Cartref Gofal Dolwen yn cael sgoriau 'da' yn adroddiad arolygu AGC

Mae adroddiad arolygu gan Arolygiaeth Gofal Cymru (AGC) ar Gartref Gofal preswyl Dolwen yn Ninbych wedi cael sgoriau ‘da’ ym mhob un o’r pedwar maen prawf.

Cafodd y cartref gofal, sy'n cael ei redeg gan Gyngor Sir Dinbych, ei arolygiad mwyaf diweddar ym mis Rhagfyr.

Nododd crynodeb yr arolwg fod staff yn “darparu gofal a chymorth o ansawdd da, gan annog y bobl i gynnal cymaint o annibyniaeth â phosibl” ac yr oedd yn cydnabod bod pobl “yn byw mewn gwasanaeth sy’n gartrefol ac yn gyfforddus ac yn darparu mynediad da at gyfarpar arbenigol sy’n diwallu eu hanghenion.” Roedd crynodeb yr arolwg hefyd yn nodi: “Mae'r rheolwr a'r unigolyn cyfrifol yn hawdd mynd atynt ac yn gyfeillgar, ac maent yn sicrhau eu bod yn gwrando ar y bobl ac yn eu trin ag urddas a pharch.”

O ran lles, sy'n un o'r pedwar maen prawf, cafodd y cartref gofal sgôr 'da', ac yr oedd yr adroddiad yn tynnu sylw at y ffaith bod preswylwyr "yn cael cynnig dewisiadau cyson o ran gweithgareddau dyddiol ac maent yn cael cyfleoedd i gyrraedd eu potensial drwy gymryd rhan mewn gweithgareddau ystyrlon" a bod y cartref "yn cynnig rhaglen amrywiol o weithgareddau".

Cafodd amgylchedd diogelu’r cartref ei ganmol hefyd, ac yr oedd yr adroddiad yn nodi bod preswylwyr “yn teimlo'n ddiogel o wybod na all unrhyw un gael mynediad i'r adeilad heb i'r staff gofal wybod pwy ydynt” a’u bod nhw hefyd “yn teimlo'n hyderus ac yn gyfforddus i godi unrhyw broblemau neu bryderon gyda'r staff gofal”.

Roedd yr adran hon yn yr adroddiad hefyd yn canmol natur agos-atoch y staff, a nododd yr arolygwyr bod “y rheolwr yn hawdd mynd ato, a nododd un person nad oes byth angen iddo siarad â'r rheolwr gan fod y staff gofal yn ymdrin yn effeithiol ag unrhyw broblemau sydd ganddo.”

Ar nodyn tebyg, nododd yr adroddiad fod ymwelwyr fel teulu neu ffrindiau preswylwyr wedi cael “croeso” a bod preswylwyr yn cael eu “hannog i ddatblygu ac i gynnal cydberthnasau sy'n bodoli eisoes â theulu, ffrindiau a phobl sy'n bwysig yn eu bywydau gymaint â phosib.”

Aeth yn ei flaen i nodi “dywedodd y perthnasau y gwnaethom siarad â nhw eu bod yn fodlon ar y gwasanaeth gan ddweud eu bod yn cael gwybodaeth reolaidd.”

Cafodd y gwasanaeth ei ganmol hefyd am gyflawni Cynnig Gweithredol Cymru, a disgrifiwyd bod y gwaith o hyrwyddo’r Gymraeg a diwylliant Cymraeg wedi’i “integreiddio'n llawn i'r gwasanaeth.”

O ran gofal a chymorth, cafodd y cartref gofal sgôr 'da'.

Nododd yr adroddiad fod “cynlluniau personol y bobl yn seiliedig ar gryfderau ac yn amlinellu sut y dylai'r staff eu cefnogi i gyflawni eu canlyniadau llesiant” sy’n cynnwys proffiliau "un dudalen manwl ar waith sy'n cofnodi eu hoff bethau, eu cas bethau, a gwybodaeth werthfawr i'r staff gofal wybod amdanynt yn glir.” Roedd yr adroddiad yn canmol y ffordd yr oedd y cartrefi gofal yn trin ac yn rhoi meddyginiaeth, a nododd bod “cofnod clir i olrhain effeithiolrwydd y feddyginiaeth hon ac unrhyw sgîl-effeithiau.”

Wrth asesu'r amgylchedd yn y cartref gofal, a gafodd sgôr 'da' hefyd, nododd yr adroddiad fod preswylwyr yn “byw mewn gwasanaeth cartrefol a chyfforddus ac mae amrywiaeth o ardaloedd gwahanol ar gael iddynt dreulio amser ar eu pen eu hunain, cymdeithasu neu ddiddanu ymwelwyr."

Gwnaeth yr adroddiad hefyd ganmol hygyrchedd yn yr ardal hon, a’r “amrywiaeth o gyfarpar arbenigol ar gael i'r bobl.” Aeth ymlaen i gynnwys canllawiau drwy’r cartref, yn ogystal â diogelwch yr adeilad ei hun.

Cafodd arweinyddiaeth a rheolaeth yn y cartref gofal sgôr ‘da’, ac mae’r adroddiad yn canmol y “prosesau archwilio effeithiol” o ran ansawdd y gofal. Tynnodd yr adroddiad sylw at y ffaith bod prosesau "dethol a fetio llym wrth gyflogi staff er mwyn sicrhau bod pob aelod o'r staff yn gymwysedig ac yn ddibynadwy.”

Aeth ymlaen i nodi bod staff wedi dweud eu bod nhw’n “teimlo eu bod yn cael eu cefnogi'n dda yn eu rolau a bod aelodau'r tîm rheoli yn hawdd mynd atynt ac yn rhagweithiol a bod ganddynt hyder ynddynt.”

Dywedodd Ann Lloyd, Pennaeth Gwasanaethau Gofal Cymdeithasol Oedolion a Digartrefedd:

“Mae staff cartref gofal Dolwen yn gweithio mor galed, ac rwy’n falch o weld hyn yn cael ei gydnabod yn yr adroddiad arolygu diweddaraf hwn gan AGC.”

Mae’n amlwg o'r adroddiad hwn pa mor gartrefol mae'r staff yn gwneud y cartref gofal hwn, a pha mor dda yw'r berthynas rhwng y staff a'r preswylwyr. Hoffwn ddiolch i’r staff sy’n gweithio’n ddiflino bob dydd am eu hymdrechion, sydd wedi’u cydnabod yn yr adroddiad hwn.”

Agor caban cymunedol newydd yn Ysgol Cefn Meiriadog

Mae’r gwaith o adeiladu eco-gaban cymunedol yn Ysgol Cefn Meiriadog wedi’i gwblhau bellach, ac mae’r adeilad yn gwbl weithredol ac yn cael ei ddefnyddio.

Wedi'i ariannu drwy’r fenter ysgolion bro gan Lywodraeth Cymru, fe ddechreuodd y gwaith o adeiladu’r caban yn gynharach eleni, ac mae’n cynnwys ardal gegin, toiled hygyrch a phrif ofod eang y gall yr ysgol a'r gymuned leol ei ddefnyddio.

Y Caban newydd wedi’i gwblhau

Mae gan y caban ôl troed 60 metr sgwâr ac mae’n ofod sy’n cefnogi ymgysylltu â theuluoedd, cydweithio gyda gwasanaethau eraill ac anghenion cymuned yr ysgol.  

Yn ogystal â’r caban, bydd paneli solar yn cael eu gosod ar do prif adeilad yr ysgol gan leihau effaith carbon y prosiect hwn. 

Meddai Laura Martin, Pennaeth Ysgol Cefn Meiriadog:

"Rydym yn hynod falch bod y caban cymunedol ar agor ac yn fwrlwm o weithgarwch. Mae’n adnodd hanfodol sy’n pontio'r bwlch rhwng ein hysgol a'r gymuned ehangach ac rydym wrth ein bodd gyda'r canlyniad. 

Hoffem ddiolch i Lywodraeth Cymru a Sir Ddinbych am ddyrannu cyllid. Mae gennym bellach ofod pwrpasol a chynaliadwy, lle mae modd i deuluoedd gysylltu, i wasanaethau gydweithio ac i’n disgyblion ddefnyddio am flynyddoedd i ddod.”

Meddai’r Cynghorydd Diane King, Aelod Arweiniol Addysg, Plant a Theuluoedd:

"Rwy'n falch o weld bod y prosiect newydd hwn wedi’i gwblhau erbyn hyn. Bydd yn ased gwych i’r ysgol a’r gymuned.

Yn ogystal â bod o fudd i’r ysgol a’r disgyblion, bydd y gymuned hefyd yn elwa o’r caban newydd hwn yn Ysgol Cefn Meiriadog, sy’n darparu gofod newydd a chyffrous i’w ddefnyddio. 

Gan ddisodli adeilad hŷn, hen ffasiwn, mae'r prosiect caban newydd hwn yn cynnig ased newydd eang a modern i'r ysgol.”

Y wybodaeth ddiweddaraf am waith cynnal a chadw cylchol ar ffyrdd

Bydd gwaith cynnal a chadw cylchol yn cael ei gynnal ger Llanelwy a Rhuddlan ddechrau mis Mehefin.

Bydd gwaith torri gwair, strimio, casglu sbwriel ac ysgubo yn cael ei gwblhau ar Ffordd Ddeuol yr A525 rhwng Cylchfan Talardy a chylchfan Bryn Cwybyr ac ar yr A547 Ffordd Abergele, ar y dyddiadau sydd wedi’u nodi isod.

• A525 Talardy i KFC - Ffordd ar Gau - Dydd Llun, 1 Mehefin a Dydd Mawrth, 2 Mehefin 2026
• A525 Ffordd Osgoi Rhuddlan - Ffordd ar Gau - Dydd Mawrth, 3 Mehefin
• A525 Cylchfannau Bryn Cwybr a Ffordd Derwen - Cau Lôn - Dydd Iau, 4 Mehefin
• A547 Ffordd Abergele i Gylchfan Borth i Ffin y Sir - Dydd Llun, 8 Mehefin

Bydd y gwaith yn cael ei wneud rhwng 7pm a 6am ac yn cymryd 3 noson i’w wneud.  I sicrhau y cyflawnir y gwaith yn ddiogel, bydd yr A525 a’r A547 ar gau i gerbydau a cherddwyr ar y dyddiadau a’r amseroedd a nodir.

Dywedodd y Cynghorydd Barry Mellor, Aelod Arweiniol yr Amgylchedd a Chludiant:  “Bydd ein timau priffyrdd a gwasanaethau stryd yn gweithio’n galed dros y cyfnod hwn i wella’r llwybrau hyn, a hoffem ymddiheuro am unrhyw anghyfleustra a achoswyd a byddem yn ddiolchgar o’ch cydweithrediad a’ch amynedd dros y cyfnod hwn.

Bydd arwyddion ar gyfer y llwybr gwyro amgen i bob rhan o’r ffyrdd fydd ar gau.

Cabinet yn cefnogi prosiect gwres carbon isel Neuadd y Sir

Mae Cabinet Cyngor Sir Ddinbych wedi cefnogi camau cychwynnol y gwaith i wella effeithlonrwydd ynni yn Neuadd y Sir Rhuthun, yn ddibynnol ar lwyddiant y cais cyllid i Lywodraeth Cymru.

Cefnogodd Aelodau’r Cabinet y broses i sicrhau cyllid grant o Grant Gwres Carbon Isel Llywodraeth Cymru i gychwyn prosiect gwres carbon isel Neuadd y Sir.

Mae’r gwaith hwn yn rhan o waith parhaus Tîm Ynni Cyngor Sir Ddinbych i leihau defnydd ynni a chostau mewn adeiladau a gaiff eu rhedeg gan yr awdurdod lleol i fynd i’r afael â’r argyfwng hinsawdd a natur a gafodd ei ddatgan yn 2019 a pharhau â’r gwaith i leihau ei ôl-troed carbon ei hun.

Mae'r tîm wedi gofalu am brosiectau ar draws adeiladau’r Cyngor yn cynnwys ysgolion, er mwyn helpu i wella effeithlonrwydd ynni adeiladau, lleihau allyriadau carbon a chostau defnyddio dros y tymor hwy hefyd.

Adeiladwyd Neuadd y Sir dros 20 mlynedd yn ôl ac mae’n cyfrannu allyriadau carbon sy’n uwch nag sy’n angenrheidiol bob blwyddyn gan fod asedau allweddol yn yr adeilad bellach yn dynesu at ddiwedd eu hoes.

Bwriad y prosiect arfaethedig yw disodli’r boeleri nwy sydd wedi cyrraedd diwedd eu hoes ar y safle gyda phympiau gwres yr awyr, disodli’r Unedau Trin Aer, uwchraddio’r rheiddiaduron, pympiau gwres a’r system rheoli adeiladau.

Hefyd, fel rhan o’r gwaith arfaethedig, bydd ffenestri yn cael eu newid yn ffenestri modern sy'n effeithlon o ran ynni (yn arwain at tua hanner y golled gwres), stribedi drafft ac ardaloedd o inswleiddio nenfwd.

Pan fydd wedi’i gwblhau, bydd y prosiect yn golygu bod llai o ynni’n cael ei ddefnyddio, yn gwella’r amgylchedd gwaith, lleihau gwariant yn y dyfodol ar osod asedau newydd yn lle’r hen rai a lleihau allyriadau carbon tua 48.7 tunnell y flwyddyn.

Dywedodd y Cynghorydd Julie Matthews, Dirprwy Arweinydd ac Aelod Arweiniol Cydraddoldeb, Polisi a Strategaeth Gorfforaethol ac Asedau Strategol: “Dyma ddarn cyffrous iawn o waith sy’n cefnogi ymdrechion parhaus Cyngor Sir Ddinbych i leihau defnydd ynni a chostau, a gostwng olion troed carbon ar draws ein hystâd adeiladau. Bydd 90% o gost y prosiect yn cael ei ariannu gan gyllid grant allanol os byddwn yn llwyddiannus, sy'n fuddsoddiad mewnol gwych i'r Sir i gefnogi'r gadwyn gyflenwi. Bydd y cynigion yn y prosiect hwn yn darparu amgylchedd gweithio gwell i’r staff hefyd a helpu i ddiogelu Neuadd y Sir ar gyfer y dyfodol.”

Sesiwn galw heibio gwirfoddolwyr Archifau yng Ngharchar Rhuthun

Ydych chi erioed wedi meddwl tybed beth sy'n digwydd y tu ôl i'r llenni yn eich archifau lleol? Oes gennych chi ddiddordeb mewn dysgu sgiliau newydd, cwrdd â phobl newydd a helpu i ddiogelu hanes lleol pwysig?

Mae Archifau Gogledd Ddwyrain Cymru yn gwahodd aelodau o’r gymuned i sesiwn galw heibio ar gyfer gwirfoddoli yn yr archifau yng Ngharchar Rhuthun ddydd Gwener 5 Mehefin, lle gallwch chi alw heibio unrhyw bryd rhwng 10am a 12pm i gael rhagor o wybodaeth am gyfleoedd gwirfoddoli cyffrous.

