Disgyblion Ysgol Carrog yn creu hafan newydd i natur

Mae disgyblion ysgol gynradd yn Sir Ddinbych wedi mynd ati’n ddiwyd i greu hafan newydd i natur.

Yn ddiweddar, fe ymunodd disgyblion Ysgol Carrog â thîm Bioamrywiaeth y Cyngor i blannu dôl newydd o flodau gwyllt ar dir yr ysgol.

Fe fu’r plant yn gweithio gyda’r swyddogion i greu’r ardal newydd yn yr ysgol i’w helpu i ddysgu mwy am y manteision mae’r cynefinoedd hyn yn eu creu i natur ac iddyn nhw eu hunain hefyd.

Maent wedi creu cynefin sy’n cynnwys rhywogaethau blodau gwyllt fel moronen y maes, llygad-llo mawr, melynydd, blodyn neidr, y feddyges las, y bengaled, blodyn menyn, pysen-y-ceirw, gludlys gwyn, ytbysen y ddôl, a’r feillionen goch.

Bydd y ddôl yn helpu’r plant i ddysgu ynglŷn â phwysigrwydd y cynefinoedd hyn i gefnogi pryfed peillio lleol fel gwenyn sy’n helpu i roi bwyd ar ein byrddau a bydd hefyd yn creu lle ychwanegol tu allan yn yr ysgol i ddysgu am natur.

Daeth y blodau gwyllt i’w plannu o blanhigfa goed Cyngor Sir Ddinbych yn Llanelwy.

Dywedodd y Swyddog Bioamrywiaeth, Ellie Wainwright: “Fe wnaeth y plant wir fwynhau’r gwaith plannu a dysgu sut mae dolydd yn helpu natur a’r gymuned leol. Mae’r ysgol yn angerddol iawn am gefnogi natur a bydd y prosiect hwn i greu’r ddôl yn helpu i greu cynefin gwych i’r holl anifeiliaid a’r planhigion o amgylch safle’r ysgol.

Dywedodd y Cynghorydd James Elson, Aelod Arweiniol yr Amgylchedd a Chludiant, “Fe hoffwn i ddiolch yn fawr i ddisgyblion a staff Ysgol Carrog am groesawu ein tîm Bioamrywiaeth i’r ysgol i helpu i greu’r cynefin ar gyfer natur ar y safle.”

“Gwych yw gweld y disgyblion yma’n rhoi help llaw i natur yn lleol drwy blannu’r ddôl ar dir yr ysgol.”