysigrwydd gweithio mewn partneriaeth gyda’n cymunedau. Gyda’r wybodaeth a ddarparwyd gan breswylwyr lleol, ynghyd â thystiolaeth teledu cylch caeëdig ac ymchwiliad trylwyr gan ein Swyddogion, bu modd i ni adnabod y troseddwr a chymryd gweithred gorfodi priodol.

“Rydym eisiau diolch i’r preswylwyr a gyflwynodd wybodaeth. Mae eu cefnogaeth yn chwarae rôl hollbwysig yn ein helpu i fynd i’r afael â throseddau amgylcheddol. Byddem yn annog unrhyw un sy’n dyst i dipio anghyfreithlon neu droseddau amgylcheddol eraill i roi gwybod i ni amdanynt, gan fod pob darn o dystiolaeth yn gallu ein helpu i adnabod y rhai sy’n gyfrifol.

Ychwanegodd y Cynghorydd Barry Mellor, Aelod Arweiniol yr Amgylchedd a Chludiant: “Mae ein neges yn glir – wnawn ni ddim goddef tipio anghyfreithlon yn Sir Ddinbych. Os ydych chi’n dewis gadael gwastraff yn anghyfreithlon, fe allech chi gael Rhybudd Cosb Benodedig neu gael eich erlyn."

Fe atgoffir preswylwyr y dylai gwastraff y cartref gael ei waredu drwy wasanaethau casglu awdurdodedig, Canolfannau Ailgylchu Gwastraff y Cartref neu drwy ddefnyddio cludwr gwastraff cofrestredig.  Os ydych chi’n talu rhywun i waredu eich gwastraff, gwiriwch eu bod wedi cofrestru i wneud hynny.

Os oes gennych chi wybodaeth am dipio anghyfreithlon neu unrhyw droseddau amgylcheddol eraill, adroddwch amdano drwy wefan Cyngor Sir Ddinbych neu cysylltwch â’n tîm Gwasanaethau Cwsmeriaid y Cyngor ar 01824 706000. Drwy adrodd am droseddau amgylcheddol, gallwch helpu i amddiffyn ein cymunedau a chadw Sir Ddinbych yn lân, yn ddiogel ac yn groesawgar ar gyfer pawb.

Y Cyngor yn llongyfarch disgyblion ar ganlyniadau Lefel A

Mae Cyngor Sir Ddinbych yn llongyfarch disgyblion ledled y sir sy'n derbyn eu canlyniadau Lefel A / Uwch Gyfrannol heddiw (Dydd Iau, 13eg Awst).

Dywedodd y Cynghorydd Diane King, Aelod Arweiniol y Cabinet dros Addysg, Plant a Theuluoedd:

“Ar ran y Cyngor, hoffwn longyfarch disgyblion Sir Ddinbych sy'n derbyn eu canlyniadau Lefel A ac UG heddiw. Mae'r canlyniadau hyn yn gamp enfawr sy'n helpu i lunio y camau nesaf yn eu bywydau.

Mae'n cymryd llawer o waith caled ac ymroddiad i gyrraedd yma, felly hoffwn eu llongyfarch i gyd ar y gamp hon.

Hoffwn hefyd dynnu sylw at y gwaith partneriaeth pwysig sy'n digwydd yn ein hysgolion bob dydd sy'n sicrhau bod gan ein myfyrwyr addysg o'r ansawdd uchaf ac yn cyflawni'r canlyniadau gorau posibl.

Rwy'n dymuno'r gorau i bob dysgwr yn eu camau nesaf, mae'r drws ar agor iddynt.”

Diwrnod Tedis yn Dychwelyd i Dŷ a Gerddi Hanesyddol Nantclwyd y Dre

Yn dilyn llwyddiant ysgubol ei Ddiwrnod Tedis cyntaf erioed yn gynharach yr haf hwn, mae Nantclwyd y Dre yn falch iawn o gynnal y digwyddiad unwaith eto ddydd Iau 20 Awst, gan roi cyfle arall i deuluoedd fwynhau antur hanesyddol ar thema tedis cyn i’r tymor ysgol newydd ddechrau.

Bydd y Diwrnod Tedis yn cael ei gynnal rhwng 10:30am a 4:30pm (mynediad olaf am 3:30pm) yng ngerddi hardd y tŷ hanesyddol. Mae wedi'i gynnwys yn y pris mynediad arferol, ac mae mynediad am ddim i blant dan bump oed.

Gwahoddir ymwelwyr i ddod â'u tedis mwyaf anturus gyda nhw i archwilio'r gerddi hyfryd a chymryd rhan mewn amrywiaeth o weithgareddau llawn hwyl, yn cynnwys crefftau ar thema tedis, gemau lawnt traddodiadol a'r wifren sip tedis poblogaidd, a fu'n llwyddiant ysgubol yn y digwyddiad cyntaf.

Dywedodd Kate Thomson, Rheolwr Safle Nantclwyd y Dre:

“Roeddem ni wrth ein bodd gyda’r ymateb i’n Diwrnod Tedis cyntaf, ac yn falch o weld cymaint o ymwelwyr yn mwynhau’r gweithgareddau yr oeddem ni wedi’u paratoi ar eu cyfer nhw a’u tedis. Dywedodd nifer fawr o deuluoedd eu bod nhw wedi mwynhau’r diwrnod yn arw ac y bydden wrth eu bodd yn ei weld yn dychwelyd, felly roeddem ni’n gwybod bod rhaid i ni ei gynnal eto!”

Caiff teuluoedd eu hannog i ddod â'u hoff dedis ac i fwynhau diwedd gwyliau'r haf mewn ffordd gofiadwy yn amgylchedd unigryw Nantclwyd y Dre. Ni fydd angen archebu lle ymlaen llaw.

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth:

“Mae ein tîm Treftadaeth wedi bod yn gweithio’n galed i drefnu amrywiaeth eang o ddigwyddiadau dros wyliau’r haf i’r teulu eu mwynhau. Roedd y Diwrnod Tedis cyntaf yn Nantclwyd y Dre yn llwyddiant ysgubol, ac mae'r tîm yn edrych ymlaen yn fawr at groesawu hyd yn oed mwy o deuluoedd i'r digwyddiad nesaf.”

I gael rhagor o wybodaeth, cysylltwch â Gwasanaeth Treftadaeth Sir Ddinbych yn treftadaeth@sirddinbych.gov.uk 

Pobl ifanc yn trawsnewid GORSAF VIBE gyda gwaith celf newydd

Mae pobl ifanc yn y Rhyl wedi helpu i drawsnewid GORSAF VIBE gyda gwaith celf newydd a lliwgar, gan rannu eu syniadau am lesiant a’r hyn y mae’r gofod yn ei olygu iddynt cyn gweithio ochr yn ochr â’r artist DIME i wireddu eu gweledigaeth.

Cafodd y prosiect, a gyflwynwyd drwy wasanaeth llesiant Sir Ddinbych yn Gweithio, Barod, ei gynllunio i roi cyfle i bobl ifanc chwarae rhan weithredol yn y gwaith o lunio amgylchedd GORSAF VIBE. Cawsant eu gwahodd i ystyried beth mae llesiant yn ei olygu iddynt a rhannu eu meddyliau a’u syniadau, a helpodd i lunio themâu’r gwaith celf.

Gall celf gynnig ffordd amgen i bobl fynegi teimladau, cyfathrebu ac archwilio syniadau, yn enwedig pan all fod yn anodd rhoi meddyliau mewn geiriau. Drwy ddefnyddio creadigrwydd fel rhan o’r prosiect, roedd y bobl ifanc yn gallu cyfrannu mewn ffordd wahanol, gan ddatblygu mwy o ymdeimlad o berchnogaeth dros y gofod ar yr un pryd.

Mae’r gwaith celf gorffenedig, a grëwyd drwy greadigrwydd, cynllunio a gwaith tîm, yn dathlu GORSAF VIBE a’r bobl a’r gymuned y mae’n eu cefnogi.

Cyn

Ar ôl

Dywedodd Jen Dutton, Arweinydd Llesiant a Gwydnwch (Barod):

“Mae’r gwaith celf yn adlewyrchiad o’r hyn y mae GORSAF VIBE yn ei gynrychioli. Wedi’i greu drwy greadigrwydd, cynllunio a gwaith tîm, mae’r neges ‘Dewch o hyd i'ch llwybr’ yn cyfleu ein hymrwymiad i helpu trigolion Sir Ddinbych i ddarganfod eu cryfderau, magu hyder a dod o hyd i’r llwybr sy’n iawn iddynt.

“Rydym yn hynod falch o’r hyn y mae’r bobl ifanc wedi’i gyflawni ac o’r egni a’r lliw y maent wedi’u hychwanegu at GORSAF VIBE.”

Dywedodd yr artist DIME, a fu’n gweithio gyda’r bobl ifanc yn ystod y prosiect:

“Cefais ddiwrnod gwych yn gweithio gyda’r tîm a’r bobl ifanc yng NGORSAF VIBE. Roedd yn wych eu gweld yn greadigol ac yn cymryd rhan.”

