Gwaith adnewyddu labordai Gwyddoniaeth yn Ysgol Uwchradd Dinbych wedi’i gwblhau

Mae dau labordy gwyddoniaeth, yn ogystal ag ystafell baratoi gwyddoniaeth, wedi’u cael eu hadnewyddu’n llwyr yn Ysgol Uwchradd Dinbych, gan gynrychioli buddsoddiad o tua £230,000.

Ysgol Uwchradd Dinbych

Dechreuodd y gwaith adnewyddu ym mis Mehefin eleni, ac fe gafodd ei gwblhau’r mis hwn. Dyma’r ail gam yn rhaglen Adnewyddu Labordai Gwyddoniaeth yr ysgol, gyda’r cam cyntaf yn cael ei gwblhau yn 2024.

Yn y cam hwn cafodd Labordai Gwyddoniaeth 3 a 4, ynghyd â’r Ystafell Baratoi Gwyddoniaeth, eu hadnewyddu’n llwyr gan gynnwys tynnu’r holl ffitiadau a dodrefn gosodedig, nenfydau, lloriau a gosodiadau mecanyddol a thrydanol.

Yn ystod y gwaith, cafodd yr holl ddodrefn gosodedig eu newid am unedau pwrpasol modern yn ogystal ag offer labordy newydd.

Ystafell ddosbarth labordy wedi'i diweddaru

Mae offer mecanyddol a thrydanol hefyd wedi’u gosod, gan gynnwys gwaith ar y systemau awyru, goleuo, gwresogi a synwyryddion tân.

Mae’r gwaith ailaddurno mewnol llawn wedi cynnwys gorffeniadau newydd ar y waliau mewnol, gorffeniadau sy’n hawdd i’w cynnal a’u cadw ar y lloriau a gosod byrddau sgertin.

Ystafell ddosbarth labordy arall wedi'i diweddaru

Mae nenfydau newydd gyda goleuadau integredig hefyd wedi’u gosod.

Gwnaethpwyd y gwaith gan gwmni B & W Builders and Decorators Ltd a chafodd y prosiect ei arwain a’i reoli gan Dîm Cynnal a Chadw Adeiladau’r Cyngor.

Cafodd y prosiect hwn ei ariannu drwy Raglen Cynnal a Chadw Cyfalaf Ysgolion.

Unedau pwrpasol modern

Dywedodd y Cynghorydd Huw Hilditch-Roberts, Dirprwy Arweinydd ac Aelod Arweiniol dros Addysg, Teuluoedd, y Gymraeg, Diwylliant a Threftadaeth:

“Mae gwaith bellach wedi’i gwblhau ar y prosiect cyffrous hwn yn Ysgol Uwchradd Dinbych, gan gynrychioli buddsoddiad o tua £230,000.

Mae’r cylch diweddaraf hwn o waith yn cynrychioli’r ail gam yn rhaglen adnewyddu labordai gwyddoniaeth yr ysgol, wedi i’r cam cyntaf gael ei gwblhau yn ôl yn 2024.

Gydag offer a dodrefn newydd a gwell, mae’r gwaith adnewyddu hwn yn hynod fuddiol i brofiadau dysgu ac addysgu yn yr ystafelloedd dosbarth hyn.”

Dywedodd y Cynghorydd Mark Young, Cadeirydd y Llywodraethwyr yn Ysgol Uwchradd Dinbych:

"Rwyf wrth fy modd yn gweld y buddsoddiad pellach hwn o £230,000 yn Ysgol Uwchradd Dinbych.

Bydd y cyfleusterau gwyddoniaeth newydd gwych hyn o fudd i ddisgyblion a staff, gan ddarparu amgylchedd dysgu modern ac ysbrydoli ein pobl ifanc am flynyddoedd i ddod.

Diolch i bawb a fu’n rhan o wireddu hyn."