Bydd cyfle i ymwelwyr gwrdd â’r tîm Archifau, dysgu am brosiectau gwirfoddoli cyfredol, a dysgu sut y gallan nhw fod â rhan ymarferol yn y gwaith o ofalu am gasgliadau hanesyddol arbennig y rhanbarth a'u diogelu.

Mae'r gwasanaeth yn chwilio am unigolion brwdfrydig sydd â llygad graff am fanylder, sydd â medrusrwydd corfforol da, ac sy'n awyddus i gyfrannu at wasanaeth treftadaeth pwysig.

Pa un a ydych chi'n frwd ynglŷn â hanes lleol, yn awyddus i gael profiadau newydd, neu eisiau rhoi rhywbeth yn ôl i'ch cymuned, gallai’r cyfle hwn fod yn berffaith ar eich cyfer chi.

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth:

“Mae gwirfoddolwyr yn bwysig iawn i’n helpu ni i gadw a rhannu hanes cyfoethog ein cymunedau ar gyfer cenedlaethau'r dyfodol. Mae Archifau Gogledd Ddwyrain Cymru yn cynnig cyfle difyr i bobl gymryd rhan, dysgu sgiliau newydd a gweithio’n agos gyda’r casgliadau hanesyddol unigryw.  Byddwn yn annog unrhyw un sydd â diddordeb mewn treftadaeth neu hanes lleol neu ddim ond eisiau rhoi rhywbeth yn ôl i’w cymuned, i ddod draw i’r sesiwn galw heibio i gael gwybod mwy.”

📅Dydd Gwener 5 Mehefin 2026
⏰Galwch heibio unrhyw bryd rhwng 10am - 12pm
📍Carchar Rhuthun, LL15 1HP

I gael rhagor o wybodaeth neu os ydych chi’n dymuno cysylltu â ni, ewch i’n gwefan yn https://www.newa.wales/ neu anfonwch e-bost at archives@newa.wales.

Y Cabinet yn cymeradwyo contract dylunio ac adeiladu ar gyfer prosiect ailwampio Ysgol Uwchradd Dinbych

Heddiw (26 Mai), mae Cabinet Cyngor Sir Ddinbych wedi cymeradwyo dyfarnu’r contract dylunio, ac yn dilyn hynny, y gwaith adeiladu sydd ynghlwm â phrosiect ailwampio Ysgol Uwchradd Dinbych i Wynne Construction.

Ddiwedd 2025, rhoddodd y Cabinet eu cymeradwyaeth i gychwyn y broses gaffael ar gyfer y contract Dylunio ac Adeiladu ar gyfer ailwampio Ysgol Uwchradd Dinbych.

Fe wnaethant hefyd gymeradwyo cyflwyno'r Achos Busnes Amlinellol i Lywodraeth Cymru, ac o ganlyniad, cafodd hynny ei gymeradwyo ym mis Mawrth eleni. 

Mae’r prosiect hwn yn rhan o gynllun amlinellol y Cyngor ar gyfer y Rhaglen Cymunedau Dysgu Cynaliadwy.

Ysgol Uwchradd Dinbych

Bydd y camau nesaf yn cynnwys ymgysylltu â chymuned yr ysgol a bydd y disgyblion yn chwarae eu rhan gan helpu i ddatblygu’r dyluniad. 

Cyfanswm y swm a gytunwyd i gael ei ddyrannu i’r prosiect ar hyn o bryd ar gyfer prosiect Ysgol Uwchradd Dinbych yw £19.8 miliwn. 

Mae'r Rhaglen Cymunedau Dysgu Cynaliadwy, a ariennir gan Lywodraeth Cymru, yn ariannu 65% o'r prosiect hwn, gyda'r 35% sy'n weddill yn cael ei ariannu gan y Cyngor. Yn ogystal, mae cyllid pellach yn cael ei ddarparu  gan Lywodraeth Cymru ar gyfer gwelliannau carbon sero-net.

Dywedodd Glen Williams, Pennaeth Ysgol Uwchradd Dinbych:

“Mae hwn yn newyddion ardderchog ac yn gyfnod mor gyffrous i Ysgol Uwchradd Dinbych a’r gymuned y mae’n ei gwasanaethu.

Rwy’n edrych ymlaen i weithio gyda’r awdurdod lleol, dylunwyr a chontractwyr i wneud yn siŵr bod moderneiddio’r ysgol yn helpu i ddarparu amgylchedd i ddysgwyr a fydd yn cefnogi eu cynnydd a’u hopsiynau ymhellach yn y dyfodol.”

Meddai’r Cynghorydd Diane King, Aelod Arweiniol Addysg, Plant a Theuluoedd:

“Rwy’n falch o weld bod y prosiect hwn wedi symud ymlaen i’r cam priodol nesaf. Gyda chontract dylunio ac adeiladu bellach ar waith, rydym gam yn nes at ddechrau gwaith ar y datblygiad cyffrous hwn.  

Bydd moderneiddio a gwella cyfleusterau ar y safle hwn yn gwella capasiti yn yr ysgol, yn ogystal â helpu i ddarparu addysg o’r ansawdd uchaf i ddisgyblion yn ardal Dinbych ar gyfer cenedlaethau i ddod.”

Gwahodd trigolion i ddweud eu dweud ar brosiect Stryd Fawr Prestatyn

Mae'r Cyngor yn annog unrhyw un sy'n byw, sy’n gweithio neu sy’n ymweld â Phrestatyn i gymryd rhan yn yr ymgynghoriad cyhoeddus ar ddyluniad manwl y cynllun gwella’r parth cyhoeddus a fydd yn cael ei gynnal rhwng 3 Mehefin a 5 Gorffennaf 2026.

Yn 2025, cadarnhaodd Llywodraeth y DU eu bwriad i ddarparu bron i £20 miliwn o gyllid grant ar gyfer saith prosiect cyfalaf i wella balchder bro a’r amgylchedd naturiol yn y Rhyl, Prestatyn a Dinbych.

Cafodd y cyllid hwn, sef y Gronfa Adfywio Leol, ei ddyfarnu'n arbennig ar gyfer y prosiectau llwyddiannus ac ni ellir ei ddefnyddio ar gyfer unrhyw beth arall.

Yn rhan o'r prosiect i wella balchder bro a'r amgylchedd naturiol ym Mhrestatyn, dyfarnwyd cyllid i Gyngor Sir Ddinbych i wella parth cyhoeddus (man gweladwy) y stryd fawr.

Mae sesiwn galw heibio hefyd wedi'i threfnu gan y Cyngor ac mae trigolion yn cael eu gwahodd i ddweud eu dweud ar y gwelliannau arfaethedig i'r stryd fawr.

Bydd y sesiwn yn cael ei chynnal ar 3 Mehefin, yn Sinema Scala ym Mhrestatyn rhwng 1pm a 7pm. 

Dywedodd y Cynghorydd Jason McLellan, Arweinydd ac Aelod Arweiniol Twf Economaidd a Threchu Amddifadedd:

“Hoffem ni ddiolch i drigolion, ymwelwyr a busnesau am eu cydweithrediad ac ymgysylltiad trwy gydol y prosiect hyd yn hyn.

“Ein nod yw cyflawni cynllun sy’n gwella parth cyhoeddus y stryd fawr ac sy’n cefnogi adfywio’r dref yn yr hirdymor.

“Hoffem ni annog cymaint o drigolion â phosibl i ddweud eu dweud drwy naill ai fynd i’r digwyddiad galw heibio neu drwy gwblhau’r ymgynghoriad ar-lein.”

Gall trigolion sy'n methu â dod i’r digwyddiad galw heibio wyneb yn wyneb rannu eu barn drwy gwblhau'r ymgynghoriad ar-lein ar wefan y Cyngor.

Mae fersiynau papur o'r arolwg adborth hefyd ar gael a gellir cael gafael arnyn nhw yn Llyfrgell Prestatyn a’r Siop Un Alwad.  Y dyddiad cau ar gyfer pob ymateb yw 5 Gorffennaf 2026.

Grŵp i fynd i’r afael â sbwriel morol ar draeth y Rhyl

Mae digwyddiad casglu sbwriel wedi’i drefnu i fynd i’r afael â sbwriel morol ar ran boblogaidd o arfordir y Rhyl y mis hwn.

Ar ôl ymdrin â’r traethau ger maes parcio Dwyrain Nova a thraeth Barkby ym Mhrestatyn, mae Tîm Perygl Llifogydd Cyngor Sir Ddinbych yn trefnu digwyddiad ar gyfer ardaloedd arfordirol o gwmpas Pafiliwn y Rhyl.

Bydd y digwyddiad casglu sbwriel yn cael ei gynnal ar 27 Mai rhwng 2pm a 3pm. Mae croeso i’r rhai sydd eisiau cefnogi’r digwyddiad i ymuno â’r grŵp ym maes parcio Theatr y Pafiliwn y Rhyl erbyn 2pm.

Bydd y digwyddiad hwn yn y Rhyl hefyd yn cael ei gefnogi gan Cadwch Gymru'n Daclus a fydd yn cyflenwi rhywfaint o'r offer casglu sbwriel.

Gall sbwriel morol greu rhwystrau mewn dyfrffyrdd a draeniau, sy’n atal llif y dŵr, ac sy’n arwain at fwy o berygl o lifogydd yn lleol yn bellach i fyny’r afon.

Gall casglu sbwriel morol o’r traethau gefnogi amddiffynfeydd naturiol oherwydd gall traethliniau, twyni a dolydd morwellt gynnal eu swyddogaeth naturiol fel amddiffynfeydd yn erbyn y môr.

Dywedodd Claudia Smith, Swyddog Erydu Arfordirol a Pherygl Llifogydd: “Y tro hwn, yr ydym ni eisiau canolbwyntio ar y darn o’r promenâd wrth Bafiliwn y Rhyl gan ein bod ni’n gwybod bod mwy o sbwriel morol yn tueddu i ddod i’r golwg ar yr ochr hon a all gyfrannu at lifogydd lleol a gwneud niwed i’r amgylchedd a bywyd gwyllt.”

Dywedodd y Cynghorydd Barry Mellor, yr Aelod Cabinet Arweiniol ar gyfer Priffyrdd a’r Amgylchedd:  “Mae rheoli’r perygl o lifogydd yn lleol o ganlyniad i effaith sbwriel morol ar ein traethau yn hynod o bwysig i amddiffyn pobl rhag llifogydd.  Mae hefyd yn llawer gwell i les ein trigolion a’r rhai hynny sy’n ymweld â’r ardaloedd hyn, a’r bywyd gwyllt a ganfyddir ar y traethau, a byddwn yn annog unrhyw un sy’n credu y gallen nhw wneud gwahaniaeth i ymuno â ni i helpu.”

I gael rhagor o fanylion, cysylltwch â claudia.smith@denbighshire.gov.uk / 07785517398

Newidiadau i'r prawf traffig parhaus ym Mhrestatyn

Bydd y Cyngor yn cyflwyno rhagor o newidiadau i wella llif y traffig yn yr ardal.

Ar 13 Ebrill, dechreuodd Cyngor Sir Ddinbych brawf i gael system ddwyffordd ar Ffordd y Bont ym Mhrestatyn i leihau tagfeydd yn yr ardal yn rhan o brosiect ehangach i wella ac adfywio'r dref.

Gofynnwyd am y prawf yn dilyn adborth a gafodd y Cyngor mewn ymgynghoriadau â’r cyhoedd, yn rhan o brosiect gwella’r parth cyhoeddus ar Stryd Fawr Prestatyn. 

Yn 2025, cadarnhaodd Llywodraeth y DU eu bwriad i ddarparu bron i £20 miliwn o gyllid grant ar gyfer saith prosiect cyfalaf i wella balchder bro a’r amgylchedd naturiol yn y Rhyl, Prestatyn a Dinbych.

Mae’r cyllid, sef y Gronfa Adfywio Leol, wedi’i ddyfarnu'n arbennig ar gyfer y prosiectau llwyddiannus sydd wedi’u cynnwys yn Nyffryn Clwyd ac ni ellir ei ddefnyddio ar gyfer prosiectau eraill.

Cynhelir y prawf am gyfnod o dri mis, o leiaf, a gallai bara hyd at 18 mis dan y Gorchymyn Rheoleiddio Traffig Dros Dro sydd ar waith gan y Cyngor. 

O 26 Mehefin 2026 ymlaen, bydd llif y traffig ar waelod y Stryd Fawr yn mynd i’r cyfeiriad arall.  Mae hyn yn golygu y bydd cerbydau sy'n gadael Parc Prestatyn bellach yn gadael drwy'r Stryd Fawr.

Bydd y newid hwn hefyd yn golygu y bydd y parc manwerthu bellach yn elwa o dair allanfa (y Stryd Fawr, Ffordd y Bont a Ffordd Llys Nant).

Ni fydd cerbydau bellach yn gallu troi i'r chwith i lawr y Stryd Fawr o Ffordd Penisardre tuag at y gylchfan fach a'r parc manwerthu. Yn lle hynny dylai gyrwyr ddefnyddio Ffordd Llys Nant i gyrraedd y parc manwerthu o'r ochr honno o'r dref.

Mae'r prawf ychwanegol hwn yn cael ei gyflwyno i weld a ellir lleihau’r tagfeydd traffig ar waelod y Stryd Fawr ymhellach, ynghyd â’r system ddwyffordd ar Heol y Bont.

Dywedodd y Cynghorydd Barry Mellor, Aelod Arweiniol yr Amgylchedd a Chludiant:

“Rydym ni’n gwerthfawrogi cydweithrediad ac amynedd trigolion wrth i ni fonitro effaith y newidiadau hyn ac wrth i ni weithio i wella llif traffig ym Mhrestatyn.

“Mae’r Cyngor yn ymwybodol bod llawer o bryderon wedi’u codi yn y gorffennol ynghylch tagfeydd cerbydau ar y ffordd hon cyn i’r newidiadau hyn gael eu rhoi ar waith, a bydd swyddogion yn gofyn am adborth gan fodurwyr a cherddwyr wrth i’r prawf fynd rhagddo.”

Creu cynefin blodau gwyllt newydd i ddathlu Wythnos Blodau Gwyllt Sir Ddinbych

Mae disgyblion cynradd yn Y Rhyl wedi bod yn helpu i ddathlu’r ffaith fod ymgyrch fioamrywiaeth flynyddol yn dychwelyd.

Fe fu disgyblion Ysgol Llywelyn yn cydweithio gyda thîm Bioamrywiaeth Cyngor Sir Ddinbych i helpu i baratoi ar gyfer Wythnos Blodau Gwyllt 2026 sy’n dechrau hanner tymor mis Mai.

Fe fu’r disgyblion ifanc yn gweithio ochr yn ochr â’r swyddogion i greu dôl blodau gwyllt newydd yn yr ysgol er mwyn eu helpu i ddysgu am y manteision a ddaw i fyd natur yn sgil y cynefinoedd hyn, a dyma thema Wythnos Blodau Gwyllt Sir Dinbych a gaiff ei chynnal yn fuan.