Mae’r prosiect yn amlygu sut y gall gweithgareddau creadigol gefnogi llesiant, gan roi cyfle i bobl ifanc gyfrannu at y mannau o’u cwmpas a gweld eu syniadau’n troi’n rhywbeth pendant.

I gael rhagor o wybodaeth am y rhaglen, neu i drefnu atgyfeiriad, cysylltwch â thîm Working Denbighshire ar 01745 331438 neu drwy e-bostio sirddinbychyngweithio@sirddinbych.gov.uk.

Mae manylion sesiynau sydd ar ddod a gwybodaeth am archebu lle hefyd ar gael drwy Eventbrite.

Ariennir Sir Ddinbych yn Gweithio yn rhannol gan Lywodraeth y DU a thrwy nifer o raglenni, gan gynnwys Cymunedau am Waith a Mwy Llywodraeth Cymru, Menter ‘Trailblazer’ y DU a Chymru, y Gronfa Ffyniant Gyffredin (SPF), a Cysylltu â Gwaith.

Cyngor yn cefnogi prosiect i drawsnewid stryd gefn gymunedol yn y Rhyl

Mae Tîm Troseddau Amgylcheddol a Newid Ymddygiad Cyngor Sir Ddinbych wedi bod yn cydweithio â grwpiau cymunedol lleol a sefydliadau partner i helpu i draws newid stryd gefn yn y Rhyl.

Mae hyn yn rhan o fenter barhaus i fynd i’r afael â thipio anghyfreithlon a gwella’r amgylchedd lleol.

Trwy’r prosiect cydweithio yma, daeth timau Troseddau Amgylcheddol a Gwasanaethau Stryd y Cyngor, Dyfodol Disglair a Chadwch Gymru'n Daclus ynghyd i glirio gwastraff oedd wedi’i dipio’n anghyfreithlon a dechrau adnewyddu’r stryd gefn oedd wedi’i hesgeuluso.

Er bod cael gwared ar wastraff sydd wedi’i adael yn anghyfreithlon yn gam cyntaf pwysig, nod y prosiect yw creu mannau cymunedol mwy glân, mwy gwyrdd a mwy croesawgar y gall y preswylwyr ymfalchïo ynddynt.

Trwy weithio mewn partneriaeth gyda phobl leol, mae’r fenter yn annog newid ymddygiad cadarnhaol tra’n gwella ymddangosiad a bioamrywiaeth yr ardal.

Yn rhan o’r fenter, mae preswylwyr sydd yn byw yn yr ardaloedd cyfagos wedi cael cyngor a gwybodaeth am eu cyfrifoldebau i waredu gwastraff yn gywir ac effeithiau tipio anghyfreithlon.

Trwy gyfuno addysg, ymgysylltu a gwelliannau amgylcheddol, mae’r Cyngor yn gobeithio y gall preswylwyr gymryd mwy o falchder yn eu cymdogaeth a helpu i’w gadw’n lân.

Fe hoffai Cyngor Sir Ddinbych hefyd atgoffa preswylwyr bod tipio anghyfreithlon yn drosedd. Bydd ymchwiliad yn cael ei gynnal i unrhyw un sy’n cael ei adnabod sy’n gyfrifol am waredu gwastraff yn anghyfreithlon, ac os oes digon o dystiolaeth, fe gymerir camau gorfodi priodol. Fe allai hyn gynnwys cyflwyno Rhybuddion Cosb Benodedig neu erledigaeth pan fo hynny’n briodol.

Dros yr wythnosau nesaf, fe fydd y stryd gefn yn parhau i gael ei thrawsnewid gyda photiau plannu lliwgar, planhigion newydd a nodweddion bywyd gwyllt. Fe fydd camerâu hefyd yn cael eu gosod i fonitro bywyd gwyllt lleol yn dilyn adroddiadau fod draenogod yn ymweld â’r ardal yn aml. Fe fydd plant a phobl ifanc leol yn cael cyfle i helpu i greu cynefinoedd i fywyd gwyllt, gan gryfhau perchenogaeth gymunedol o’r ardal.

Meddai’r Cynghorydd Barry Mellor, Aelod Arweiniol yr Amgylchedd a Chludiant:

“Mae prosiectau fel hyn yn dangos y gwahaniaeth gwirioneddol y mae gweithio mewn partneriaeth yn gallu ei gael. Trwy ddod â phreswylwyr lleol, grwpiau cymunedol, Cadwch Gymru'n Daclus a gwasanaethau’r Cyngor ynghyd, nid yn unig ydym ni’n cael gwared ar dipio anghyfreithlon, ond rydym yn creu ardaloedd y gall pobl eu mwynhau a theimlo’n falch ohonynt. Mae annog preswylwyr i gymryd perchenogaeth o’u hamgylchedd lleol yn rhan bwysig o atal troseddau amgylcheddol a chreu cymunedau cryfach, glanach.

“Byddwn yn parhau i gefnogi cymunedau drwy addysg ac ymgysylltu, ond pan fydd unigolion yn dewis tipio’n anghyfreithlon, ni fyddwn yn oedi cyn cymryd camau gweithredu priodol.”

Diwrnod Chwarae Blynyddol y Rhyl yn gweld 3800 yn bresennol

Cynhaliwyd 11eg digwyddiad blynyddol Diwrnod Chwarae Cenedlaethol ar 5 Awst yng Nghaeau Chwarae Christchurch yn y Rhyl, gyda 3,800 o bobl yn bresennol.

Wedi'i drefnu gan wasanaeth Ceidwaid Chwarae Cyngor Sir Dinbych i helpu plant i fwynhau eu gwyliau haf, roedd y digwyddiad am ddim ac yn cynnwys llu o weithgareddau gan gynnwys sgiliau syrcas, cestyll neidio, gwneud blychau adar, celf a chrefft, gemau enfawr a mwy.

Yn dilyn digwyddiad hynod lwyddiannus y llynedd, canolbwyntiodd thema eleni ar bwysigrwydd creu cyfleoedd i blant chwarae lle bynnag y maent.

Dywedodd Dawn Anderson, Rheolwr Gofal Plant a Datblygu Chwarae Sir Dinbych:

“Roeddem wrth ein bodd yn gwahodd teuluoedd lleol i'n 11eg digwyddiad Diwrnod Chwarae blynyddol.

Cawsom nifer wych o bobl yno unwaith eto eleni, a hoffwn ddiolch i bawb a gymerodd ran am helpu i wneud y digwyddiad poblogaidd hwn yn gymaint o lwyddiant.

Bob blwyddyn, mae'r digwyddiad hwn yn mynd o nerth i nerth, ac mae bellach yn ffefryn cadarn yn ystod gwyliau'r haf i deuluoedd lleol.”

Dywedodd y Cynghorydd Diane King, Aelod Arweiniol dros Addysg, Plant a Theuluoedd:

“Unwaith eto, rydym wedi cael presenoldeb gwych yn y digwyddiad poblogaidd iawn hwn, a wnaed yn bosibl diolch i’n Gwasanaeth Ceidwaid Chwarae a’r teuluoedd sy’n mynychu bob blwyddyn.

Roedd yn wych bod yn bresennol a gweld teuluoedd lleol yn mwynhau eu gwyliau haf gyda’i gilydd.

Hoffwn ddiolch i bawb sydd wedi helpu i wneud y digwyddiad hwn yn llwyddiant eto eleni.”

Bws Mini Trydan Newydd yn Pweru Bws Fflecsi Prestatyn

Fe fydd cynllun cludiant cyhoeddus sy’n ymateb i alw ym Mhrestatyn yn cael ei yrru gan gerbyd hygyrch a gwyrddach.   

Mae Tîm Cludiant Teithwyr Sir Ddinbych a Thrafnidiaeth Cymru wedi cydweithio i ddarparu cerbyd trydan ar gyfer cynllun Fflecsi Prestatyn ar ôl i gontract y darparwr presennol ddod i ben. 

Mae Fflecsi Prestatyn yn cynnig gwasanaeth i breswylwyr sy’n ymateb i alw i’w cefnogi i wneud teithiau byr mewn i ganol y dref o ardaloedd preswyl ac yn ôl eto. 

Mae Gwasanaeth Fflyd Cyngor Sir Ddinbych eisoes yn gweithredu dau fws mini trydan sy’n cefnogi cynlluniau Fflecsi tebyg yn Rhuthun a Dinbych.

Bu i’r Cyngor ddatgan argyfwng hinsawdd ac argyfwng ecolegol yn 2019 ac ers hynny mae wedi symud i ddefnyddio cerbydau di-allyriadau yn ei fflyd. Ar hyn o bryd, mae dros 20% o’r cerbydau yn ei fflyd yn gerbydau di-allyriadau.