Yn gynnar yn ystod y flwyddyn hon fe fu’r disgyblion a’r tîm Bioamrywiaeth a Chefn Gwlad yn plannu dros 700 o goed o wahanol rywogaethau ar dir yr ysgol. Roedd y gwaith hwn yn cael ei ariannu gan Lywodraeth y DU drwy Gronfa Ffyniant Gyffredin y DU 2025/26 sydd wedi rhoi £278,600 i Gyngor Sir Ddinbych ar gyfer gwaith adfer natur ledled y sir.

Nawr mae’r disgyblion wedi creu cynefin blodau gwyllt newydd sy’n cynnwys rhywogaethau blodau gwyllt sef moronen y maes, llygad llo mawr, clust y gath, gludlys coch, y feddyges las, y bengaled, crafanc brân y gweunydd, meillionen hopysaidd a gludlys cyffredin.

Bydd yr ardal yn helpu i ddarparu cefnogaeth i beillwyr lleol fel gwenyn a bydd hefyd yn darparu ardal awyr agored ychwanegol yn yr ysgol i ddysgu am natur.

Cafodd y blodau gwyllt eu darparu ar gyfer eu plannu gan blanhigfa goed Cyngor Sir Ddinbych yn Llanelwy a’r Ganolfan Sgiliau Coetir ym Modfari.

Dywedodd y Swyddog Bioamrywiaeth, Ellie Wainwright: “Roedd yn wych dychwelyd i Ysgol Llywelyn ar ôl gweithio gyda’r disgyblion i blannu’r holl goed. Mae’r ysgol yn angerddol iawn am gefnogi natur a bydd y prosiect diweddaraf hwn i greu’r ddôl yn helpu i greu cynefin gwych i’r holl anifeiliaid a’r planhigion ar dir yr ysgol.

Dywedodd y Cynghorydd Barry Mellor, Aelod Arweiniol yr Amgylchedd a Chludiant:  “Diolch yn fawr i ddisgyblion a staff Ysgol Llywelyn am ein helpu ni i groesawu Wythnos Blodau Gwyllt Sir Ddinbych 2026 drwy greu’r cynefin anhygoel hwn ar gyfer natur yn yr ysgol.”

“Mae’n wych i weld disgyblion ifanc yn rhoi help llaw i fyd natur yn lleol, mae eu cefnogaeth yn ysbrydoliaeth i ni i gyd.”

“Gweld hyder yn datblygu’n annibyniaeth” - Gofalwr maeth yn Sir Ddinbych yn rhannu’r eiliadau hynny sy’n dangos datblygiad ar gyfer Pythefnos Gofal Maeth

Y tro cyntaf i blentyn chwerthin, trafod ei ddiwrnod, gofyn i wylio ffilm; mae'r rhain yn eiliadau y gallai llawer eu cymryd yn ganiataol, ond i ofalwyr maeth yng Nghymru, maent yn symbol o un peth, sef datblygiad.

Rob

Mae plant sydd wedi profi trawma yn aml yn datblygu ffyrdd o amddiffyn eu hunain. Gallai hyn gynnwys ymddygiadau fel pryder, tynnu yn ôl yn emosiynol, ymateb mewn ffordd ddwys neu ei chael hi’n anodd dilyn rheolau.

Mae arolwg cenedlaethol a gomisiynwyd gan Maethu Cymru wedi darganfod bod tua 80% o ofalwyr a holwyd wedi cefnogi plant wnaeth arddangos ymddygiadau fel hyn. Er y gall yr heriau hyn fod yn anodd, dywedodd hanner y gofalwyr maeth a holwyd hefyd eu bod wedi sylwi ar ddatblygiadau ystyrlon o fewn y chwe mis cyntaf.

Rhannodd gofalwyr maeth fod yr eiliadau arloesol hyn yn aml yn ymwneud â’r cyfnodau bach o gysylltiad, ond maent yn cynrychioli mwy na hynny: i blant mewn gofal, mae'n golygu eu bod wedi gwneud cynnydd, eu bod wedi dechrau teimlo'n ddiogel, eu bod wedi dechrau gwella, teimlo eu bod yn cael eu caru a’u cefnogi wedi trawma plentyndod.

O ganlyniad i brofiad, cefnogaeth ac arweiniad proffesiynol, dywedodd bron pob gofalwr (93%) eu bod bellach yn hyderus wrth ymateb i ymddygiad sy'n gysylltiedig â thrawma.

Caiff y canfyddiadau hyn eu rhyddhau cyn Pythefnos Gofal Maeth, ymgyrch flynyddol fwyaf y DU sy'n digwydd bob mis Mai i godi ymwybyddiaeth o faethu. Mae thema eleni, 'Dyma yw Maethu', yn amlygu profiadau go iawn gofalwyr maeth a'r rôl hanfodol y maent yn ei chwarae wrth helpu plant i deimlo'n ddiogel.

Mae Rob o Sir Ddinbych yn dweud bod ei benderfyniad i ddod yn ofalwr maeth wedi’i ddylanwadu’n fawr gan ei fagwraeth a’i fywyd teuluol ei hun. Gan dyfu i fyny gyda’i frodyr a’i chwiorydd, gyda’i dad yn chwarae rhan ganolog yn eu gofal o ddydd i ddydd, ac yn ddiweddarach dod yn rhiant i’w blant ei hun, datblygodd Rob y gwerthoedd, yr amynedd a’r ddealltwriaeth a’i arweiniodd i faethu.

Un o’r pethau mwyaf gwerthfawr iddo oedd gweld person ifanc yn ei ofal yn tyfu mewn hyder ac yn dod yn annibynnol.

“Mae gweld nhw’n mynd i’r coleg, yn codi eu hunain yn y boreau, yn dal y bws ac yn cymryd cyfrifoldeb drostyn nhw eu hunain bob dydd wedi rhoi balchder mawr i mi.

Y pethau bach sy’n bwysicaf — yr eiliadau bob dydd hynny sy’n dangos hyder ac annibyniaeth cynyddol — ac maen nhw’n rhoi sicrwydd i mi fy mod i wedi gwneud rhywbeth yn iawn.

Mae fy mhrofiad o faethu wedi bod yn llawn atgofion bythgofiadwy. Mae llawer o’r eiliadau hynny ymhlith y gorau yn fy mywyd, ac mae gwylio plentyn yn tyfu ac yn ffynnu yn rhywbeth sy’n anodd ei roi mewn geiriau — mae’n hynod ystyrlon ac yn hynod werth chweil.”

Dywedodd Rhiain Morrlle, Pennaeth Gwasanaethau Plant Cyngor Sir Ddinbych:

“Rydym yn falch iawn o ofalwyr maeth fel Rob a’u teuluoedd. Mae maethu yn mynd ymhell y tu hwnt i ddarparu cartref diogel a sefydlog — mae’n ymwneud â meithrin ymdeimlad o berthyn a datblygu perthnasoedd cryf, cefnogol sy’n galluogi plant a phobl ifanc i ffynnu.

Mae straeon fel un Rob yn dangos pa mor bwerus y gall yr eiliadau pwysig bob dydd hynny fod — o gamau bach tuag at annibyniaeth i’r hyder sy’n tyfu dros amser.

Mae Wythnos Gofal Maeth yn gyfle i ddathlu’r eiliadau sy’n newid bywydau ac i gydnabod a diolch i’n cymuned faethu ymroddedig yma yn Sir Ddinbych am y gwahaniaeth maen nhw’n ei wneud bob dydd.”

I gael gwybod mwy am ddod yn ofalwr maeth yn Sir Ddinbych, ewch i: sirddinbych.maethucymru.llyw.cymru

Cynlluniau ar gyfer canolfan archif newydd yn symud ymlaen ar gyfer Gogledd Ddwyrain Cymru

Mae cynlluniau ar gyfer canolfan archif newydd o’r radd flaenaf ar gyfer Gogledd Ddwyrain Cymru yn dal i ddatblygu. Mae preswylwyr wedi cael eu gwahodd i fynychu cyfres o sesiynau galw heibio i’r cyhoedd er mwyn cael mwy o wybodaeth am y prosiect uchelgeisiol.

Ym mis Ebrill 2024, cymeradwyodd Cronfa Treftadaeth y Loteri Genedlaethol gyllid cam datblygu i gefnogi cynlluniau ar gyfer canolfan archif bwrpasol newydd ger Theatr Clwyd.

Bydd y ganolfan newydd arfaethedig yn dod â staff a chasgliadau gwasanaethau archif Sir y Fflint a Sir Ddinbych at ei gilydd i greu cartref modern a hygyrch ar gyfer casgliadau hanesyddol cyfoethog y rhanbarth, wrth gefnogi rhaglen gweithgarwch cymunedol tair blynedd eang.

Yn dilyn proses dendro lwyddiannus drwy Fframwaith Adeiladu Gogledd Cymru, penodwyd Wynne Construction yn Gontractwr Dylunio ac Adeiladu ar gyfer y prosiect.

Bydd proses ymgynghori cyn y cam cynllunio ar gyfer y caniatâd cynllunio yn rhedeg o 21 Mai i 18 Mehefin. Os oes gennych ddiddordeb mewn gweld y dogfennau hyn, maen nhw ar gael yn:

• Archif Gogledd Ddwyrain Cymru (Penarlâg), yr Hen Reithordy, Rectory Lane, Penarlâg CH5 3NR; ar agor dydd Llun, dydd Mawrth a dydd Iau (9.30am – 4.30pm); ac
• Archif Gogledd Ddwyrain Cymru (Rhuthun), yr Hen Garchar, 46 Stryd Clwyd, Rhuthun LL15 1HP; ar agor o ddydd Mercher i ddydd Gwener (9.30am – 4.30pm)

Fel rhan o’r cam nesaf hwn, mae preswylwyr yn cael eu hannog i fynychu dau ddigwyddiad ymgynghori cyhoeddus. Bydd y sesiynau yn cynnig cyfle i bobl ddysgu mwy am y cynigion, gofyn cwestiynau a rhannu eu barn.

Bydd y ddau ddigwyddiad ymgynghori cyhoeddus cyn y cam cynllunio yn cael eu cynnal fel a ganlyn:

• Yr Hen Lys Rhuthun: Dydd Iau, 4 Mehefin (3pm – 7pm) (Sgwâr Sant Pedr, Rhuthun LL15 1AA)
• Llyfrgell yr Wyddgrug: Dydd Mercher, 10 Mehefin (12 hanner dydd – 5pm) (14 Canolfan Siopa Daniel Owen, yr Wyddgrug, CH7 1AP)

Ynghyd â datblygiad y cynlluniau adeiladu, mae rhaglen eang o weithgareddau yn cael ei datblygu hefyd er mwyn cyflwyno archifau i gynulleidfa fwy eang ac amrywiol ar draws Gogledd Ddwyrain Cymru. Nod y gweithgareddau yw annog mwy o bobl i archwilio ac ymgysylltu â threftadaeth ddiwylliannol gyfoethog a straeon Gogledd Ddwyrain Cymru.

Meddai’r Cynghorydd Emrys Wynne, Aelod Arweiniol y Gymraeg, Diwylliant a Threftadaeth yng Nghyngor Sir Ddinbych:

“Dyma gyfle cyffrous i greu canolfan archif fodern a fydd yn helpu i gadw a dathlu’r hanes a rennir rhwng ein cymunedau am genedlaethau i ddod.

“Mae’r prosiect yn fwy o lawer nag adeilad – mae’n golygu creu cyfleoedd i fwy o bobl gysylltu â straeon, casgliadau a threftadaeth rhyfeddol Gogledd Ddwyrain Cymru. Byddem yn annog preswylwyr i ddod i’r sesiynau galw heibio a dysgu mwy.”

Meddai’r Cynghorydd Mared Eastwood, Aelod Cabinet Addysg, y Gymraeg, Diwylliant a Hamdden, Cyngor Sir y Fflint:

“Mae’r prosiect hwn yn fuddsoddiad sylweddol yn nhreftadaeth ddiwylliannol y rhanbarth a bydd yn helpu i sicrhau bod ein casgliadau archif pwysig yn cael eu diogelu, eu bod yn hygyrch a’u bod yn cael eu mwynhau gan gynulleidfa fwy eang o lawer.

“Mae wedi bod yn wych gweld cynifer o bobl eisoes yn rhan o helpu i ffurfio’r rhaglen weithgareddau, ac rydym yn edrych ymlaen at barhau â’r ymgysylltiad hwnnw wrth i’r prosiect ddatblygu.”

Dywedodd Andrew White, Cyfarwyddwr Cymru, Cronfa Dreftadaeth y Loteri Genedlaethol:

“Rydym yn falch o fod yn cefnogi cyfnod datblygu parhaus y prosiect cyffrous hwn ac yn edrych ymlaen at ei weld yn datblygu dros y misoedd nesaf. Diolch i chwaraewyr y Loteri Genedlaethol, nod y prosiect yw dod â chymunedau ynghyd i helpu i ddylunio lle croesawgar, hygyrch sy'n amddiffyn ac yn rhannu treftadaeth gyfoethog y rhanbarth ar gyfer cenedlaethau'r dyfodol.”

Mae’r prosiect yn cael ei ariannu gan Gronfa Treftadaeth y Loteri, Cyngor Sir y Fflint, Cyngor Sir Ddinbych a Llywodraeth Cymru.

Os hoffech ddysgu mwy am y gwasanaeth y mae AGDdC yn ei gynnig, neu gael y newyddion diweddaraf am y prosiect Archifau Creadigol, ewch i’n gwefan – https://www.agddc.cymru/

Ymlaen â’r Daith: Agoriad Gorsaf VIBE yn y Rhyl ar gyfer eich cefnogaeth lles a chyflogaeth

Mae Sir Ddinbych yn Gweithio yn barod i agor Gorsaf VIBE y Rhyl y mis hwn, sef gofod cymunedol newydd sydd wedi’i ddylunio i gefnogi pobl i symud ymlaen yn eu bywydau, gan ddechrau gyda’u lles.

Yn agor ar 29 Mai, datblygwyd Gorsaf VIBE fel lle i bobl ymgynnull unrhyw bryd ar eu siwrnai tuag at gyflogaeth. Os yw rhywun yn dymuno gwella eu lles, ail fagu hyder, cysylltu ag eraill, neu ddechrau archwilio cyfleoedd, mae’r gofod yn berffaith ar gyfer cyfarfod â phobl ar eu taith.

Wedi’i leoli ger Gorsaf Rheilffordd y Rhyl, mae Gorsaf VIBE wedi cael ei siapio’n fwriadol fel ‘gorsaf’ lle gall pobl stopio, cael cefnogaeth, ac yna cymryd eu camau nesaf ymlaen. Mae’n cydnabod bod y siwrnai tuag at gyflogaeth, ar gyfer sawl un, yn cychwyn llawer cynt na’r broses o chwilio am swydd, mae’n aml yn cychwyn gyda hyder, sefydlogrwydd a lles. Bydd y gofod yn cynnig cymysgedd o weithgareddau lleol, cyfleoedd hyfforddi, cefnogaeth un i un, a ffyrdd anffurfiol i gysylltu gydag eraill.

Nodwedd allweddol o Orsaf VIBE yw ei rôl fel Safle Integredig Rhithwir ar gyfer Cyflogaeth, gan ddod â gwasanaethau ynghyd mewn un lle i ddarparu cefnogaeth gydlynol, hygyrch i’r gymuned.

Anogir partneriaid a sefydliadau i gymryd mwy o ran, ac ymgysylltu gyda Gorsaf VIBE, boed drwy ddarparu sesiynau, cynnig gwasanaethau, neu gydweithio gydag eraill i gynnig cefnogaeth i bobl leol yn fwy effeithiol. Dyluniwyd y gofod i esblygu, gydag integreiddiad a chydweithio yn greiddiol.

Bydd y digwydd lansio ar 29 Mai yn rhoi cyfle i westeion a’r cyhoedd i archwilio’r gofod, cwrdd â phartneriaid a dysgu mwy am y gefnogaeth sydd ar gael.

Estynnir gwahoddiad i breswylwyr, partneriaid a sefydliadau cymunedol i fynychu’r agoriad cyhoeddus o 1:00pm i 3:30pm a phrofi sut gall Gorsaf VIBE gefnogi pobl i gymryd eu camau nesaf.

Meddai Melanie Evans, Prif Reolwr Cyflogaeth Strategol:

“Nid yw’r siwrnai tuag at gyfleoedd yn rhwydd bob amser, ac i sawl un, mae’n dechrau gyda lles, a theimlo’n barod i gymryd y cam cyntaf hwnnw. Crëwyd Gorsaf VIBE fel lle i bobl ymgynnull ar unrhyw gam, i gael mynediad i’r gefnogaeth gywir, a dechrau symud ymlaen mewn ffordd addas iddynt hwy.

Drwy uno lles, hyfforddiant a chefnogaeth mewn un lle, rydym yn ei gwneud yn haws i bobl gysylltu gyda gwasanaethau, magu hyder, a dangos cynnydd yn ôl eu pwysau eu hunain.

Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd:

“Mae Gorsaf VIBE yn cynrychioli buddsoddiad pwysig mewn pobl a lle. Mae cefnogi unigolion i wella eu lles a chynnydd yn allweddol i feithrin cymunedau cryfach, mwy cadarn

Mae hyn yn adlewyrchu ein hymrwymiad i fynd i’r afael ag anghydraddoldeb a chefnogi twf economaidd hirdymor drwy sicrhau bod cyfleoedd yn hygyrch o fewn ein cymunedau”.

Manylion y Digwyddiad

Lleoliad: Gorsaf VIBE, 40 Stryd Bodfor, y Rhyl LL18 1AT
Dyddiad: 29 Mai 2026
Agoriad Cyhoeddus: 1:00pm – 3:30pm

Mae cefnogaeth un i un Sir Ddinbych yn Gweithio am ddim, ac ar gael i unrhyw un 16+ oed sy’n byw yn Sir Ddinbych sy’n dymuno cymorth i symud ymlaen.

Gall preswylwyr ddysgu mwy ar ein gwefan.  

Mae Sir Ddinbych yn Gweithio wedi’i ariannu’n rhannol gan Lywodraeth y DU a sawl rhaglen arall, gan gynnwys Cymunedau am Waith a Mwy Llywodraeth Cymru, menter Trailblazer Cymru-DU sy’n targedu anweithgarwch economaidd, Cronfa Ffyniant Gyffredin y DU, a Chysylltu â Gwaith.

Sesiynau Pwyntiau Siarad yn cefnogi dros 900 o drigolion mewn blwyddyn

Mae ystadegau diweddar yn dangos bod 923 o breswylwyr Sir Ddinbych wedi derbyn cyngor ac arweiniad drwy’r gwasanaeth Pwyntiau Siarad rhwng mis Ebrill 2025 a mis Mawrth 2026.

Mae Pwyntiau Siarad ym mhob un o Lyfrgelloedd Sir Ddinbych ac maent yn ffordd gyfleus i drigolion Sir Ddinbych ddarganfod pa gymorth a chefnogaeth sydd ar gael iddynt yn eu hardal.

Darperir y gwasanaeth Llywyr Cymunedol gan y Groes Goch Brydeinig mewn partneriaeth â Chyngor Sir Ddinbych a phartneriaid allweddol.

Fe wnaeth y 388 o sesiynau Pwyntiau Siarad a gynhaliwyd yn ystod y cyfnod hwn hefyd gael 100% o adborth cadarnhaol gan y rhai a lenwodd ffurflen ar ôl sesiwn. Dangosai’r ffurflenni adborth hefyd fod 100% o’r rheiny a lenwodd ffurflen wedi dweud eu bod yn gallu siarad yn eu dewis iaith.

Mae’r gefnogaeth mae’r gwasanaeth Pwyntiau Siarad yn ei chynnig drwy Lywyr Cymunedol y Groes Goch Brydeinig yn eang, a gall amrywio o ddarparu cyngor yn unig, i atgyfeirio i gael rhagor o gymorth perthnasol a chefnogaeth a chymorth â thai.

Dyma leoliadau ac amseroedd Pwyntiau Siarad ar hyn o bryd:

Pob dydd Llun (heblaw gwyliau banc) – Llyfrgell Llanelwy, 10:00am–12:30pm

Pob dydd Mawrth – Llyfrgell y Rhyl a Llyfrgell Rhuthun, 10:00am–12:30pm

Pob dydd Mercher – Llyfrgell Dinbych a Llyfrgell Corwen, 10:00am–12:30pm

Pob dydd Iau – Llyfrgell Llangollen, 10:00am–12:30pm

Pob dydd Gwener (heblaw gwyliau banc) – Llyfrgell Prestatyn a Llyfrgell Rhuddlan, 10:00am–12:30pm

Dywedodd Ann Lloyd, Pennaeth Gofal Cymdeithasol i Oedolion a Digartrefedd:

“Mae Pwyntiau Siarad yn darparu gwasanaeth gwerthfawr yn ein cymunedau, gan roi’r dewis i breswylwyr gael sgwrs wyneb yn wyneb, sy’n canolbwyntio ar yr unigolyn, ynglŷn â’r hyn sy’n bwysig iddynt.

Gall yr ystod eang o gefnogaeth a gynigir gan Bwyntiau Siarad ddarparu cyfleoedd hanfodol i gyfeirio pobl a rhoi cyngor iddynt, a lleihau’r straen ar wasanaethau eraill yn y pen draw. Mae Pwyntiau Siarad yn darparu adnodd cefnogi dibynadwy, hawdd ei gael, i breswylwyr yn eu cymuned.”

Adeiladu cefnogaeth ar gyfer Wythnos Blodau Gwyllt

Mae disgyblion cynradd Sir Ddinbych wedi dod at ei gilydd i helpu i feithrin cefnogaeth ar gyfer ymgyrch flynyddol sydd â’r nod o amlygu pwysigrwydd ein dolydd.

Cafodd disgyblion o Ysgol y Faenol ac Ysgol Llanfair DC sesiynau addysg arbennig gan dîm Bioamrywiaeth y Cyngor ar gynefinoedd blodau gwyllt newydd a grëwyd yn ddiweddar yn y ddwy ysgol.

Cynhaliwyd y sesiynau gyda’r plant i ddathlu bod Wythnos Blodau Gwyllt flynyddol Sir Ddinbych yn dychwelyd yn ystod hanner tymor mis Mai.

Bu’r disgyblion yn cymryd rhan mewn gweithgareddau gan gynnwys gêm peillio, gweithgaredd gwe fwyd, helfa pryfaid a buont yn mwynhau dod o hyd i blanhigion ar eu safle i lenwi taflenni bingo blodau gwyllt.

Meddai Ellie Wainwright, swyddog bioamrywiaeth:  “Roedd yn hyfryd gweld pa mor frwdfrydig oedd y plant yn y ddwy ysgol am y safleoedd yr oeddem wedi eu helpu i’w creu yn ddiweddar. Mae mor bwysig iddynt ryngweithio â byd natur a dysgu amdano, er budd eu hiechyd ac iechyd y blaned yn y dyfodol, ac mae eu helpu i ddysgu yn ffordd wych o ddechrau ein digwyddiadau ar gyfer Wythnos Blodau Gwyllt Sir Ddinbych.”

Dywedodd y Cynghorydd Barry Mellor, Aelod Arweiniol yr Amgylchedd a Chludiant:  “Mae’r plant yn y ddwy ysgol wedi gweithio’n galed iawn i helpu natur ar eu safleoedd trwy blannu coed a blodau gwyllt gyda’n swyddogion yn ddiweddar. Mae’n addas felly y dylent ein helpu i ddechrau dathlu pa mor bwysig yw cynefinoedd dolydd ar gyfer natur a chymunedau lleol.”

Edrychwch ar gyfryngau cymdeithasol y Cyngor am yr amserlenni a’r wybodaeth ddiweddaraf am Wythnos Blodau Gwyllt..

Os oes gennych ddiddordeb mewn dod i unrhyw un o'r digwyddiadau, cliciwch ar y ddolen hon i archebu eich lle.

I gael rhagor o wybodaeth, anfonwch e-bost at biodiversity@denbighshire.gov.uk

Penodi contractwr i ailwampio Ysgol Pendref

Mae’r contractwr ar gyfer prosiect ailwampio Ysgol Pendref bellach wedi’i benodi. Bydd y gwaith yn cael ei wneud gan Wynne Construction dan gontract dwy ran ar gyfer y gwaith dylunio a’r gwaith adeiladu.

Ysgol Pendref

Gyda Llywodraeth Cymru wedi cymeradwyo’r Achos Strategol Amlinellol a Chabinet Cyngor Sir Ddinbych hefyd wedi cymeradwyo popeth sydd ei angen, bydd y cam dylunio bellach yn cychwyn – a fydd yn hysbysu edrychiad cyffredinol y gwaith ailwampio.

Sefydlwyd Ysgol Pendref yn 2012 ar ôl uno dwy ysgol gyfagos. Ers 2012 mae’r ysgol wedi bod yn defnyddio dau adeilad gwahanol ar un safle, ond nod y prosiect yma yw cyfuno’r holl ddysgu ac addysgu i un adeilad.

Yn ystod haf 2025 penodwyd Asiant Dylunio ac Adeiladu i gefnogi datblygiad prosiect Ysgol Pendref ac i reoli’r gwaith o gaffael contractwr i arwain y camau dylunio ac adeiladu i estyn ac ailwampio’r safle. Rhoddodd y Cabinet gymeradwyaeth i symud ymlaen i’r broses gaffael ym mis Medi 2025.

Cyfanswm y swm a gytunwyd i gael ei ddyrannu i’r prosiect yw £11.74 miliwn.

Meddai Geraint Davies, Pennaeth Gwasanaeth Addysg Cyngor Sir Ddinbych:

“Bydd y prosiect yma’n dod â buddsoddiad sylweddol i Ddinbych uchaf, gan gefnogi teuluoedd a phlant y gymuned. 

Mae’r cam nesaf yn gam yn nes at gael adeilad a chyfleusterau addysg o’r radd flaenaf ar gyfer disgyblion Ysgol Pendref.”

Meddai Nicola Griffiths, Pennaeth Ysgol Pendref:

“Mae’r cam nesaf hwn yn y prosiect yn gam nes at ddod ag adeilad a chyfleusterau addysg newydd o ansawdd uchel i ddisgyblion Ysgol Pendref.

Rwy’n edrych ymlaen at weld y dyluniadau’n cael eu datblygu ymhellach ar gyfer y prosiect.”

Pobl ifanc a theuluoedd yn cael eu gwahodd i ddiwrnod cymunedol am ddim

Mae teuluoedd a phobl ifanc yng Nghorwen yn cael eu gwahodd i fwynhau diwrnod cymunedol am ddim yn ystod hanner tymor mis Mai, gan ddod â sefydliadau lleol, clybiau chwaraeon a grwpiau cymunedol ynghyd am ddiwrnod llawn hwyl o weithgareddau a chefnogaeth.

Bydd y digwyddiad yn digwydd:

• Ddydd Gwener, 29 Mai
• 10am – 3pm
• Pafiliwn Chwaraeon Corwen, Lôn Las LL21 0DN

ac mae wedi'i gynllunio mewn partneriaeth â Theuluoedd yn Gyntaf, Dechrau'n Deg, Ceidwaid Chwarae Sir Ddinbych, Partneriaeth Gymunedol De Sir Ddinbych, Hamdden Sir Ddinbych Cyfyngedig a Chyngor Tref Corwen.

Bydd ystod eang o weithgareddau am ddim ar gael drwy gydol y dydd, gan gynnwys sesiynau tenis, pêl-droed, criced a bowlio a gyflwynir gan glybiau lleol. Bydd Little Learning Company hefyd yn cynnal gweithgareddau celf a chrefft, tra bydd Drosi Bikes yn cynnig sesiynau cynnal a chadw beiciau. Darperir bwyd a diodydd iach gan Teuluoedd yn Gyntaf.

Nod y digwyddiad yw dod â theuluoedd ynghyd, annog pobl ifanc i gymryd rhan mewn cyfleoedd yn eu cymuned leol, a helpu trigolion i ddarganfod mwy am y gwasanaethau a'r gefnogaeth sydd ar gael yn yr ardal.

Bydd gweithgareddau i deuluoedd a phlant iau yn rhedeg drwy gydol y bore a dechrau'r prynhawn. O 1pm – 3pm, bydd y ffocws yn troi at bobl ifanc 11+ oed, gan roi cyfle iddynt gwrdd â gweithwyr ieuenctid lleol, dysgu mwy am eu clwb ieuenctid lleol a darganfod y gweithgareddau a'r gefnogaeth sydd ar gael iddynt.

Dywedodd y Cynghorydd Diane King, Aelod Arweiniol Cyngor Sir Dinbych dros Addysg, Plant a Theuluoedd:

“Rydym yn falch iawn o fod yn cefnogi'r digwyddiad cymunedol gwych hwn yng Nghorwen yn ystod gwyliau hanner tymor.

“Mae hwn yn gyfle gwych i deuluoedd a phobl ifanc ddod at ei gilydd, rhoi cynnig ar weithgareddau newydd, cwrdd â sefydliadau lleol a darganfod mwy am y gefnogaeth a'r cyfleoedd sydd ar gael yn eu cymuned.

“Byddwn yn annog unrhyw un yn yr ardal i ddod draw a mwynhau'r hyn sy'n addo bod yn ddiwrnod hwyliog, croesawgar a diddorol i bob oed.”

Os hoffech chi wybod mwy am ein Gwasanaethau Ieuenctid a'r hyn y gallant ei ddarparu i'n pobl ifanc, ewch i'n gwefan.