Wrth i’r cerbydau sy’n defnyddio tanwydd ffosil gyrraedd diwedd eu hoes, mae Gwasanaeth Fflyd Cyngor Sir Ddinbych wedi bod yn cyflwyno rhai trydan, gyda chefnogaeth sylweddol gan adrannau Llywodraethau Cymru a’r DU, er mwyn helpu i gwtogi ar yr allyriadau a gynhyrchir a lleihau costau hirdymor o ran milltiroedd a chynnal a chadw ar draws yr holl wasanaethau y mae ein fflyd yn eu cyflenwi ac i leihau’r ddibyniaeth ar gerbydau gydag injan disel neu betrol.

I gefnogi Fflecsi Prestatyn yn y dyfodol, fe fydd bws mini Ford E Transit, a all deithio hyd at 250 milltir, yn cael ei ddefnyddio ar gyfer y cynllun. Fe fydd wyth o seddi yn y bws mini, ac fe fydd yn gwbl hygyrch ac fe fydd yna fynediad i gadeiriau olwyn hefyd.

Fe fydd y cerbyd newydd yn gweithredu Gwasanaeth Fflecsi Prestatyn, sydd bellach yn cael ei alw’n 44 ers 6 Gorffennaf. Fe fydd y gwasanaeth yn dal i fod yn weithredol yr un amser, rhwng 9.30am a 2.30pm.

Os bydd unrhyw un yn holi ynghylch archebu gwasanaeth Fflecsi Prestatyn, gallant ddefnyddio’r rhif ffôn 0300 234 0300 neu archebu drwy ap Trafnidiaeth Cymru sydd i’w weld yma: https://trc.cymru/fflecsi/lleoliadau/prestatyn

Meddai’r Cynghorydd Barry Mellor, Aelod Arweiniol yr Amgylchedd a Chludiant:  “Mae ein gwasanaeth fflyd yn gweithio’n galed  lle y bo’n briodol i ddisodli cerbydau sy’n cael eu gyrru gan danwydd ffosil gyda rhai mwy gwyrdd er mwyn helpu i ostwng allyriadau carbon yn y Sir, ac i gefnogi costau rhedeg a chynnal a chadw hirdymor is. 

“Rydym yn falch o gael y cyfle i ddarparu’r cerbyd ein hunain ar gyfer Fflecsi Prestatyn, fel yr ydym ar gyfer Rhuthun a Dinbych, ac i helpu i gefnogi dull o deithio sydd yn fwy modern a gwyrdd i breswylwyr lleol ei ddefnyddio a’i fwynhau.”

Pobl yn dod ynghyd yn Rhuthun i drafod argyfwng yr hinsawdd a natur

Dydd Iau, 30 Gorffennaf, cynhaliodd Cyngor Sir Ddinbych ddau ddangosiad o’r ffilm ‘The People's Emergency Briefing’, ac yna bu trafodaethau am beth mae’r argyfwng hinsawdd a natur yn ei olygu i gymunedau lleol.

Roedd y dangosiadau’n rhan o raglen ehangach o ddigwyddiadau ledled y DU i helpu cymunedau i ymgysylltu â'r argyfwng hinsawdd a natur. Mae’r naturiaethwr Chris Packham wedi cefnogi’r fenter ac mae wedi dweud, “Byddwn yn annog pobl ym mhobman i fynychu dangosiad o 'The People's Emergency Briefing'. Mae'r ffilm newydd hon yn arwain at y mathau o sgyrsiau gonest sydd ei hangen arnom ar frys nawr, yn ymwneud â'r bygythiad o ddadfeiliad yr hinsawdd a natur, ond hefyd ynglŷn â'r hyn y gallwn ei wneud, gyda'n gwleidyddion, i adeiladu dyfodol gwell.”  

Cynhaliwyd y dangosiad cyntaf yn Neuadd y Sir yn Rhuthun ar gyfer cynghorwyr sir ac uwch swyddogion gyda gwahoddiadau wedi eu gyrru hefyd i Aelodau’r Senedd yng Nghaerdydd a San Steffan sy’n cynrychioli etholaethau Sir Ddinbych.  Mynychodd Becky Gittins, AS Dwyrain Clwyd, y digwyddiad gan gymryd rhan yn y drafodaeth oedd yn canolbwyntio'n benodol ar rolau'r ddwy lefel o lywodraeth; y Cynllun Datblygu Lleol; a’r gefnogaeth sydd ei angen ar fusnesau ac ysgolion lleol.

Cynhaliwyd ail ddangosiad cyhoeddus yn yr Ystafell Ymgynnull yn Neuadd y Dref Rhuthun a wnaeth ddenu dros 50 o bobl. Ymysg y materion dan drafodaeth oedd deunyddiau i ysgolion, gwydnwch amaethyddol a bwyd, bioamrywiaeth, cyfleoedd i fusnesau, a sut gall cymunedau barhau â'r sgwrs ac ymgysylltu â chynrychiolwyr etholedig.

Dywedodd y Cynghorydd Barry Mellor, Aelod Arweiniol yr Amgylchedd a Thrafnidiaeth a’r Cefnogwr Bioamrywiaeth: “Roedden ni'n teimlo ei bod yn bwysig bod cynrychiolwyr lleol yn cael y cyfle i glywed y drafodaeth sy'n digwydd yn yr ystafell.  Un o'r teimladau cryfaf yn yr ystafell oedd rhyddhad — bod materion roedd llawer o bobl wedi bod yn poeni'n dawel amdanynt ers amser maith o'r diwedd yn cael eu trafod yn agored, yn glir ac ar y cyd.  Yr hyn oedd yn sefyll allan oedd pa mor gyflym y symudodd y drafodaeth o bryder i gwestiynau ymarferol ynglŷn â beth y gallai'r bobl yma ei wneud gyda'i gilydd nesaf”

Ychwanegodd Jane Hodgson, Rheolwr Newid Hinsawdd Cyngor Sir Dinbych: “Roedden ni’n falch iawn o ba mor barod oedd pobl i aros, siarad, a gwrando ar ei gilydd wedyn. Dangosodd y trafodaethau fod llawer o bobl yn gwerthfawrogi cael lle i archwilio’r materion hyn. Yr hyn a safodd allan oedd yr egni sy’n dod pan fydd pobl yn gallu wynebu gwybodaeth anodd a gweithio gyda’i gilydd, yn hytrach na theimlo eu bod nhw’n cario’r baich ar eu pennau eu hunain.”

Dymuna’r cyngor ddiolch i'r cynulleidfaoedd a gymerodd ran yn y trafodaethau a'r hwyluswyr gwirfoddol o Hinsawdd Cymru, Cyfeillion y Ddaear a'r Gynghrair Seicoleg Hinsawdd a roddodd o'u hamser yn hael.

Gallwch weld ble mae ‘r ffilm yn cael ei dangos ar y ddolen ganlynol - https://www.nebriefing.org/screening-map

Codi sbwriel yn yr haf yn creu naws Nadoligaidd wrth ddod o hyd i rywbeth hynod ar y traeth

Cafodd criw o gasglwyr sbwriel yr haf hwn flas ar ysbryd y Nadolig wedi dod o hyd i ddarn syfrdanol o sbwriel.

Bu Tîm Perygl Llifogydd Cyngor Sir Ddinbych a Chwmni Buddiant cymunedol Tyfu Prestatyn wrthi’n codi sbwriel ar Draeth Barkby ym Mhrestatyn yn ddiweddar. Darparwyd cyfarpar gan Cadw Cymru’n Daclus a’r Gymdeithas Gadwraeth Forol.

Llwyddodd criw o 14, gan gynnwys gwirfoddolwyr, i gasglu 11 o sachau o sbwriel o’r traeth, a oedd yn pwyso 18.5 cilogram yn ei grynswth.

Ymysg y pethau anarferol y daeth y grŵp ar eu traws oedd goleuadau Nadolig oedd yn dal yn gweithio, a sosban.

Meddai Claudia Smith, Swyddog Erydu Arfordirol a Pherygl Llifogydd: “Diolch i bawb a ymunodd â ni i godi sbwriel y tro hwn. Rydym oll yn gweithio gyda’n gilydd i fynd i’r afael ag effaith sbwriel o’r môr yn yr ardal, yn enwedig yn ystod yr haf, gan y gall rwystro dyfrffyrdd a draeniau, atal llif y dŵr a chreu mwy o berygl o lifogydd yn lleol yn bellach i fyny’r afon.

Gall tynnu sbwriel o’r traeth hefyd gefnogi amddiffynfeydd naturiol fel glannau, twyni a dolydd morwellt gan eu bod yn gallu cynnal eu swyddogaeth naturiol fel amddiffynfeydd rhag y môr yn well. Mae digwyddiadau codi sbwriel fel hyn hefyd yn gwella’r amgylchedd i bobl leol ac ymwelwyr.”

Meddai’r Cynghorydd Barry Mellor, yr Aelod Cabinet Arweiniol ar gyfer Priffyrdd a’r Amgylchedd:  “Dyma enghraifft fendigedig o’r Cyngor yn gweithio mewn partneriaeth â grwpiau eraill a’r gwirfoddolwyr gwych yn lleol. At ei gilydd, mae hyn yn cyfrannu’n helaeth at reoli perygl llifogydd yn lleol oherwydd sbwriel o’r môr, gwarchod yr amgylchedd a gwneud lleoedd fel Traeth Barkby yn gymaint brafiach i bobl ddod yma a mwynhau.”