Estyn dosbarthiadau ysgol yn Rhuddlan

Mae estyniadau cyntaf Ysgol y Castell, Rhuddlan wedi’u cwblhau ar amser.

Un o'r estyniadau. 

Roedd cam cyntaf y gwaith adeiladu yn cynnwys codi estyniad ar ddwy ystafell ddosbarth, sydd bellach yn cael eu defnyddio gan y disgyblion.

Mae gwaith bellach yn cael ei wneud i glirio’r ddwy ystafell ddosbarth nesaf, yn barod i godi estyniad arnynt.

Bydd yr estyniadau’n darparu 16 metr sgwâr o ofod ychwanegol i bedair ystafell ddosbarth, gan greu estyniad 64 metr sgwâr at ddefnydd disgyblion yn ogystal â chyfleusterau dysgu newydd yn cael eu hychwanegu ar yr un pryd.

Bydd y gwelliannau i’r tu allan, fel mynediad i’r lle chwarae, rendro’r pedair ystafell ddosbarth a gosod paneli solar, a’r gwaith i ailwampio’r neuadd wedi’u cwblhau erbyn gaeaf 2026.

Mae’r gwaith adeiladu yn cael ei wneud gan BrynBuild Ltd.

Mae 35% o’r cyllid ar gyfer y gwaith wedi dod yn bennaf o gyfraniad drwy ddatblygiad tai Tirionfa yn Rhuddlan, gyda chyllid cyfatebol o 65% gan Lywodraeth Cymru drwy’r Rhaglen Cymunedau Dysgu Cynaliadwy.

Ystafell wedi'w gorffen.

Meddai Geraint Davies, Pennaeth Gwasanaeth Addysg Cyngor Sir Ddinbych:

“Dw i’n falch iawn o weld bod cam cyntaf y prosiect wedi’i orffen, a bod y ddwy ystafell ddosbarth bellach yn cael eu defnyddio gan y disgyblion.

Dyma gynllun hir-ddisgwyliedig, sydd wedi darparu cyfleusterau newydd a gofod ychwanegol hollbwysig sydd wir eu hangen ar yr ysgol.”

Meddai Pennaeth Ysgol y Castell, Sara Tate:

“Rydym ni wrth ein bodd bod cam cyntaf y gwaith o estyn yr ystafelloedd dosbarth wedi’i gwblhau. Mae’r gofod ychwanegol a’r dyluniad modern wedi creu ardaloedd dysgu mwy lliwgar a chroesawgar sydd eisoes yn gwella profiadau addysgu a dysgu dyddiol y disgyblion a’r staff.

Rydym ni’n edrych ymlaen at weld yr ysgol yn cael ei thrawsnewid ymhellach, a sicrhau’r cyfleoedd gorau posibl i holl ddisgyblion Ysgol y Castell.”

Gwasanaeth arlwyo yn cael ei gydnabod am ddarparu bwydlenni ysgol

Mae Gwasanaeth Arlwyo Sir Ddinbych wedi ennill Tystysgrif Cydymffurfiaeth gan Gymdeithas Llywodraeth Leol Cymru (CLlLC) am eu bwydlen cinio ysgol newydd sy’n rhedeg fesul tair wythnos ac a ddechreuodd ar ôl gwyliau’r Pasg.

Mae’r gwasanaeth yn sicrhau bod pob bwydlen yn gytbwys, wedi’u dadansoddi a’u cymeradwyo yn unol â Rheoliadau Bwyta'n Iach mewn Ysgolion (Gofynion a Safonau Maeth) (Cymru) 2013.

Er mwyn paratoi ar gyfer Rheoliadau wedi’u diweddaru gan Lywodraeth Cymru a ddaw i rym ar 31 Hydref 2026, mae’r gwasanaeth yn mynd ati i gyflwyno sawl newid iach.

Mae’r rhain yn cynnwys:

• Newid y fwydlen i gynnwys amrywiaeth eang o brydau cartref.
• Lleihau nifer y diwrnodau pan fo pwdin ar gael, o bum diwrnod i ddeuddydd, gyda dewisiadau sy’n cynnwys ffrwythau.
• Cynnig darnau ffrwyth a Iogwrt lleol Llaeth y Llan ar y tri diwrnod arall.
• Darparu bara 50/50 ar gyfer brechdanau.

Cafodd y Gwasanaeth Arlwyo Ysgolion ei gydnabod yn ddiweddar fel y gwasanaeth arlwyo sy’n perfformio orau yng ngwobrau Cymdeithas Rhagoriaeth y Gwasanaethau Cyhoeddus yn gynharach eleni.

Mae’r gydnabyddiaeth hon gan Gymdeithas Rhagoriaeth y Gwasanaethau Cyhoeddus wedi’i seilio ar gymariaethau â gwasanaethau prydau ysgol eraill o bob cwr o’r DU. Mae’n ystyried agweddau fel nifer y plant sy’n talu am brydau ysgol a’r nifer sy’n eu cael am ddim, hyfforddiant staff, perfformiad y gwasanaeth a rheolaeth y gwasanaeth.

Meddai’r Cynghorydd Diane King, Aelod Arweiniol Addysg, Plant a Theuluoedd:  “Rydym yn ddiolchgar i’n staff arlwyo am gyflawni’r gydnabyddiaeth hon trwy eu gwaith parhaus i ddarparu bwydlen well a mwy iach i gefnogi disgyblion ein sir trwy gydol eu haddysg bob dydd.

“Mae’r gwasanaeth arlwyo yn dal i fod yn ymrwymedig i ddarparu gwerth am arian o ran ansawdd y bwyd a ddarperir i ddisgyblion yn ein hysgolion.”

Mae gan holl ddisgyblion ysgolion Cynradd Sir Ddinbych hawl i brydau ysgol am ddim ac fe anogir rhieni, yn benodol y rhai sy’n cael budd-daliadau penodol, i wneud cais swyddogol am Brydau Ysgol am Ddim, oherwydd mae’r cais hwn hefyd yn cynnig mynediad i’r Grant Hanfodion Ysgol.

I gael rhagor o wybodaeth, gall rhieni weld y bwydlenni cynradd newydd ar wefan Prydau Ysgol Sir Ddinbych.

Mae llyfrgelloedd yn taflu goleuni ar gymorth dementia yn ystod Wythnos Gweithredu ar Ddementia

Mae Llyfrgelloedd Sir Ddinbych yn helpu i godi ymwybyddiaeth o ddementia a’r cymorth sydd ar gael yn ystod Wythnos Gweithredu ar Ddementia 2026, a gynhelir rhwng 18–24 Mai.

Eleni, mae’r gwasanaeth llyfrgelloedd wedi bod yn gweithio ochr yn ochr â Making Sense i hyrwyddo casgliad unigryw o flychau atgofion, sydd ar gael i’w benthyca’n rhad ac am ddim o lyfrgelloedd lleol.

Mae’r blychau atgofion thematig yn cynnwys gwrthrychau trin ac eitemau cyfarwydd o wahanol ddegawdau, wedi’u cynllunio i sbarduno sgyrsiau, datgloi atgofion ac annog hel atgofion. O daith hiraethus i’r sinema gyda blwch sinema’r 1950au a’i hambwrdd swyddoges draddodiadol, i atgofion am ddyddiau ysgol, gwyliau glan môr, siediau, prosiectau DIY a gweithleoedd y gorffennol, mae’r casgliadau’n cynnig cyfleoedd ystyrlon ar gyfer cysylltu a sgwrsio.

Blychau atgofion

Mae’r blychau atgofion yn ddelfrydol i’w defnyddio mewn cartrefi gofal, grwpiau cymunedol a sesiynau hel atgofion, tra bod llyfrgelloedd hefyd yn cynnig bagiau atgofion llai ar gyfer defnydd un-i-un, ynghyd â jig-sos sydd wedi’u cynllunio i gefnogi ymlacio ac ysgogiad meddyliol.

Mae Llyfrgelloedd Sir Ddinbych hefyd yn darparu mynediad at gasgliad Darllen yn Well ar gyfer Dementia, sy’n argymell llyfrau ac adnoddau digidol ar gyfer pobl sy’n byw gyda dementia, yn ogystal â gwybodaeth a chymorth i deuluoedd, ffrindiau a gofalwyr. Mae’r casgliad yn cynnwys straeon personol, cyngor ymarferol a llyfrau addas i blant.

Blychau sinema

Mae trigolion yn cael eu hannog i fynychu digwyddiad arbennig yn Llyfrgell Llanelwy ddydd Llun 18 Mai am 2.30pm, lle bydd Making Sense yn lansio fideo hyrwyddo newydd yn swyddogol sy’n arddangos prosiect y blychau atgofion.

Bydd ymwelwyr yn cael cyfle i fwynhau lluniaeth, archwilio’r casgliadau a darganfod mwy am y cymorth a’r adnoddau sydd ar gael yn lleol i bobl sy’n byw gyda dementia a’r rhai sy’n gofalu amdanynt.

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth:

“Mae dementia yn effeithio ar lawer o deuluoedd a chymunedau ledled Sir Ddinbych, ac mae’n bwysig bod pobl yn gwybod bod help a chymorth ar gael. Mae’r Blychau Atgofion gwych hyn yn cynnig ffordd syml ond bwerus o sbarduno atgofion, annog sgyrsiau a chefnogi lles.

“Byddwn yn annog unrhyw un sydd â diddordeb i ddod i’r digwyddiad am yn Llyfrgell Llanelwy ar 18 Mai i ddarganfod yr adnoddau sydd ar gael a dysgu mwy am y gwaith partneriaeth gwych sy’n digwydd ledled y sir.”

Dywedodd y Cynghorydd Elen Heaton, Aelod Arweiniol dros Iechyd a Gofal Cymdeithasol:

“Gall byw gyda dementia gyflwyno heriau dyddiol nid yn unig i unigolion, ond hefyd i deuluoedd, ffrindiau a gofalwyr. Mae mentrau fel y blychau atgofion yn darparu cysur, cysylltiad a chyfleoedd ar gyfer rhyngweithio ystyrlon, gan helpu pobl i deimlo eu bod yn cael eu gwerthfawrogi a’u cefnogi.

“Mae’n wych gweld sefydliadau ledled Sir Ddinbych yn gweithio gyda’i gilydd i godi ymwybyddiaeth a chreu cymunedau sy’n gyfeillgar i ddementia. Mae’r gefnogaeth sydd ar gael trwy ein llyfrgelloedd yn cynnig llinell fywyd bwysig, a byddwn yn annog trigolion i archwilio’r adnoddau a’r cyngor sydd ar gael yn ystod Wythnos Gweithredu Dementia.”

Mae casgliadau’r blychau atgofion a’r fideo hyrwyddo wedi’u datblygu gan Making Sense mewn partneriaeth â chartrefi gofal a llyfrgelloedd lleol, gyda chymorth ariannol gan raglen Grantiau Ymwybyddiaeth Dementia DVSC.

Gwirfoddolwyr yn adnewyddu arwyddion mewn gwarchodfa natur boblogaidd yn y Rhyl

Mae tîm cefn gwlad Cyngor Sir Ddinbych ochr yn ochr â gwirfoddolwyr wedi bod yn gweithio'n galed i adnewyddu arwyddion yng ngwarchodfa natur pyllau Brickfield.

Roedden nhw’n gweithio ochr yn ochr â Natur er budd Iechyd i wella'r arwyddion dehongli yn y warchodfa a oedd yn arfer bod mewn cyflwr gwael.

Mae Natur er Budd Iechyd yn brosiect ar y cyd sy’n ymgysylltu ag unigolion a chymunedau i hyrwyddo sut y gall byd natur wella iechyd a lles.

Mae’r rhaglen yn croesawu pobl o bob gallu i gyfrannu at gadwraeth a chymryd rhan mewn amrywiaeth o weithgareddau.

Cefnogwyd Gwarchodfa Natur Brickfield gan y Rhaglen Natur er budd Iechyd a ariannwyd gan Gronfa Ffyniant Gyffredin Llywodraeth y DU.

Trefnwyd sesiynau fframio yn The Willow Collective i adeiladu'r ffrâm bren a'r coesau ar gyfer map wedi'i adnewyddu o Bwll Brickfields.

Gwnaeth gwirfoddolwyr hefyd lyfnhau a phaentio'r arwyddion yn y gweithdy yn y warchodfa natur cyn eu gosod yn ôl ar y safle.

Dywedodd Emlyn Jones, Pennaeth Cynllunio, Gwarchod y Cyhoedd a Gwasanaethau Cefn Gwlad:

“Hoffwn ddiolch i’n tîm cefn gwlad a’r gwirfoddolwyr am eu gwaith caled wrth ailosod yr arwyddion yng ngwarchodfa natur pyllau Brickfields.

“Mae pyllau Brickfields yn warchodfa natur boblogaidd yn y sir ac mae’r gwirfoddolwyr a’r staff wedi gwneud gwahaniaeth cadarnhaol go iawn i’r gymuned sy’n ymweld â’r safle.”

Pob tocyn wedi’i werthu ar gyfer cyngerdd llwyddiannus yn Nantclwyd

Roedd tŷ hanesyddol Nantclwyd y Dre yn llawn dop yn ddiweddar ar gyfer prynhawn cofiadwy o gerddoriaeth wrth i’r pianydd byd enwog Janusz Piotrowicz roi datganiad yn amgylchedd agos y safle treftadaeth gwerthfawr, ac roedd pob tocyn wedi’i werthu.

Roedd y perfformiad arbennig, a gynhaliwyd yn ddiweddar, yn llwyddiant ysgubol, pan gafodd y gynulleidfa wledd gyda rhaglen eithriadol o ddarnau, yn awyrgylch unigryw’r tŷ sy’n llawn o bron i 600 mlynedd o hanes. 

Yn cael ei ddathlu fel “Bardd Meistrolgar y Piano”, swynodd Janusz Piotrowicz ei westeion gyda’i ddyfnder llawn mynegiant a’i feistrolaeth dechnegol anhygoel drwy gydol rhaglen oedd yn cynnwys gwaith gan Liszt, Scarlatti, Chopin, Tchaikovsky a Rachmaninov.

Roedd y datganiad yn ddigwyddiad pwysig i Nantclwyd y Dre, gan ddangos potensial anferthol y tŷ fel lleoliad ar gyfer digwyddiadau diwylliannol a pherfformiadau.

Dywedodd Kate Thomson, Rheolwr Safle Nantclwyd y Dre:

“Rydym wedi gwirioni ein bod wedi gallu cynnal datganiad Mr Piotrowicz. Roedd y gynulleidfa’n canmol ei berfformiad i’r entrychion ac rydym yn gobeithio mai dyma fydd y sbardun i gynnal llawer o ddigwyddiadau tebyg fydd yn cynnig profiadau newydd yn Nantclwyd y Dre gan gynnal ei hen draddodiad fel lle creadigol.”

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth:

“Hoffem ddiolch i bawb a ddaeth i gefnogi’r datganiad, yn ogystal â’r sefydliad Tai Hanesyddol a sicrhaodd bod y perfformiad hwn yn bosibl.