Ymateb Cyngor Sir Ddinbych i'r dyfarniadau yn yr achos camfanteisio rhywiol ar blant

Mae Cyngor Sir Ddinbych yn meddwl am, ac yn cydymdeimlo gyda’r merched ifanc sydd wrth wraidd yr achos camfanteisio rhywiol ar blant yn y Rhyl, ac hoffem gydnabod y dewrder a’r gwroldeb a ddangoswyd ganddynt wrth siarad allan i sicrhau cyfiawnder mewn amgylchiadau hynod o anodd.

Nawr bod y rhai sy'n gyfrifol am y cam-drin a ddioddefodd y bobl ifanc yma wedi cael eu dwyn o flaen eu gwell, bydd Bwrdd Diogelu Gogledd Cymru yn bwrw ymlaen â’r Adolygiad Diogelu Unedig Sengl (ADUS), a gynhelir yn unol â chanllawiau cenedlaethol. Nid yw’r ADUS yn rhan o’r broses droseddol – ei nod yw archwilio sut mae’r asiantaethau wedi ymdrin â’r bobl ifanc a nodi pa wersi y gellir eu dysgu ar gyfer y dyfodol. Bydd Cyngor Sir Ddinbych yn gweithio’n agos gyda’r Bwrdd fel rhan o’r broses hon.

Mae dyfarniad heddiw yn dod â phennod hynod anodd ac emosiynol i ben i’r gymuned leol yn y Rhyl. Rydym yn deall bod yr achos hwn wedi bod yn heriol ac wedi codi teimladau cryf. Gofynnwn i bawb barchu’r broses gyfreithiol wrth i ni ymdopi â’r canlyniad hwn.

Gofal plant a ariennir gan Lywodraeth Cymru ar gael i bob plentyn dwy oed yn Sir Ddinbych o fis Medi

Mae gofal plant a ariennir ar gyfer plant dwy oed i fod ar gael ledled Sir Ddinbych gyfan o fis Medi.

Bydd plant yn derbyn deuddeg awr a hanner o ofal plant a ariennir yn ystod tymor yr ysgol mewn lleoliad cofrestredig.

Gellir defnyddio'r ddarpariaeth gofal plant hon o'r tymor ysgol ar ôl ail ben-blwydd plentyn, tan y tymor ysgol ar ôl eu trydydd pen-blwydd.

Mae'r ffenestr ymgeisio ar agor ar hyn o bryd ac mae'n cau ar 10 Awst.

Ar ôl eu cyflwyno, bydd ceisiadau'n cael eu hasesu ar ôl y dyddiad cau, gyda rhieni'n cael gwybod am y canlyniadau o 11 Medi.

Gellir gwneud ceisiadau ar y dudalen ar y ddolen ganlynol: https://www.denbighshire.gov.uk/cy/gofal-plant-a-rhianta/teuluoedd-yn-gyntaf-a-dechraun-deg/gofal-plant-dechraun-deg.aspx

Ar hyn o bryd mae'r cynllun yn cynnwys rhan fwyaf o'r sir, gyda Chorwen, Dinbych, Dyserth, Henllan, Llangollen, Gallt Melyd, Prestatyn, Rhuddlan a'r Rhyl yn y dalgylch presennol. Bydd y cyflwyniad diweddaraf hwn yn sicrhau bod pobman yn y sir  wedi'i chynnwys yn y cynllun hwn. Mae'r ehangu'n bosibl yn dilyn cyllid ychwanegol a gyhoeddwyd yng nghyllideb atodol Llywodraeth Cymru.

Dywedodd llefarydd ar ran tîm Dechrau'n Deg a Theuluoedd yn Gyntaf:

“Rydym yn falch iawn o gyhoeddi y bydd y rhaglen gofal plant hon ar gael ledled Sir Ddinbych o fis Medi ymlaen.

Gan ddarparu adnodd amhrisiadwy i deuluoedd ledled y sir, bydd ein holl blant dwy oed yn cael cynnig deuddeg awr a hanner o ofal plant wedi'i ariannu yn ystod tymor yr ysgol mewn lleoliad cofrestredig, gyda mwy o leoliadau bellach yn cael eu cynnig o ganlyniad i'r cyflwyniad diweddaraf hwn.

Hoffwn annog trigolion yn yr ardaloedd cymwys newydd i wneud cais trwy'r dudalen ar wefan y cyngor.”

Dywedodd y Cynghorydd Diane King, Aelod Arweiniol dros Addysg, Plant a Theuluoedd:

“Bydd yr ehangu hwn ar ddarpariaeth gofal plant yn golygu bod pob ardal yn Sir Ddinbych bellach wedi'i chynnwys.

Gall teuluoedd ledled y sir wneud cais nawr i gael mynediad at y ddarpariaeth gofal plant am ddim i blant 2 oed, sy'n gymorth enfawr i rieni a theuluoedd, gan ddarparu darpariaeth gofal plant hanfodol yn ystod y tymor.”

Dywedodd y Dirprwy Brif Weinidog a'r Gweinidog sy'n gyfrifol am ofal plant, Sioned Williams:

"Mae hyn yn newyddion ardderchog ac yn dangos sut rydym yn cyflymu ein hymrwymiadau i ddarparu mwy o gefnogaeth i deuluoedd. Costau gofal plant yng Nghymru yw'r uchaf yn y DU ac rwy'n benderfynol o helpu i ostwng costau i deuluoedd ym mhob rhan o Gymru, gan sicrhau hefyd y gall plant gael y dechrau gorau mewn bywyd, i gefnogi eu datblygiad. Byddwn yn parhau i weithio'n agos gydag awdurdodau lleol ar draws Cymru i sicrhau y gall pob teulu elwa o ofal plant mwy fforddiadwy a hygyrch."

Byddwch yn anturus yr haf hwn: Archwilio'r tu allan a helpu eich teulu i ffynnu

Mae teuluoedd yng Ngogledd Cymru yn cael eu hannog i fanteisio ar yr awyr agored yr haf hwn er mwyn darganfod y cyfoeth o anturiaethau sydd ar gael wrth garreg eu drws am ddim neu am gost isel trwy'r fenter Archwilio'r Tu Allan!.

Yr haf hwn, gall teuluoedd wneud y mwyaf o'u gwyliau’r haf hwn drwy archwilio parciau, traethau, coedwigoedd, meysydd chwarae a mannau gwyrdd lleol ar draws y rhanbarth. Mae treulio amser yn yr awyr agored yn hybu iechyd emosiynol, lles a datblygiad plant yn ogystal â'u diddanu.

Mae ymchwil yn dangos yn gyson bod cysylltu â natur yn gallu gwella iechyd meddwl a lles. Mae chwarae yn yr awyr agored yn annog plant a phobl ifanc i fod yn actif, defnyddio eu dychymyg, datrys problemau, cymryd risgiau y gellir eu rheoli a meithrin hyder ac annibyniaeth. Mae hefyd yn cynnig cyfleoedd gwerthfawr i deuluoedd dreulio amser gyda'i gilydd a chryfhau eu cysylltiad â'r cymunedau y maen nhw’n byw ynddyn nhw.

Mae Archwilio'r Tu Allan! yn gyfeiriadur ar-lein sy'n helpu teuluoedd i ddarganfod lleoedd awyr agored i'w harchwilio, eu mwynhau a chwarae ynddyn nhw ledled Gogledd Cymru. Wedi'i ddatblygu gan Fwrdd Partneriaeth Ranbarthol Plant Gogledd Cymru mae'n cynnwys ystod eang o leoliadau i'w hymweld am ddim neu am gost isel, gan ei gwneud hi'n haws nag erioed i deuluoedd ddatgelu trysorau cudd, rhoi cynnig ar anturiaethau newydd a manteisio i'r eithaf ar wyliau'r haf gyda'i gilydd.

Gall teuluoedd ddefnyddio Archwilio'r Tu Allan! i ddod o hyd i:

• Meysydd chwarae a mannau chwarae antur
• Parciau a mannau gwyrdd
• Traethau a llwybrau cerdded arfordirol
• Llwybrau mewn coedwigoedd a safleoedd natur
• Mannau agored ar gyfer gemau i'r teulu a phicnic
• Trysorau cudd mewn cymunedau ledled Gogledd Cymru

Mae pob antur awyr agored yn cynnig cyfle i blant ddatblygu sgiliau newydd, meithrin gwydnwch, magu hyder a chreu atgofion parhaol gyda theulu a ffrindiau.

Awgrymiadau Ardderchog ar gyfer Anturiaethau Awyr Agored yr Haf

• Gadewch i blant arwain y ffordd – Anogwch blant i ddewis ble i fynd a beth i'w archwilio er mwyn meithrin hyder, chwilfrydedd ac annibyniaeth.
• Dechreuwch yn agos at gartref – Gall parciau, traethau, coedwigoedd a llwybrau lleol fod yn anturiaethau cyffrous heb orfod teithio’n bell.
• Meddyliwch am heriau – Chwiliwch am fywyd gwyllt, casglwch ddail diddorol, adnabyddwch adar neu crëwch helfa drysor syml i gadw plant yn brysur.
• Cymerwch amser i gysylltu – Mae anturiaethau awyr agored yn cynnig cyfleoedd gwerthfawr ar gyfer sgyrsiau i'r teulu i gyd oddi wrth sgriniau a phethau sy'n tynnu eich sylw bob dydd.
• Darganfyddwch rywle newydd – Mae ymweld â lleoedd anghyfarwydd yn helpu plant i ddysgu addasu, magu hyder a dealltwriaeth gryfach o'r byd o'u cwmpas.
• Triniwch Ogledd Cymru gyda pharch – Dilynwch y Cod Cefn Gwlad trwy fynd â sbwriel adref, parcio’n gyfrifol, parchu bywyd gwyllt a da byw, a chan adael dim olion o’ch ymweliad ar eich ôl. Yn ystod tywydd sych, dylech osgoi gweithgareddau a allai ddechrau tanau gwyllt a helpwch i amddiffyn amgylchedd naturiol Gogledd Cymru ar gyfer cenedlaethau’r dyfodol.

Mae Archwilio'r Tu Allan! yn rhan o Fframwaith Iechyd Lles a Gwytnwch Emosiynol Gogledd Cymru sy’n cefnogi plant, pobl ifanc a theuluoedd ar draws y rhanbarth drwy annog ffyrdd iach o fyw a chysylltiadau cadarnhaol â natur a chymunedau lleol.

Anogir teuluoedd i ddechrau cynllunio eu hantur awyr agored nesaf drwy ymweld â gwefan Archwilio'r Tu Allan! i ddarganfod yr amrywiaeth o gyfleoedd sydd ar gael ledled Gogledd Cymru.

Am ragor o wybodaeth, ewch i'r gwefannau isod:

• Archwilio'r Tu Allan!
• Fframwaith Iechyd Lles a Gwytnwch Emosiynol Gogledd Cymru

Y Cyngor yn Amlinellu'r Camau Nesaf yn dilyn Pryderon am y Bagiau Ailgylchu Glas

Mae Cyngor Sir Ddinbych yn cydnabod ac yn deall pryderon a godwyd gan drigolion ac aelodau lleol ynghylch y bagiau ailgylchu cardbord glas, ac rydym am roi sicrwydd i bobl bod y tîm Gwastraff ac Ailgylchu wedi gwrando ar farn trigolion ac wedi ymrwymo i edrych ar y mater hwn yn ofalus.

Mewn cyfarfod o'r Cyngor Llawn ym mis Mai eleni, trafododd cynghorwyr hysbysiad o gynnig a oedd ar yr agenda ynghylch adolygu a diwygio'r Polisi Casglu Ailgylchu a Gwastraff na ellir ei Ailgylchu.

Yn dilyn yr Hysbysiad o Gynnig, dechreuwyd ar waith i baratoi adroddiad llawn a fydd yn amlinellu'r opsiynau ynghylch cynwysyddion ailgylchu trigolion, gan gynnwys y bag cardbord glas.

Rhaid i'r Cyngor ddilyn y broses briodol, a bydd yr adroddiad hwn yn cael ei ystyried gan y Pwyllgor Craffu Cymunedau ym mis Medi. Yn dilyn argymhellion y pwyllgor, bydd yn mynd gerbron y Cabinet yn yr hydref, lle gwneir penderfyniad ynghylch unrhyw newidiadau arfaethedig i'r Polisi Casglu Ailgylchu a Gwastraff na ellir ei Ailgylchu.

Tra bod y broses hon ar y gweill, rydym yn annog trigolion i barhau i ddefnyddio unrhyw fagiau glas sy'n parhau i fod mewn cyflwr da, ar yr amod y gellir eu casglu'n ddiogel gan ein timau a'u gwagio i'r cerbyd casglu. Gall trigolion sydd â bagiau sydd wedi'u difrodi ac na ellir eu defnyddio mwyach archebu un newydd drwy wefan y Cyngor. Dylid bagiau newydd gyrraedd o fewn 4 wythnos.

Yn y cyfamser, gall trigolion gyflwyno eu cardbord i'w gasglu mewn bag addas arall o faint tebyg i'r bag ailgylchu cardbord glas a ddarperir gan y Cyngor. Bydd ein timau yn casglu'r rhain.

Hoffem ddiolch yn ddiffuant i drigolion am eu hymdrechion parhaus i ailgylchu ac am y gefnogaeth y maent yn ei dangos i'n timau casglu. Mae eu hymrwymiad yn gwneud gwahaniaeth gwirioneddol, gan ein helpu i ddiogelu amgylchedd lleol Sir Ddinbych ac adeiladu sir lanach a mwy cynaliadwy ar gyfer cymunedau nawr ac yn y dyfodol.

Y Cyngor yn rhoi diweddariad am brosiect Cae Ddôl

Mae Cyngor Sir Ddinbych yn atgoffa trigolion ac ymwelwyr fod parc Cae Ddôl yn dal ar agor i’r cyhoedd, er bod gwaith gwella wedi dechrau yno.

Efallai fod trigolion wedi sylwi bod gwaith uwchraddio wedi dechrau’n ddiweddar yng Nghae Ddôl er mwyn gwella profiadau a chyfleusterau i ymwelwyr a chefnogi swyddogaeth y parc fel ased cymunedol gwerthfawr.

Yn 2023, fe gadarnhaodd Llywodraeth y DU ei bwriad i roi £10.95 miliwn o gyllid grant i 10 o brosiectau cyfalaf sy’n ceisio diogelu treftadaeth, lles a chymunedau gwledig unigryw Rhuthun.

Cafodd y cyllid hwn, sef y Gronfa Adfywio Leol, ei ddyfarnu'n arbennig ar gyfer y prosiectau llwyddiannus ac ni ellir ei ddefnyddio ar gyfer unrhyw beth arall.

Fel rhan o’r gwelliannau i ymwelwyr ar y safle, bydd y prosiect yn creu llwybr teithio llesol 480 metr o hyd a fydd yn ymdroelli drwy’r parc er mwyn gwneud y lleoliad yn fwy hygyrch i gerddwyr a beicwyr. Bydd pont newydd yn cael ei hadeiladu yn lle yr hen bont ganolog a bydd trac pwmpio newydd yn cael ei osod yn y parc hefyd.

Tra bo’r gwaith adeiladu yn mynd rhagddo mewn rhai rhannau o’r parc, gwneir pob ymdrech i amharu cyn lleied ag sy’n bosibl ar ddefnyddwyr y parc a sicrhau bod y parc yn dal i fod ar gael i bobl ei fwynhau dros fisoedd yr haf.

Gan y bydd angen gosod cyfyngiadau dros dro mewn rhai rhannau o’r parc wrth i’r gwaith adeiladu fynd rhagddo, gofynnwn i ymwelwyr ddilyn yr holl arwyddion a chanllawiau ar y safle.

Mae'r gwaith hefyd yn cynnwys adnewyddu'r toiledau cyhoeddus, a fydd yn cael eu trosglwyddo i Gyngor Tref Rhuthun ar ôl eu cwblhau. Tra bod y gwaith yn mynd rhagddo, mae cyfleuster dros dro wedi'i osod yn y parc ac mae ar gael i'r cyhoedd ei ddefnyddio am ddim.

Dywedodd y Cynghorydd Jason McLellan, Arweinydd Cyngor Sir Ddinbych ac Aelod Arweiniol Twf Economaidd a Threchu Amddifadedd:

“Mae’r gyfres hon o welliannau yng Nghae Ddôl yn dilyn ymlaen o waith gwella eithriadol o boblogaidd a gwblhawyd yn y parc chwarae ychydig flynyddoedd yn ôl. 

"Hoffem sicrhau trigolion ac ymwelwyr fod parc Cae Ddôl yn parhau ar agor tra bo’r gwaith gwella pwysig hwn yn cael ei wneud a gwerthfawrogwn amynedd y cyhoedd yn ystod y cyfnod hwn.

“Disgwylir i’r prosiect hwn gael ei gwblhau erbyn gwanwyn 2027 ac edrychwn ymlaen at ddarparu gofod o ansawdd uchel y bydd y gymuned yn elwa ohono am flynyddoedd i ddod. Mae ymwelwyr y parc yn cael eu hannog i barhau i fwynhau’r parc a dilyn unrhyw arwyddion dros dro a allai fod mewn lle i sicrhau diogelwch y cyhoedd.”

I gael rhagor o wybodaeth am y prosiect yng Nghae Ddôl ewch i’n gwefan.