“Mae Nantclwyd y Dre yn sefydliad sydd â gwerth hanesyddol sylweddol, ac mae’n bwysig ein bod yn cofio ac yn dathlu’r hanes sydd ar garreg ein drws. Mae’r perfformiadau hyn yn ffordd arall o fwynhau’r tŷ, ac rydym yn gobeithio y gallwn gynnal digwyddiadau tebyg yn y dyfodol.”

Mae Nantclwyd y Dre ar agor i ymwelwyr archwilio ei hanes hynod a’r gerddi hardd rhwng 10.30am - 4.30pm (mynediad olaf am 3.30pm) bob dydd Iau, dydd Gwener a dydd Sadwrn o fis Ebrill i fis Medi (codir tâl mynediad). Mae’r tŷ hanesyddol hefyd yn cynnig opsiynau llogi cyffredinol drwy’r flwyddyn ac mae’n barod i weithio gydag artistiaid a pherfformwyr i ddarparu digwyddiadau ar y cyd yn y dyfodol. 

Am fwy o wybodaeth am ymweld neu ddigwyddiadau yn y dyfodol, cysylltwch â Gwasanaeth Treftadaeth Sir Ddinbych drwy anfon e-bost at treftadaeth@sirddinbych.gov.uk  

Cyngor yn ymgynghori ar system barcio newydd a newidiadau i drefn ffyrdd Llangollen

Mae Cyngor Sir Ddinbych yn ymgynghori ar Orchymyn Rheoleiddio Traffig i gyflwyno parcio ‘arhosiad byr iawn’ newydd a newidiadau eraill i drefn ffyrdd yng nghanol tref Llangollen.

Mae Gorchmynion Rheoleiddio Traffig yn ddogfennau cyfreithiol sydd eu hangen i wneud newidiadau i gyfyngiadau ar draffig a pharcio, fel llinellau melyn dwbl a strydoedd unffordd.

Mae'r Cyngor yn cynnig y newidiadau canlynol i ganol tref Llangollen:

• Heol y Farchnad: Cael gwared ar y ddau ofod parcio agosaf ar y gyffordd â Heol y Castell. Gosod gofod parcio yn lle un o’r gofodau yn y safle tacsis. Bydd y gofod parcio hwn am ddim. Rhwng 9am a 5pm, ni fydd modd aros mwy nag awr yn y gofod parcio ac ni chaniateir dychwelyd iddo cyn pen 2 awr.
• Hill Street (y tu allan i Rani's Kitchen): Cyflwyno man parcio newydd, arhosiad byr a orfodir yn gyfreithiol er mwyn caniatáu i bobl “bicio i’r siop”.  Bydd y gofod parcio hwn am ddim. Rhwng 9am a 5pm, ni fydd modd aros mwy nag awr yn y gofodau parcio ac ni chaniateir dychwelyd i’r un gofod cyn pen 2 awr.
• Willow Street: Cyflwyno llinellau melyn dwbl i ochr chwith y ffordd ar hyd y ffordd gyfan. Cyflwyno llinellau melyn dwbl ychwanegol ar ran fach o ochr dde’r ffordd y tu allan i’r clwb ieuenctid.

Bydd y parcio newydd ‘arhosiad byr iawn’ am ddim, yn unol â mannau parcio tebyg eraill yng nghanol y dref.  Fodd bynnag, byddant yn cael eu gorfodi gan Swyddogion Gorfodi Sifil rhwng 9am a 5pm i sicrhau eu bod yn cael eu defnyddio’n gywir.

Mae Cyngor Sir Ddinbych yn gobeithio trwy gyflwyno’r newidiadau arfaethedig yn Heol y Farchnad, Sgwâr y Neuadd a Willow Street y bydd yn gwella llif y traffig a chynnal mynediad i gerddwyr trwy ostwng parcio anystyriol yn y mannau hyn.

Dywedodd y Cynghorydd Barry Mellor, Aelod Arweiniol yr Amgylchedd a Chludiant:

“Mae Llangollen yn dref o bwys hanesyddol yn ne Sir Ddinbych. Yn ogystal â bod yn boblogaidd â thwristiaid ac ymwelwyr dydd, mae Llangollen yn dref ‘canolbwynt’ sy’n gwasanaethu rhwydwaith mawr o bentrefi a chymunedau gwledig eraill yn yr ardal.  Gyda’r newidiadau hyn, rydym yn gobeithio y bydd canol y dref yn fwy diogel ac yn fwy hygyrch i ymwelwyr sy’n ymweld ar droed neu mewn car.

“Mae hi hefyd yn bwysig nodi, gyda’r newidiadau arfaethedig hyn, na fydd unrhyw golled net i barcio yng nghanol y dref ac ni fydd unrhyw effaith ar fannau bathodyn anabledd (bathodyn glas) wedi’u marcio.  Ni fydd unrhyw effaith ar safleoedd bysiau na’u lleoliadau o ganlyniad i’r newidiadau arfaethedig hyn.”

Am fwy o wybodaeth ar y newidiadau arfaethedig:

• Darllenwch yr ymgynghoriad ar-lein trwy fynd i https://www.denbighshire.gov.uk/cy/eich-cyngor/ymgynghoriadau/ymgynghoriadau.aspx
• Bydd copïau o’r cynigion ar gael i’w gweld yn Llyfrgell Llangollen yn ystod oriau agor arferol rhwng 27 Mai a 17 Mehefin 2026

Y dyddiad cau ar gyfer cael adborth yw dydd Mercher 17 Mehefin 2026.

Ethol Cadeirydd ac Is-gadeirydd newydd y Cyngor

Cadeirydd newydd Cyng Bobby Feeley a'r Is-gadeirydd Cyng Peter Scott

Mae’r Cyngor wedi ethol Cadeirydd ac Is-gadeirydd newydd ar gyfer tymor 2026/27.

Yn ystod Cyfarfod Flynyddol y Cyngor Sir, a gynhaliwyd yn Neuadd y Sir, Rhuthun, etholwyd y Cynghorydd Bobby Feeley yn Gadeirydd a'r Cynghorydd Peter Scott yn Is-gadeirydd yr awdurdod ar gyfer y flwyddyn ddinesig nesaf.

Fel Cadeirydd newydd y Cyngor, llongyfarchodd y Cynghorydd Bobby Feeley y cyn-gadeirydd, y Cynghorydd Arwel Roberts, ar y swm sylweddol yr oedd wedi’i godi ar gyfer ei elusennau dewisol, a dymunodd y gorau iddo ar gyfer y dyfodol.

Wrth fyfyrio ar ei gyfnod fel cadeirydd, dywedodd y Cynghorydd Arwel Roberts:

“Mae wedi bod yn bleser mawr bod yn Gadeirydd Cyngor Sir Ddinbych ar gyfer y flwyddyn 2025/26.

“Rwy’n hynod falch bod swm sylweddol wedi’i godi ar gyfer y ddau achos da, a hoffwn ddiolch i’r cynghorwyr am gefnogi’r digwyddiadau a drefnwyd i godi’r arian.

“Ni all unrhyw gadeirydd blesio pawb, ond rwyf wedi ceisio dilyn esiampl nifer o gadeiryddion yn y gorffennol a gwneud fy ngorau drwy ddilyn arwyddair y sir sef ‘Unwn i wneud da’.”

Yn ystod ei gyfnod yn y swydd, cododd y Cynghorydd Arwel Roberts £6,000 ar gyfer ei elusennau dewisol sef Cronfa i Bawb a Sant Cyndeyrn.

Yn ystod y cyfarfod, diolchwyd i'r Cynghorydd Arwel Roberts am ei wasanaeth fel Cadeirydd.

Gan mai dyma oedd cyfarfod llawn cyntaf y cyngor ers marwolaeth y Cynghorydd Jeanette Chamberlain-Jones, talwyd teyrngedau gan arweinwyr y Grwpiau Gwleidyddol a chafodd pawb a oedd yn bresennol yn Siambr y Cyngor gyfnod o fyfyrdod tawel er cof am y Cynghorydd Jeanette Chamberlain-Jones a diolch am ei gwasanaeth nodedig.

Cadeirydd newydd Cyng Bobby Feeley, gyda'r cyn-gadeirydd Cyng Arwel Roberts

Cyflogwyr Sir Ddinbych yn cael eu gwahodd i gymryd rhan mewn cynllun peilot newydd i gyflogwyr cynhwysol

Mae yna gyfle i gyflogwyr ledled Sir Ddinbych i gymryd rhan mewn menter newydd sydd wedi’i ariannu’n llawn, wedi’i ddylunio i helpu busnesau i ddenu, recriwtio a chadw ystod fwy eang o dalent.

Mae Sir Ddinbych yn Gweithio bellach wedi lansio ei Gynllun Peilot ‘Trailblazer’ i Gyflogwyr, sy’n cael ei ariannu gan Lywodraeth Cymru i gefnogi busnesau lleol i greu gweithleoedd mwy cynhwysol a chynaliadwy.  Prif nod y gefnogaeth yma i gyflogwyr yw helpu i leihau anweithgarwch economaidd yn Sir Ddinbych.

Mae’r cynllun Peilot yn gyfle ymarferol i nifer fechan o gyflogwyr gael cefnogaeth wedi’i theilwra gan arbenigwr hurio proffesiynol. Y nod yw helpu busnesau i gryfhau eu harferion recriwtio a sefydlu gweithwyr newydd tra’n creu cyfleoedd sydd yn fwy hygyrch i unigolion allai fod yn wynebu rhwystrau i gyflogaeth, yn cynnwys pobl sydd ag anableddau, cyflyrau iechyd neu gyfrifoldebau gofalu.

Fe ddaw’r fenter newydd ar adeg pan mae nifer o gyflogwyr yn wynebu heriau parhaus o ran denu a chadw’r bobl gywir. Trwy fabwysiadu dulliau cynhwysol, gall busnesau gael mynediad at garfan ehangach o dalent sy’n aml yn cael eu tanddefnyddio, gwella graddfeydd cadw staff, a lleihau costau recriwtio.

Bydd cyflogwyr sy’n cymryd rhan yn: 

• Derbyn canllaw ymarferol ar recriwtio a dewis cynhwysol
• Cefnogaeth ac adnoddau wedi’u teilwra i ddenu a hurio ystod fwy amrywiol o ymgeiswyr
• Cyngor ar gefnogi gweithwyr sydd ag anghenion ychwanegol
• Adnoddau y gellir eu defnyddio mewn gweithrediadau o ddydd i ddydd
• Cydnabyddiaeth fel Cyflogwr Cynhwysol Sir Ddinbych yn Gweithio ardystiedig

Yn ogystal â chefnogi busnesau unigol, nod y rhaglen yw cryfhau’r economi leol drwy helpu mwy o breswylwyr mewn i gyflogaeth gynaliadwy.

Sir Ddinbych oedd un o dri Awdurdod Lleol a ddewiswyd i gymryd rhan yn rhaglen ehangach ‘Trailblazer’ Llywodraeth Cymru, sy’n canolbwyntio ar fynd i’r afael ag anweithgarwch economaidd a phrofi dulliau newydd ac arloesol o gynhwysiant yn y gweithle.

Meddai Rheolwr Gwasanaeth Cyflogaeth Strategol, Melanie Evans, yn Sir Ddinbych yn Gweithio, sy’n rhan o Gyngor Sir Ddinbych: 

“Mae’r cynllun peilot yn ymwneud â mwy na recriwtio, mae’n ymwneud â chreu economi leol gryfach, tecach. Trwy gefnogi cyflogwyr i fod yn fwy cynhwysol, gallwn helpu i godi safonau byw, gwella iechyd a lles, lleihau tlodi plant, a chreu cyfleoedd y gall pawb yn Sir Ddinbych elwa ohonynt. Dyma gyfle gwirioneddol i fusnesau lleol fod yn rhan o newid ystyrlon, hirdymor.”

Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd:

“Rydym ni’n helpu busnesau Sir Ddinbych i benodi pobl leol sydd wedi cael eu dal yn ôl oherwydd anabledd, problemau iechyd, neu ddyletswyddau gofal.  Mae pawb ar eu hennill - mae cyflogwyr yn llenwi swyddi gyda phobl ysbrydoledig, ac mae preswylwyr yn cael y gefnogaeth a chyfleoedd sydd ei angen arnynt i lwyddo yn y gwaith.”

Bydd cyfanswm o 20 cyflogwr yn cael eu cefnogi drwy’r cynllun peilot ac mae’r garfan gyntaf wedi’i gyfyngu i 5 swydd.  Bydd y grŵp cychwynnol yma’n dechrau ar ddydd Llun 1 Mehefin 2026.

Fe anogir cyflogwyr lleol sydd â diddordeb i gymryd rhan i gofrestru drwy gysylltu â Rheolwr Prosiect, Dawn Johnson, drwy e-bostio dawn.johnson@sirddinbych.gov.uk erbyn dydd Gwener, 29 Mai 2026.

Llyfrgelloedd yn gwahodd preswylwyr i gamu yn ôl mewn amser yn ystod Mis Hanes Lleol a Chymunedol

Mae preswylwyr ar draws Sir Ddinbych yn cael eu hannog i ddarganfod hanes cyfoethog eu cymunedau yn ystod mis Mai wrth i nifer o lyfrgelloedd ar draws y Sir ddathlu Mis Hanes Lleol a Chymunedol gydag ystod o ddigwyddiadau, gweithgareddau ac adnoddau am ddim.

O archwilio casgliadau rhyfeddol yr archif i roi cynnig ar weithgareddau teuluol ar thema hanes lleol, mae digon o gyfleoedd i bobl o bob oed ddatgelu straeon o’r gorffennol trwy’r llyfrgell leol.

Trwy gydol mis Mai, bydd Archifau Gogledd Ddwyrain Cymru yn cynnal cyfres o sesiynau ‘Holi’r Archifydd’, gan gynnig cyfle i breswylwyr ddarganfod mwy am gasgliadau’r archif a sut i gael mynediad atynt.

Bydd y sesiynau’n cael eu cynnal yn:

• Llyfrgell y Rhyl ar ddydd Mawrth 12 Mai o 10am i 12pm; ac yn
• Llyfrgell Corwen ar ddydd Llun 18 Mai o 10am i 12pm.

Gall deuluoedd hefyd fwynhau digwyddiad arbennig ‘Teithwyr Amser Bach’ yn Llyfrgell Dinbych ar ddydd Gwener 29 Mai o 12pm i 2pm, yn cynnwys crefftau, gemau a gweithgareddau gwisgo i fyny ar thema hanes leol.

Yn y cyfamser, gall ymwelwyr i Lyfrgell Rhuddlan weld arddangosfa newydd wedi’i chreu gan Gymdeithas Hanes Lleol Rhuddlan, gan edrych ar effaith y Streic Gyffredinol ym Mai 1926 ar y gymuned leol.

Bydd Llyfrgell y Rhyl hefyd yn nodi 40 mlynedd ar 21 Mai, gan wahodd preswylwyr i ddarganfod sut mae llyfrgelloedd wedi newid ers y 1980au a sut maent yn parhau i gefnogi cymunedau heddiw.

Yn ddiweddar, mae’r llyfrgell wedi gosod Sganiwr Microffilm Digidol newydd a brynwyd trwy Gynllun Grantiau Bach Llyfrgell Genedlaethol Cymru. Mae’r sganiwr yn darparu mynediad at gasgliad unigryw Llyfrgell y Rhyl o bapurau newydd lleol ar ficroffilm, gan gynnwys y Rhyl Record o 1856 i 1922 a’r Rhyl Journal o 1922 i 2007.

Sganiwr Microffilm Digidol

Mae’r papurau newydd hanesyddol hyn yn cynnig cipolwg rhyfeddol i fywyd bob dydd yn yr ardal leol a sut wnaeth digwyddiadau cenedlaethol a rhanbarthol siapio cymunedau dros y blynyddoedd. Mae’r sganiwr newydd yn galluogi cwsmeriaid i weld ac argraffu delweddau digidol o ansawdd uchel o’r casgliad. Gall breswylwyr ddarganfod mwy mewn digwyddiadau galw heibio arbennig ar ddydd Gwener 22 Mai a dydd Gwener 29 Mai o 10am i 12pm.

Gall aelodau’r llyfrgell hefyd gael mynediad at adnoddau hanes teuluol gan gynnwys Ancestry.com a Find My Past am ddim ar gyfrifiaduron y llyfrgell.

Adnodd poblogaidd arall sydd ar gael trwy’r llyfrgelloedd yw BFI Replay, gwasanaeth fideo ar alw ac am ddim, yn cynnwys miloedd o ffilmiau a rhaglenni teledu wedi’u digideiddio o Archif Genedlaethol BFI ac archifau ffilm rhanbarthol ar draws y DU. Mae uchafbwyntiau’n cynnwys fideo hanesyddol o ddisgyblion yn gadael Ysgol Christchurch y Rhyl ym 1902 ac eliffantod y syrcas yn cerdded trwy Ddinbych ar ôl cyrraedd ar y trên ym 1960.

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth:

“Mae llyfrgelloedd lleol yn llawer mwy na llefydd i fenthyg llyfrau - maent yn byrth i straeon, atgofion a hanes sydd wedi siapio ein cymunedau. Mae Mis Hanes Lleol a Chymunedol yn gyfle gwych i breswylwyr o bob oed archwilio’r adnoddau anhygoel sydd ar gael yn ein llyfrgelloedd, darganfod rhywbeth newydd am yr ardal maent yn byw ynddi, a mwynhau gweithgareddau gwych am ddim hefyd.

“P’un a ydych yn ymchwilio i hanes eich teulu, archwilio hen bapurau newydd, siarad gyda’r archifwyr neu’n mwynhau’r ffilmiau a ffotograffau hanesyddol, mae rhywbeth i bawb fwynhau. Anogwn i breswylwyr ymweld â’u llyfrgell leol ym mis Mai a chymryd cam yn ôl i’r gorffennol.”

I gael mwy o wybodaeth am ddigwyddiadau a gweithgareddau sy’n digwydd yn llyfrgelloedd Sir Ddinbych, ewch i: Llyfrgelloedd Sir Ddinbych⁠.

Wythnos blodau gwyllt yn blodeuo y mis hwn

Ydych chi erioed wedi bod eisiau dysgu sut mae blodau gwyllt o fudd i anifeiliaid a bodau dynol? 

Bydd cyfres o ffeithiau am flodau gwyllt ar gael i drigolion ar draws y sir yr hanner tymor hwn wrth i’r Wythnos Blodau Gwyllt ddychwelyd unwaith eto.

Yn ystod yr wythnos, mae teithiau cerdded dolydd blodau gwyllt wedi’u cynllunio ar draws Sir Ddinbych, er mwyn helpu i ddeall pwysigrwydd y cynefin ar gyfer cefnogi rhywogaethau o flodau gwyllt, darparu bwyd i drychfilod a phryfed peillio a darparu ffynhonnell fwyd i anifeiliaid mwy oroesi.

Mae hefyd yn gyfle i weld sut mae’r dolydd o fudd i gymunedau’r sir drwy helpu i oeri’r tir, er enghraifft a gweithredu fel rhwystr yn erbyn llifogydd.

Bydd digwyddiadau eraill yn ystod yr wythnos yn edrych ar yr anifeiliaid sydd angen y dolydd i oroesi, megis gwenoliaid, ystlumod a gwyfynod.

Mae cyfle i ddysgu sut mae bywyd gwyllt lleol yn helpu dolydd i oroesi drwy ymweld â Phlanhigfa Goed y Cyngor yn Llanelwy.

Sefydlodd Cyngor Sir Ddinbych y Prosiect Dolydd Blodau Gwyllt yn 2019 ac mae bellach yn cynnwys tua 60 o erwau o ddolydd blodau gwyllt cynhenid sy’n creu cynefinoedd i warchod a chynnal byd natur yn lleol a hybu lles ein cymunedau ledled y sir.

Mae’n cael ei ariannu hefyd gan Lywodraeth Cymru, drwy raglen Lleoedd Lleol ar gyfer Natur.

Yn nhymor 2025, gwelwyd tegeirianau’n tyfu am y tro cyntaf erioed mewn nifer o ddolydd blodau gwyllt ledled y sir.

Dywedodd y Cynghorydd Barry Mellor, Aelod Arweiniol yr Amgylchedd a Chludiant, a’r Cefnogwr Bioamrywiaeth:“Mae ein Tîm Bioamrywiaeth yn edrych ymlaen yn fawr at helpu unigolion o bob oed i ddysgu mwy am y prosiect pwysig hwn a’r buddion a ddaw yn ei sgil ar gyfer natur a chymunedau yn ystod yr wythnos.

“Rydym wedi colli bron i 97 y cant o ddolydd blodau gwyllt ar hyd a lled y DU ers y 1930au, felly mae’r gwaith hwn yn hanfodol wrth helpu i adfer cynefinoedd sydd wedi cael eu heffeithio’n ddifrifol dros amser. Wrth i flodau gwyllt ddychwelyd, maent yn dod â mwy o amrywiaeth a lliw i gymunedau eu mwynhau, gan ddarparu cefnogaeth hanfodol i beillwyr sy'n chwarae rhan hollbwysig wrth roi bwyd ar ein byrddau.

“Mae’r wythnos hon o ddigwyddiadau yn gyfle gwych i ddysgu mwy am pam mae’r cynefinoedd hyn yn bwysig, a byddwn yn annog unrhyw un sy’n byw’n agos at y dolydd dan sylw i ymuno â’r teithiau cerdded a gweld drostynt eu hunain faint maen nhw’n cyfrannu at natur a lles lleol.”

Edrychwch ar gyfryngau cymdeithasol y Cyngor am yr amserlenni a’r wybodaeth ddiweddaraf.

Os oes gennych ddiddordeb mewn dod i unrhyw un o'r digwyddiadau, cliciwch ar y ddolen hon i archebu eich lle.

I gael rhagor o wybodaeth, anfonwch e-bost at biodiversity@denbighshire.gov.uk

Pythefnos Gofal Maeth yn dechrau yn Sir Ddinbych

Mae Pythefnos Gofal Maeth, sef digwyddiad cenedlaethol blynyddol sy'n rhoi sylw i faethu, wedi cychwyn unwaith eto eleni, ac fe’i cynhelir rhwng 11 a 24 Mai.

Mae gofalwyr maeth yn Sir Ddinbych yn gwneud gwahaniaeth gwirioneddol i fywydau plant a phobl ifanc, yn helpu llawer ohonynt i aros a ffynnu yn eu cymuned leol, gan ddarparu dyfodol mwy disglair iddynt.

Mae thema eleni, “Dyma beth yw maethu”, yn taflu goleuni ar y digwyddiadau go iawn, bob dydd hynny sy’n gwneud maethu mor bwerus.

Mae tîm Maethu Cymru Sir Ddinbych yng Nghyngor Sir Ddinbych yn dathlu'r pythefnos gydag amrywiaeth o ddigwyddiadau ar gyfer teuluoedd maeth a darpar ofalwyr maeth ledled y sir.

Yn ystod yr ymgyrch 14 diwrnod, mae amrywiaeth o weithgareddau wedi'u cynllunio, gan gynnwys digwyddiadau a diwrnodau allan i deuluoedd maeth Sir Ddinbych, yn ogystal â chyfleoedd i gwrdd â'r tîm allan yn y Gymuned.

Mae'r sesiynau galw heibio hyn yn rhoi cyfle i bobl ddysgu mwy am faethu a chael sgwrs anffurfiol gyda'r tîm. Mae'r rhain yn cynnwys Sesiwn Galw Heibio Gwybodaeth Maethu yn Llyfrgell Prestatyn ar 12 Mai rhwng 2 a 4pm, a Sesiwn Gwybodaeth Ar-lein ar 13 Mai rhwng 12pm a 1.30pm.

Meddai Rhiain Morrlle, Pennaeth y Gwasanaethau Plant:

“Rwyf bob amser yn edrych ymlaen at y pythefnos yma ym mis Mai lle cawn ddathlu gwaith ein gofalwyr maeth anhygoel yma yn Sir Ddinbych.

Mae amserlen wych wedi'i threfnu unwaith eto eleni, ac rydym yn cymryd rhan yn nhaith gerdded Pythefnos Gofal Maeth Gogledd Cymru y Rhwydwaith Maethu hefyd.

Rydym wedi diweddaru ein pecyn o bolisïau cynorthwyol ar gyfer gofalwyr maeth sy'n maethu drwy'r awdurdod lleol, a byddem wrth ein bodd yn clywed gan unrhyw un sy'n ystyried cymryd y cam nesaf i gael effaith enfawr ar fywyd unigolyn ifanc.”

Mae’r ddolen ar gyfer y sesiynau gwybodaeth ar-lein yma:  Digwyddiadau Gwybodaeth - Maethu Cymru

I gael mwy o wybodaeth am faethu gyda Maethu Cymru Sir Ddinbych, ewch i: https://sirddinbych.maethucymru.llyw.cymru/

Gwaith gwella wedi ei drefnu ar gyfer Mynwent Llangollen

Bydd gwelliannau isadeiledd yn digwydd ym Mynwent Llangollen y mis hwn.

Mae Gwasanaethau Stryd Cyngor Sir Ddinbych wedi sicrhau cyllid o Gronfa Ffyniant Gyffredin Llywodraeth y DU ynghyd â chyllid cyfalaf i wneud gwaith i wella isadeiledd ar y safle.

Ar hyn o bryd yr unig ffordd i gerbydau gyrraedd y fynwent yw gyrru trwy’r ystad dai gyfagos, sy’n gul ac yn anodd ei defnyddio. Mae hyn wedi arwain at rai cwynion gan drigolion yn y blynyddoedd diweddar.

I ymdrin â’r broblem hon ac i wella’r mynediad i’r fynwent, cynigir creu mynediad newydd i gerbydau ar waelod y safle trwy Vicarage Road.

Bydd y gwelliant hwn nid yn unig yn creu gwell mynediad i ymwelwyr ond bydd yn galluogi trefnwyr angladdau i gyrraedd y safle heb darfu ar drigolion cyfagos yn ogystal â darparu lle i barcio ger y fynwent.

Yn ogystal, mae’r tir cyfagos i dde’r safle, sydd wedi ei ddefnyddio ar gyfer pori yn y blynyddoedd diweddar, bob amser wedi ei glustnodi ar gyfer darpariaeth gladdu yn y dyfodol pan fydd ei angen.

Bydd y prosiect hwn yn ategu datblygiad yr isadeiledd ar y darn hwn o dir ar gyfer mwy o le ar gyfer claddedigaethau. Hefyd bydd ychydig o fân waith tirlunio yn cael ei gwblhau gan gynnwys plannu coed mewn rhai ardaloedd o amgylch y maes parcio i wella ymddangosiad y safle ynghyd â gwelliannau i gefnogi bioamrywiaeth megis gosod blychau ystlumod ac adar.

Dywedodd Paul Jackson, Pennaeth Gwasanaethau Priffyrdd a’r Amgylchedd: “Bydd y prosiect hwn o gymorth i wella’r isadeiledd ym Mynwent Llangollen yn fawr i ddarparu gwasanaeth mwy urddasol a pharchus i deuluoedd lleol ar gyfer y dyfodol.”

Ceisiadau gofal plant Dechrau'n Deg bellach ar agor

Mae ceisiadau ar gyfer darpariaethau gofal plant Dechrau'n Deg mewn codau post cymwys bellach wedi agor yr wythnos hon.

Mae gofal plant Dechrau'n Deg yn darparu hyd at ddeuddeg awr a hanner o ofal plant wedi'i ariannu yn ystod tymor yr ysgol mewn lleoliad gofal plant cofrestredig.

Ar hyn o bryd mae'r ddarpariaeth ar gael mewn grwpiau chwarae partner, cylchoedd Mudiad Meithrin neu feithrinfeydd dydd o ddydd Llun i ddydd Gwener yn ystod tymor yr ysgol.

Mae'r rownd hon o geisiadau ar gyfer rhieni a gofalwyr sydd â phlant a anwyd rhwng 1 Medi 2023 a 31 Awst 2024. Mae'n bwysig nodi nad yw penblwyddi nad ydynt yn ffitio'r ystod dyddiadau hon yn gymwys ar gyfer y rownd hon o geisiadau. Mae ceisiadau am ofal plant Dechrau'n Deg ar gael ar wahanol adegau yn ystod y flwyddyn ac fe'u gwneir mewn rowndiau yn seiliedig ar oedrannau plant.

Mae gofal plant Dechrau'n Deg ar gael i deuluoedd sydd o fewn codau post cymwys.

I wirio a yw cod post yn rhaglen Dechrau'n Deg, ewch i: https://flyingstart.denbighshire.gov.uk/Home/Index?culture=cy-GB

Y dyddiad cau ar gyfer ceisiadau ar gyfer y rownd hon yw 19 o Fehefin.

Dywedodd Rhiain Morrlle, Pennaeth Gwasanaethau Plant:

“Mae'r ddarpariaeth hon yno i helpu teuluoedd gyda'u hanghenion gofal plant yn ystod y tymor ysgol.

Hoffem wahodd rhieni a gofalwyr sydd â phlant a aned rhwng dyddiadau'r cais hwn i wneud cais, a bydd ein tîm mewn cysylltiad i brosesu eich cais ar ôl ei gyflwyno.

Mae nifer o rowndiau o geisiadau ar wahanol adegau yn ystod y flwyddyn, felly cadwch lygad ar ein gwefan am y rownd nesaf.”