Buddsoddiad mawr i ddod â mwy o gartrefi fforddiadwy a chyfleoedd busnes newydd i ganol tref y Rhyl

Mae Cyngor Sir Ddinbych yn cymryd cam sylweddol arall ymlaen wrth adfywio canol tref y Rhyl, gyda chynlluniau’n mynd rhagddynt i drawsnewid dau eiddo amlwg ar y Stryd Fawr yn gartrefi fforddiadwy ac unedau masnachol wedi’u hadnewyddu.

Mae’r Cyngor yn paratoi i benodi contractwr i gyflawni’r gwaith ailddatblygu yn 64 Stryd Fawr a 2–4 Ffordd Wellington, gan ddod â’r lloriau uchaf gwag yn ôl i ddefnydd fel cartrefi fforddiadwy modern ac ynni-effeithlon, tra hefyd yn adnewyddu’r unedau manwerthu ar y llawr gwaelod ar gyfer busnesau’r dyfodol.

Mae’r prosiect yn rhan o weledigaeth hirdymor y Cyngor i roi bywyd newydd i ganol tref y Rhyl drwy gynyddu nifer y bobl sy’n byw yng nghanol y dref, cefnogi busnesau lleol a chreu cymuned fwy bywiog a chynaliadwy.

Yn ogystal â darparu tai fforddiadwy y mae mawr eu hangen, bydd yr ailddatblygiad yn creu mannau masnachol deniadol ar gyfer busnesau bach, gan helpu i gynyddu nifer yr ymwelwyr, cefnogi’r economi gyda’r nos a chryfhau dyfodol hirdymor canol y dref. Bydd y cynllun hefyd yn darparu cartrefi ynni-effeithlon sy’n helpu i leihau allyriadau carbon wrth wneud defnydd o adeiladau presennol.

Dywedodd y Cynghorydd Rhys Thomas, Aelod Arweiniol Tai a Chymunedau:

“Mae’r datblygiad hwn yn un rhan yn unig o strategaeth y Cyngor i geisio adfywio canol trefi yn Sir Ddinbych ac mae’n garreg filltir gyffrous arall yn ein buddsoddiad parhaus yng nghanol tref y Rhyl. Trwy ddod â’r adeiladau amlwg hyn yn ôl i ddefnydd, rydym yn creu cartrefi fforddiadwy y mae mawr eu hangen tra hefyd yn darparu mannau masnachol modern a fydd yn helpu i gefnogi busnesau lleol a denu mwy o bobl i ganol y dref.

“Mae prosiectau fel hyn yn dangos ein hymrwymiad i adfywio’r Rhyl mewn ffordd sy’n dod â budd i drigolion, busnesau ac ymwelwyr fel ei gilydd. Bydd cael mwy o bobl yn byw yng nghanol y dref yn helpu i greu cymuned fywiog a llewyrchus, gan wneud y defnydd gorau posibl o adeiladau presennol er budd cenedlaethau’r dyfodol.”

Mae’r datblygiad yn cefnogi Strategaeth Tai a Digartrefedd Cyngor Sir Ddinbych drwy gynyddu’r cyflenwad o gartrefi fforddiadwy ac yn cyfrannu at Gynllun Corfforaethol y Cyngor drwy helpu i sicrhau bod digon o gartrefi o ansawdd da i ddiwallu anghenion lleol.

Disgwylir hefyd i’r cynllun ddarparu manteision ehangach i’r gymuned, gan gynnwys cefnogi cadwyni cyflenwi lleol yn ystod y gwaith adeiladu, gwella bioamrywiaeth, annog teithio llesol a gwella ymddangosiad y rhan bwysig hon o ganol tref y Rhyl.

Disgwylir i’r gwaith adeiladu ddechrau yn ddiweddarach eleni ar ôl cwblhau’r broses gaffael.

Cyngor yn mynd i’r afael â gwastraff anghyfreithlon ar lôn gefn yn y Rhyl

Mae Cyngor Sir Ddinbych wedi rhoi dirwy o £300 i rywun o’r Rhyl wedi i ymchwiliad ganfod eu bod wedi methu â chyflawni eu Dyletswydd Gofal gyfreithiol ynghylch Gwastraff Domestig.

Cymerwyd camau gorfodi wedi dod o hyd i swm o wastraff domestig oedd wedi’i ollwng ar lôn gefn rhwng Stryd y Baddon a Heol Gwynfa yn y Rhyl. Gweithredodd y Cyngor fel rhan o’i ymdrechion parhaus i fynd i’r afael â thipio anghyfreithlon a gwella’r amgylchedd lleol.

Wedi dod o hyd i’r gwastraff, aeth swyddogion Tîm Troseddau Amgylcheddol a Newid Ymddygiad y Cyngor ati i bori drwy’r gwastraff a daethant o hyd i dystiolaeth o’r sawl a oedd yn gyfrifol am daflu’r gwastraff.

Ymchwiliwyd ymhellach i ganfod bod y preswylydd dan sylw wedi trefnu i rywun arall fynd â gwastraff o’u cartref ac wedi methu â chymryd camau rhesymol i sicrhau y câi ei waredu’n gyfreithlon. Yn sgil hynny, gollyngwyd y gwastraff yn anghyfreithlon ar lôn gefn.

Yn hytrach nag erlyn yr unigolyn gerbron llys, cyflwynodd y Cyngor Rybudd Cosb Benodedig o £300 am fethu â chyflawni’r Ddyletswydd Gofal ynghylch Gwastraff Domestig.

Dan Ddeddf Diogelu’r Amgylchedd 1990, mae gan breswylwyr gyfrifoldeb cyfreithiol i sicrhau nad ydynt ond yn trosglwyddo eu gwastraff i rywun â’r awdurdod i’w dderbyn neu gludwr gwastraff cofrestredig. Dylai unrhyw un sy’n trefnu i gael gwared â gwastraff ofyn bob amser am weld prawf dilys o fod yn Gludwr Gwastraff Cofrestredig a chadw cofnod o bwy bynnag a gasglodd eu gwastraff. Gall methu â gwneud hynny arwain at gamau gorfodi os canfyddir yn nes ymlaen bod y gwastraff wedi’i ollwng yn anghyfreithlon.

Meddai Jonathan Brittain-Hughes, Rheolwr Troseddau Amgylcheddol Cyngor Sir Ddinbych: “Mae tipio anghyfreithlon yn dal yn cael effaith fawr ar ein cymunedau ni, yn enwedig mewn ardaloedd lle mae’n digwydd dro ar ôl tro ac yn boendod i breswylwyr, busnesau ac ymwelwyr. Mae llawer o bobl yn tybio bod eu cyfrifoldeb am eu gwastraff yn dod i ben ar ôl talu rhywun i gael gwared arno, ond mae’r gyfraith yn dweud yn bendant fod gan breswylwyr Ddyletswydd Gofal i sicrhau eu bod yn trosglwyddo’r gwastraff i rywun â’r awdurdod i’w gludo.

Bydd ein swyddogion yn dal i ymchwilio’n drylwyr i achosion o dipio anghyfreithlon ac yn cymryd camau priodol os canfyddir troseddau.”

Meddai’r Cynghorydd Barry Mellor, Aelod Arweiniol yr Amgylchedd a Chludiant:  “Rydyn ni’n benderfynol o wella’r amgylchedd ledled Sir Ddinbych a mynd i’r afael â thipio anghyfreithlon ble bynnag y mae’n digwydd. Mae gorfodi’n rhan bwysig o’r gwaith hwnnw, ond rydym hefyd yn awyddus i annog pobl i gymryd ychydig o gamau syml cyn cael gwared â’u gwastraff. Os ydi pobl yn gwneud yn siŵr fod pwy bynnag sy’n cael gwared â’u gwastraff wedi cofrestru, gyda’n gilydd mi fedrwn ni atal tipio anghyfreithlon ac amddiffyn ein cymunedau lleol.”

Mae modd i bobl gadarnhau a yw unigolyn neu fusnes wedi cofrestru’n gyfreithiol i gludo gwastraff drwy fwrw golwg ar Gofrestr Cludwyr Gwastraff Cyfoeth Naturiol Cymru cyn cael gwared â’u gwastraff. Os yw rhywun yn dyst i achos o dipio anghyfreithlon neu’n dymuno rhoi gwybod am ddigwyddiad, dylent gysylltu â Chyngor Sir Ddinbych ar unwaith.

Mae Sialens Ddarllen yr Haf ar ei hanterth

Ydych yn chwilio am weithgareddau hwyliog am ddim dros yr haf i blant? Cofrestrwch ar gyfer Sialens Ddarllen yr Haf yn eich llyfrgell leol! Thema Her eleni yw 'Cyfrolau’n Canu’, sy'n annog plant i barhau i ddarllen dros wyliau'r haf wrth ddarganfod llawenydd mewn cerddoriaeth a straeon.

Bydd llyfrgelloedd hefyd yn cynnal amrywiaeth o ddigwyddiadau a gweithgareddau hwyliog am ddim, gan gynnwys sesiynau crefft, amseroedd stori, ymweliadau gan awduron a gweithdai cerddoriaeth. Cysylltwch â'ch llyfrgell leol i gael rhagor o wybodaeth.

Bydd gweithdai rap a bît-bocsio am ddim i helpu i feithrin hyder gyda Mr Phormula, pencampwr technegau ‘loopio’ byw presennol Cymru, yn addas ar gyfer plant rhwng 6 a 12 oed.

Bydd y Welsh Whisperer, perfformiwr ac awdur, yn sôn am ei lyfr 'Llyfr Peiriannau'r Fferm' ac yn canu rhai caneuon.

Bydd yr awdur lleol Oliver Sykes yn cyflwyno ei sioe un dyn newydd sbon, 'Diesel and Me', dathliad doniol, bywiog a theimladwy o gymuned a'r teulu rydym yn ei greu o'n cwmpas, ar gyfer plant (5 oed a throsodd) a'r oedolion sy'n dod gyda nhw.

Mae ymuno â'r llyfrgell yn RHAD AC AM DDIM, ac mae benthyg llyfrau hefyd yn RHAD AC AM DDIM. Does dim angen poeni am ddirwyon am lyfrau hwyr chwaith. Ewch i'ch llyfrgell leol i gofrestru a dechrau antur ddarllen eich plentyn!

Dywedodd y Cynghorydd Emrys Wynne, Aelod Arweiniol Cyngor Sir Ddinbych dros y Gymraeg, Diwylliant a Threftadaeth:

"Mae ein llyfrgelloedd yn cynnig llawer mwy na benthyg llyfrau – maent yn lleoedd croesawgar lle gall plant a theuluoedd ddysgu, creu a chael hwyl gyda'i gilydd. Mae Her Ddarllen yr Haf yn ffordd wych o gadw plant yn darllen dros y gwyliau, ac mae thema eleni, 'Ddarllen i'r Curiad', yn dod â cherddoriaeth a straeon ynghyd mewn ffordd hwyliog ac ysbrydoledig. Rwy'n annog teuluoedd ledled Sir Ddinbych i fanteisio ar y rhaglen wych o weithgareddau sydd ar gael yn ein llyfrgelloedd yr haf hwn."

DIGWYDDIADAU

Mr Phormula

• Dydd Llun, 3 Awst (10.30am – 12.00pm) – Llyfrgell Rhuthun (archebwch ymlaen llaw)
• Dydd Llun, 3 Awst (1.30pm – 3.00pm) – Llyfrgell Dinbych (archebwch ymlaen llaw)

Y Welsh Whisperer

• Dydd Llun, 17 Awst (11.00am) – Llyfrgell Rhuthun (archebwch ymlaen llaw)
• Dydd Llun, 17 Awst (2.00pm) – Llyfrgell Dinbych (archebwch ymlaen llaw)

Oliver Sykes

• Dydd Mawrth, 25 Awst (11.00am) – Llyfrgell Prestatyn (archebwch ymlaen llaw)
• Dydd Mercher, 26 Awst (11.00am) – Llyfrgell Llanelwy (archebwch ymlaen llaw)
• Dydd Mercher, 26 Awst (2.00pm) – Llyfrgell y Rhyl (archebwch ymlaen llaw)

Clwb Book Beats – galwch heibio am straeon, crefftau a hwyl!

• Dydd Llun a dydd Gwener drwy gydol mis Awst (10.00am – 12.00pm) – Llyfrgell Prestatyn
• Dydd Mawrth a dydd Iau drwy gydol mis Awst (10.00am – 12.00pm) – Llyfrgell y Rhyl

Crefftau'r Haf

• Bob dydd Gwener (11.00am – 12.00pm) – Llyfrgell Llangollen (archebwch ymlaen llaw)

Ewch i'ch llyfrgell leol i gofrestru a dechrau antur ddarllen eich plentyn! I weld lle mae'r llyfrgelloedd yn Sir Ddinbych, ewch i'n gwefan. 

Archifau’n gweithio gydag Ysgol Rhuthun i warchod hanes

Mae Archifau Gogledd Ddwyrain Cymru a Chyngor Sir Ddinbych yn gweithio ochr yn ochr â gweinyddwyr Ysgol Rhuthun, FRP Advisory, i ddiogelu treftadaeth ddogfennol yr ysgol, gan sicrhau bod yr hanes yn cael ei gadw ac yn hygyrch am genedlaethau i ddod.

Gyda dros 700 mlynedd o hanes, mae Ysgol Rhuthun wedi chwarae rhan arwyddocaol yn y gymuned leol, nid yn unig fel canolfan addysg ond fel cyflogwr hefyd. Er bod yr ysgol bellach wedi cau ei drysau, mae gwaith yn mynd rhagddo i sicrhau bod ei chofnodion hanesyddol yn cael eu cadw yn hytrach na’u colli.

Ar yr un pryd, mae Gwasanaeth Addysg Cyngor Sir Ddinbych yn gweithio i gefnogi plant a’u rhieni neu ofalwyr sy’n cael eu heffeithio gan gau’r ysgol.  Anogir teuluoedd i gysylltu â’r Cyngor os oes arnynt angen cyngor neu gymorth gyda sicrhau lle mewn ysgol. Mae gwybodaeth am dderbyniadau ysgol ar gael ar wefan y Cyngor.

Mae Archifau Gogledd Ddwyrain Cymru eisoes yn gofalu am ystod eang o gasgliadau ysgol ar draws y rhanbarth, yn cynnwys Ysgol Howell yn Ninbych ac Ysgol Grove Park yn Wrecsam. Mae’r gwasanaeth archifau wedi ymrwymo i gadw unrhyw gofnodion sydd wedi goroesi o Ysgol Rhuthun i’r un safon uchel, gan sicrhau eu bod ar gael i gefnogi ymchwil, hanes teuluol, addysg a threftadaeth gymunedol.

Meddai’r Archifydd, Sarah Roberts: “Mae archifau ysgol yn fwy na chasgliadau o ddogfennau gweinyddol. Maent yn adrodd hanes disgyblion, staff a chymunedau lleol, gan gofnodi bywyd bob dydd ochr yn ochr â cherrig milltir a chyflawniadau arwyddocaol.  Mae cadw’r cofnodion hyn yn helpu i warchod hunaniaeth unigryw’r ysgol tra’n creu adnoddau parhaol ar gyfer cenedlaethau’r dyfodol.”

Meddai’r Cynghorydd Diane King, Aelod Arweiniol Addysg, Plant a Theuluoedd Cyngor Sir Ddinbych: “Mae cau Ysgol Rhuthun yn newyddion trist iawn i bawb sy’n gysylltiedig â’r ysgol a’r gymuned ehangach. Ein blaenoriaeth yw cefnogi plant, pobl ifanc a’u teuluoedd drwy’r cyfnod anodd hwn, mae ein Gwasanaeth Addysg ar gael i roi cyngor ac arweiniad i helpu rhieni a gofalwyr i sicrhau lleoedd ysgol priodol ar gyfer eu plant.”

Meddai’r Cynghorydd Emrys Wynne, Aelod Arweiniol y Gymraeg, Diwylliant a Threftadaeth Cyngor Sir Ddinbych: “Mae Ysgol Rhuthun wedi bod yn rhan bwysig o hanes yr ardal ers canrifoedd. Er bod y bennod hon wedi dod i ben, mae’n bwysig nad yw hanes nodedig yr ysgol yn cael ei golli. Drwy weithio gyda gweinyddwyr i gadw ei chofnodion, gallwn helpu i sicrhau bod cenedlaethau’r dyfodol yn gallu deall a gwerthfawrogi cyfraniad yr ysgol i addysg ac i fywyd ein cymuned.”

Mae gan y Gwasanaeth Archifau ddiddordeb hefyd mewn unrhyw gofnodion gan unrhyw gyn-ddisgyblion neu aelodau o’r gymuned, yn cynnwys lluniau o’r ysgol, newyddlenni neu brosbectysau. Gall unrhyw un sydd â deunyddiau yr hoffent eu cynnig i’r Gwasanaeth Archifau, gysylltu drwy anfon neges e-bost at  archives@newa.wales neu drwy ymweld â gwefan Archifau Gogledd Ddwyrain Cymru am fwy o wybodaeth.

Cyngor yn annog masnachwyr i wirio diogelwch teganau poblogaidd

Anogir manwerthwyr i sicrhau bod eu nwyddau’n cydymffurfio â deddfwriaeth y Deyrnas Unedig.

Wedi’r ymgyrch yn ddiweddar i fynd i’r afael â nwyddau ffug yn y sir, pan feddiannwyd mwy na 600 o eitemau, mae tîm Safonau Masnach y Cyngor yn atgoffa siopwyr a’u cwsmeriaid i fod yn wyliadwrus wrth i’r ffasiwn ddiweddaraf ar gyfryngau cymdeithasol gyrraedd y silffoedd.