Am ragor o wybodaeth ewch i: https://www.denbighshire.gov.uk/cy/gofal-plant-a-rhianta/teuluoedd-yn-gyntaf-a-dechraun-deg/gofal-plant-dechraun-deg.aspx

Miloedd o sigaréts anghyfreithlon wedi eu meddiannu gan dîm safonau masnach y cyngor

Yn dilyn ymgyrchoedd llwyddiannus blaenorol i fynd i’r afael â gwerthu sigaréts anghyfreithlon, mae swyddogion Safonau Masnach Cyngor Sir Ddinbych yn ogystal â Thîm Tybaco Rhanbarthol Safonau Masnach Cymru a Heddlu Gogledd Cymru wedi cynnal ymweliadau pellach ag eiddo ar draws y sir.

Cafodd tri o safleoedd eu targedu yn dilyn profion llwyddiannus lle prynwyd sigaréts yn anghyfreithlon.

Yn ystod yr ymweliadau fe feddiannodd swyddogion dros 12,000 o sigaréts anghyfreithlon a 6.7 cilogram o dybaco rholio â llaw mewn dau safle, gan arwain at gau un dros dro gyda’r perchennog yn cytuno i hynny. 

Yn ystod y gwaith chwilio daethpwyd o hyd i’r eitemau hyn wedi eu cuddio mewn amrywiaeth o ffyrdd. Daethpwyd o hyd i dybaco a sigaréts anghyfreithlon mewn cypyrddau cudd wedi eu creu yn bwrpasol a waliau ffug a oedd wedi’u diogelu gydag electromagnetau. 

Dywedodd Emlyn Jones, Pennaeth Cynllunio, Gwarchod y Cyhoedd a Gwasanaethau Cefn Gwlad:

“Dyma enghraifft arall o’r gwaith gwych mae ein swyddogion Safonau Masnach yn ei wneud i dynnu cynnyrch anghyfreithlon fel y rhain oddi ar ein silffoedd. Roedd yr eitemau a feddiannwyd yn rhai ffug a allai fod yn beryglus i iechyd a diogelwch y bobl hynny fyddai’n eu prynu a’u defnyddio.

“Nid yw’r cynnyrch wedi’u profi o ran diogelwch ac mae’r sigaréts yn berygl tân go iawn gan nad oes ganddynt y cylchoedd atal llosgi. O safbwynt iechyd, does wybod beth sydd yn y tybaco, ac fe allant fod yn cynnwys lefelau niweidiol o gemegau anghyfreithlon ymhell y tu hwnt i beryglon arferol cynnyrch tybaco awdurdodedig.

“Mae ein preswylwyr yn chwarae rhan hanfodol wrth amlygu ardaloedd neu unigolion o ddiddordeb, sy’n helpu ein swyddogion Safonau Masnach i ymchwilio a chael gwared ar dybaco, fêps a chynnyrch anghyfreithlon eraill yn ein cymuned.”

Gall busnesau gysylltu â Thîm Safonau Masnach Sir Ddinbych i gael cyngor ar sigaréts, tybaco a chynnyrch fêpio anghyfreithlon drwy wefan Sir Ddinbych.

Darpariaeth ystafell ddosbarth synhwyraidd newydd yn agor mewn ysgol yn Llanelwy

Mae Ysgol Glan Clwyd wedi gorffen gwaith ar ei hystafell synhwyraidd newydd yn ddiweddar a fydd yn cael ei defnyddio i gefnogi disgyblion gydag ADY (anghenion dysgu ychwanegol).

Mae’r ystafell newydd yn cynnwys tri thaflunydd, sy’n taflunio golygfeydd ar dair wal yn yr ystafell, gan greu profiad hollgynhwysol i’r defnyddwyr.

Ystafell synhwyraidd newydd

Mae bariau golau LED yn rhedeg ar hyd top yr ystafell gan daflunio’r lliw cyfatebol priodol, gan ychwanegu at y profiad hollgynhwysol o fewn yr ystafell ddosbarth newydd.

Mae gan yr ystafell ddosbarth newydd hon y gallu i greu amgylcheddau rhyngweithiol ac ymgysylltiol, y gellir eu teilwra i anghenion unigryw y myfyrwyr, gan ddod ag elfen unigryw i’r ddarpariaeth ADY yn Ysgol Glan Clwyd.

Dechreuodd y gwaith ar y prosiect yn ystod hanner tymor mis Chwefror, gydag addasiadau i’r ystafell bresennol gan gynnwys rhwystro golau lle roedd angen hynny a thynnu drws a oedd yn cysylltu’r ystafell ag ystafell arall. Yn dilyn hynny cafodd yr ystafell ei phaentio a chwblhawyd y gwaith trydanol a’r gwaith o osod y taflunwyr a’r system sŵn.

Rhai o'r golygfeydd

Mae’r ystafell wedi ei lleoli yn ardal Encil, sef yr ardal yn yr ysgol sy’n darparu cefnogaeth gydag ymddygiad a lle mae’r ddarpariaeth ADY.

Mae modd gosod golygfeydd pwrpasol ar y waliau, ac mae tua 20 o olygfeydd ar gael yn fras ar hyn o bryd.

Bydd yr ystafell yn cael ei defnyddio ar gyfer cefnogaeth un i un ond hefyd gall gefnogi sesiynau grŵp bach. Mae hyfforddiant ychwanegol nawr ar y gweill er mwyn i staff allu ehangu’r defnydd o’r ystafell ddosbarth ymhellach.

Un o'r golygfeydd

Dywedodd Geraint Davies, Pennaeth Gwasanaeth Addysg Cyngor Sir Ddinbych:

“Bydd hwn yn ased gwych i’r tîm ADY yn Ysgol Glan Clwyd a bydd yr ystafell ddosbarth hollgynhwysol newydd yn ased gwych i fyfyrwyr.

Dechreuodd y gwaith ar y prosiect hwn yn ystod hanner tymor mis Chwefror ac mae’n wych i weld fod yr ystafell ddosbarth hon nawr wedi’i chwblhau ac yn barod i gael ei defnyddio.”

Dywedodd Sian Alwen, Pennaeth Ysgol Glan Clwyd:

“Mae sicrhau ein bod yn darparu’r gefnogaeth ADY fwyaf blaengar i’n disgyblion yn flaenoriaeth i ni.

Gyda’r tîm addysgu cryf ac ymroddgar yma, mae adnodd fel yr ystafell hon yn cynnig darpariaeth arbenigol a fydd yn helpu grwpiau llai o ddisgyblion ac unigolion i oresgyn heriau.

Rydym yn hynod o ffodus o fod wedi cael y ddarpariaeth hon ac rydym yn hyderus y bydd nifer o ddisgyblion yn gweld y budd yn fuan.”

Cyngor Sir Ddinbych yn ail-ddylunio platiau a bathodynnau tacsis

Mae’r Cyngor wrthi’n newid y broses o drosglwyddo platiau trwyddedu a bathodynnau gyrwyr tacsis i gyflenwr newydd.

Yn ystod y broses mae Sir Ddinbych hefyd wedi cymryd y cyfle i ail-ddylunio’r platiau a bathodynnau tacsis.

Bydd Cyngor Sir Ddinbych yn cyflwyno system bathodyn gyrrwr tacsi a phlatiau cerbydau newydd dros yr wythnosau nesaf.

Wrth i’r Cyngor symud i’r system gynhyrchu newydd dros y flwyddyn nesaf, efallai y bydd trigolion yn sylwi ar rai gwahaniaethau yng nghynllun a dyluniad bathodynnau gyrwyr tacsis, platiau cerbyd a sticeri drysau. Mae hyn yn rhan arferol o’r broses o newid a gyflwynir yn raddol.

Bydd cerbydau yn parhau i arddangos y dyluniad plât cyfredol nes y bydd angen adnewyddu nesaf, a bydd rhai newydd a rhai sy’n adnewyddu o ganol fis Ebrill ymlaen yn dechrau cael y dyluniad newydd.

Meddai Emlyn Jones, Pennaeth Cynllunio, Gwarchod y Cyhoedd a Gwasanaethau Cefn Gwlad:

“Hoffem hysbysu busnesau tacsis a defnyddwyr gwasanaeth ynglŷn â’r newidiadau rydym yn eu gwneud i blatiau trwyddedu a bathodynnau gyrwyr tacsis. Rydym yn gwerthfawrogi eu hamynedd wrth i’r newidiadau hyn gael eu gwneud.

Y Cyngor yn ymgysylltu â busnesau y Rhyl ar brosiectau adfywio mawr

Yn dilyn cymeradwyaeth Cabinet Cyngor Sir Ddinbych, bydd gwaith ar brosiectau Adfywio Lleol a ariennir gan Lywodraeth y DU yng nghanol tref y Rhyl yn symud ymlaen i’r cam cyn adeiladu, gyda rhaglen o weithgareddau ymgysylltu ar fin cychwyn gyda busnesau lleol a phreswylwyr.

Mae swyddogion y Cyngor a thimau prosiect wedi dechrau cwrdd â busnesau canol tref y Rhyl i drafod y cynllun adfywio arfaethedig mewn rhagor o fanylder wrth i waith dylunio barhau i ddatblygu.

Bydd ymgysylltu yn canolbwyntio ar ystyriaethau gweithredol allweddol, gan gynnwys danfoniadau, mynediad a rheoli gwastraff, â’r nod o leihau amhariad a rheoli effaith yn ofalus trwy gydol y cam adeiladu. Bydd adborth gan fusnesau a phreswylwyr yn helpu i lywio cynllunio manwl a sicrhau bod gweithrediadau o ddydd i ddydd yn cael eu hystyried.

Nod y prosiectau adfywio yw trawsnewid yr ardal o gwmpas Tŵr Cloc y Rhyl yn lle sy’n addas i gerddwyr. Mae'r cynlluniau hefyd yn cynnwys gosod pafin newydd ar draws canol y dref, gosod seddi newydd a gwella isadeiledd gwyrdd i greu amgylchedd mwy croesawgar, hygyrch a deniadol ar gyfer preswylwyr, ymwelwyr a busnesau.

Meddai Tony Ward, Cyfarwyddwr Corfforaethol Economi a’r Amgylchedd Cyngor Sir Ddinbych:

“Mae’r prosiectau hyn yn ffurfio rhan o waith adfywio ehangach sy’n cael ei wneud yn y Rhyl. Mae’r gwaith hwn eisoes wedi gweld creu amddiffynfeydd arfordirol, promenâd gwell a mwy hygyrch, parc chwarae newydd a chwbl hygyrch i blant yn ogystal ag agoriad Marchnad y Frenhines. Mae cam nesaf y gwaith yn ffurfio rhan o’r weledigaeth o ailgysylltu canol tref y Rhyl gyda’r promenâd a’r traeth.

“Nod prosiectau fel y rhain yw creu egni o’r newydd a hyder yn y Rhyl ac maen nhw’n sbardunau ar gyfer newid. Rydym yn wirioneddol werthfawrogi amynedd preswylwyr a busnesau wrth i’r newidiadau hyn gael eu gwneud, a gobeithiwn fod pawb yn gallu gweld yr effaith gadarnhaol mae’r gwaith hwn yn ei chael ar y dref.”

Pobl Ifanc yn cael eu hannog i dynnu lluniau o’r dolydd

Caiff disgyblion ysgolion Sir Ddinbych eu hannog unwaith eto i gymryd rhan mewn cystadleuaeth i dynnu lluniau o ddolydd blodau gwyllt lleol. 

Yr wythnos hon mae'r Cyngor wedi ail-lansio Cystadleuaeth Ffotograffiaeth Dolydd Blodau Gwyllt i Ysgolion ar gyfer 2026 wrth i flodau eleni ddechrau blodeuo.

Yn 2019, gwnaeth Cyngor Sir Ddinbych ddatgan argyfwng hinsawdd a natur a’r nod oedd mynd i’r afael â newid hinsawdd a cholli bioamrywiaeth.

Un o'r camau cyntaf oedd dechrau rheoli rhywfaint o laswelltir y Cyngor i greu dolydd blodau gwyllt ledled y sir. Nod y prosiect yw adfer ac ehangu’r cynefinoedd sydd ar gael yn y sir i bryfed peillio a bywyd gwyllt.

Mae gan y prosiect hwn lawer o fanteision neu ‘wasanaethau ecosystem’ i drigolion y sir hefyd, fel llai o lifogydd, gwell ansawdd aer, ac oeri’r aer mewn gwres mawr.

Caiff pobl ifanc eu hannog i gymryd amser i archwilio a sylwi ar yr hyn sy’n ddiddorol iddyn nhw ynghylch eu dolydd blodau gwyllt, dolydd yr ysgol neu warchodfa natur gymunedol o’u dewis nhw a thynnu llun ohono ynghyd ag ychydig o eiriau. Gellir adnabod dolydd y Cyngor gan fod logo caru gwenyn ar bob safle neu gellir defnyddio'r map ar-lein sydd ar gael ar wefan y Cyngor (trwy fanylion y gystadleuaeth).

Gall y lluniau fod o safle cyfan neu ran fechan ohoni, fel pryfyn, blodyn neu rywogaeth gwair – y ffotograffydd fydd yn penderfynu ar ei bwnc dewisol i gymryd y llun gorau. Mae angen i bob ymgeisydd ysgrifennu rhywbeth am eu llun, neu ddod o hyd i ddyfyniad sy’n cyd-fynd â’r llun.

Bydd y rhai buddugol yn cael eu chwyddo i faint A2 i’w hargraffu a’u rhoi ar y waliau y tu allan i Siambr y Cyngor yn Nhŷ Russell, Y Rhyl.

Bydd yr enillwyr yn cael detholiad o lyfrau amgylcheddol ar gyfer eu hysgol, a bydd fersiwn llai o’r llun ar gael i’r enillydd i’w arddangos yn ei gartref neu’r ysgol. Eleni bydd yr ysgol sydd â’r nifer fwyaf o geisiadau hefyd yn ennill detholiad o lyfrau. Bydd pob enillydd yn cael ymweliad gan Gadeirydd ein Cyngor a chydweithwyr i gyflwyno'r llyfrau a'r printiau.

Dywedodd Emlyn Jones, Pennaeth Cynllunio, Gwarchod y Cyhoedd a Gwasanaethau Cefn Gwlad Cyngor Sir Ddinbych:  “Rydym ni’n gwybod bod gan ein disgyblion ddealltwriaeth wych o sut mae newid hinsawdd yn effeithio ar eu bywydau drwy gyfarfod â nhw a sgwrsio â nhw. Mae ganddyn nhw i gyd syniadau gwych ac maen nhw'n gwneud llawer o waith da eu hunain. Mae llawer o ddisgyblion wedi ein helpu ni i greu dolydd blodau gwyllt ledled Sir Ddinbych.

“Rydym ni eisiau rhoi cyfle iddyn nhw rannu sut maen nhw’n dehongli bywyd yn y dolydd drwy lens y camera drwy gymryd rhan yn y gystadleuaeth hon ac yr ydym ni’n edrych ymlaen at weld y canlyniadau.”

I gael rhagor o wybodaeth ynghylch sut i gofrestru ar gyfer y gystadleuaeth, cliciwch ar y ddolen hon

Mae’r gystadleuaeth ar agor tan 14 Awst 2026.