Mae ‘Squishy Dumplings’ a ‘NeeDoh’ ymysg y teganau mwyaf newydd sydd wedi dod yn boblogaidd ar gyfryngau cymdeithasol ac wrth i’r galw amdanynt gynyddu, mae swyddogion wedi sylwi hefyd fod yno fwy o fersiynau ffug ar werth ledled y sir.

Wrth ymrwymo i fynd i’r afael â nwyddau ffug, mae’r tîm Safonau Masnach yn annog manwerthwyr i sicrhau bod eu stoc yn cydymffurfio â deddfwriaeth y Deyrnas Unedig ac yn atgoffa pobl o’r arwyddion cyffredin i gadw golwg amdanynt er mwyn adnabod nwyddau ffug.

 Ymysg yr arwyddion bod nwyddau’n ffug mae: 

• Enw a chyfeiriad y gwneuthurwr. Os yw’r gwneuthurwr y tu allan i’r Deyrnas Unedig, dylai nwyddau ddangos enw a chyfeiriad y gwneuthurwr yn ogystal â’r mewnforiwr.
•  Math, swp, rhif model neu rif cyfres.
•  Marc CE a/neu UKCS – mae’r marciau hyn yn fodd i’r gwneuthurwr ddatgan bod y tegan yn ddiogel, ac mae’n rhaid i’r marc fod ar y tegan ei hun neu’r deunydd pecynnu, a bod yn barhaol a hawdd ei ddarllen.

 Meddai’r Cynghorydd Alan James, Aelod Arweiniol Datblygu Lleol a Chynllunio:

“Rydyn ni wedi sylwi fod ffasiynau ar gyfryngau cymdeithasol yn dylanwadu ar dwf mewn gwerthu nwyddau ffug. Wrth i’r teganau ‘squishy’ ddod yn fwy poblogaidd, mae’r galw amdanynt yn cynyddu a throseddwyr yn ceisio gwneud elw drwy wneud fersiynau ffug yn rhad.

“Mae’r nwyddau go iawn wedi bod drwy gyfres o brofion diogelwch llym ac efallai’n wir na fydd y rhai ffug yn bodloni’r un safon, sy’n creu perygl i ddefnyddwyr, a phlant yn enwedig, gan fod y rhai ffug yn debygol o fod â’r labeli anghywir neu ddim o gwbl, ac wedi’u gwneud o ddefnyddiau anaddas.

“Mae ein swyddogion wedi bod yn gweithio’n ddiwyd i fynd i’r afael â gwerthu nwyddau ffug drwy addysgu siopwyr a’u cwsmeriaid a chynnal ymweliadau ag amryw safleoedd ledled y sir. Buont yn ymweld â nifer o fannau yn ddiweddar, ac fe feddiannon nhw symiau mawr o nwyddau ffug a rhai a fedrai fod yn beryglus.”

Os oes rhywun wedi prynu tegan neu unrhyw beth arall y maent yn amau ei fod yn ffug, dylent roi gwybod i wasanaeth defnyddwyr Cyngor ar Bopeth drwy ffonio 0808 223 1144 (llinell Saesneg: 0808 223 1133 neu fynd i’w gwefan - https://www.citizensadvice.org.uk/cymraeg/Defnyddwyr/get-more-help/if-you-need-more-help/

Gall busnesau gysylltu â Thîm Safonau Masnach Sir Ddinbych i gael cyngor ar nwyddau ffug drwy wefan Cyngor Sir Ddinbych.

Cynaeafu hadau blodau gwyllt i helpu natur ffynnu ledled Sir Ddinbych

Mae gwaith yn mynd rhagddo i hybu dyfodol blodau gwyllt cynhenid Sir Ddinbych.

Mae timoedd Bioamrywiaeth a Gwasanaethau Stryd Cyngor Sir Ddinbych yn cydweithio i gynhyrchu cymysgedd hadau lleol cynhenid i Sir Ddinbych er mwyn cefnogi’r Prosiect Dolydd Blodau Gwyllt y Cyngor.

Mae’r Prosiect Dolydd Blodau Gwyllt y Cyngor yn cynnal ac amddiffyn byd natur yn lleol ac yn cefnogi lles cymunedau ledled y sir.  Mae’n cael ei ariannu hefyd gan Lywodraeth Cymru, drwy gyllid Lleoedd Lleol ar gyfer Natur.

Mae gwaith cynaeafu hadau yn digwydd yn nolydd blodau gwyllt y sir sydd yn gyfoethog o ran rhywogaethau.

Gan ddefnyddio cynaeafwr brwsh wedi’i dynnu gan ATV, mae hadau cynhenid penodol i safle yn cael eu casglu drwy ddull effaith isel, gan na fydd y peiriant yn torri na difrodi’r llystyfiant yn ddifrifol.

Unwaith iddynt gael eu casglu, bydd y cymysgedd o hadau o’r safleoedd a ddewiswyd ar gyfer cynaeafu, yn cael eu defnyddio i helpu rhai o’r dolydd llai amrywiol, drwy hadu yn ystod cyfnod yr hydref.

Casglwyd hadau o ddolydd lleol y sir y llynedd gan eu hadu ar safle yn Ffordd Colomendy Dinbych nad oedd yn ffynnu. Mae’r tîm Bioamrywiaeth wedi nodi atgyfodiad y blodau gwyllt yn ystod arolwg yno'r tymor hwn.

Meddai Ellie Wainwright, Swyddog Bioamrywiaeth:  “Gall y safleoedd dolydd blodau gwyllt sy’n gyfoethog o ran rhywogaethau, a grëwyd trwy ddod a glaswelltir amwynder a lleiniau trefol i reolaeth blodau gwyllt trwy dorri a chasglu tymhorol, helpu i wella ein dolydd llai amrywiol. Rydym yn cynaeafu hadau o ystod amrywiol o blanhigion, ac unwaith cânt eu hadu ar y safleoedd dewisol, gobeithio bydd trigolion yn gweld mwy o amrywiaeth y flwyddyn nesaf. Gan helpu i ddarparu adnodd cefnogi cryfach i beillwyr a bywyd gwyllt lleol hefyd.”

Ychwanegodd y Cynghorydd Barry Mellor, Aelod Arweiniol yr Amgylchedd a Chludiant: “Mae hwn yn brosiect pwysig ar gyfer adfer cynefinoedd sydd wedi’u difrodi’n ddifrifol ers y 1930au. Rwy’n gwybod bod y tîm Bioamrywiaeth, ynghyd â’n gweithwyr gwasanaethau stryd, wedi gweithio’n galed dros y blynyddoedd i reoli a datblygu ein dolydd. Mae defnyddio safleoedd aeddfed i roi help llaw i safleoedd llai amrywiol, trwy’r gwaith hadu hwn yn dangos gwerth yr amser ac ymdrech mae pawb wedi ei roi i warchod natur trwy gydol y prosiect hwn.”

Cabinet yn cymeradwyo Strategaeth Ddigidol newydd

Mae Cabinet Cyngor Sir Ddinbych wedi cymeradwyo Strategaeth Ddigidol 2026-2031 newydd, gan nodi sut y bydd technoleg yn helpu i wella gwasanaethau i breswylwyr.

Trafodwyd y strategaeth hon mewn cyfarfod diweddar o’r Cabinet, ac mae’n nodi’r dull pum mlynedd i ddefnyddio adnoddau digidol er mwyn cefnogi gwasanaethau gwell sydd yn fwy effeithlon.

Ei weledigaeth yw creu Cyngor sydd yn hyderus yn ddigidol, yn darparu gwasanaethau cynhwysol, diogel sydd yn hawdd i’w defnyddio ac i fodloni anghenion preswylwyr.

Fe fydd y strategaeth yn arwain gwelliannau digidol ar draws y Cyngor, a helpu staff, preswylwyr ac Aelodau Etholedig i elwa o wasanaethau symlach a chydgysylltiedig.

Mae’n cynnwys pedwar o egwyddorion arweiniol a naw amcan i siapio penderfyniadau digidol, buddsoddiadau a chyflawniadau dros y pum mlynedd nesaf.

Mae’r strategaeth wedi cael ei siapio gan adborth gan staff ac Aelodau, trafodaethau gydag uwch arweinwyr, meincnodi gyda sefydliadau eraill, ac adolygu systemau a galluoedd digidol presennol y Cyngor.

Meddai’r Cynghorydd Julie Matthews, Dirprwy Arweinydd ac Aelod Arweiniol Polisi, Cydraddoldeb a Strategaeth Gorfforaethol ac Asedau Strategol: “Bydd y strategaeth hon yn helpu i ni wneud defnydd gwell o dechnoleg ddigidol i ddarparu gwasanaethau sydd yn fwy cynhwysol, yn fwy diogel ac wedi’u dylunio o amgylch anghenion preswylwyr.  Mae’n rhoi fframwaith clir i ni ar gyfer y blynyddoedd sydd i ddod ac mae’n cefnogi ein huchelgais o groesawu cyfleoedd digidol yn y dyfodol.”

I gael mwy o wybodaeth am y Strategaeth Ddigidol ewch i yma