Gwobrau’n cael eu cyflwyno i ffotograffwyr natur ifanc
Cafodd ffotograffwyr ifanc gyflwyniad arbennig yn yr ysgol ar ôl ennill Cystadleuaeth Ffotograffiaeth Dolydd Blodau Gwyllt 2025 Cyngor Sir Ddinbych.
Cafodd ffotograffwyr ifanc gyflwyniad arbennig yn yr ysgol ar ôl ennill Cystadleuaeth Ffotograffiaeth Dolydd Blodau Gwyllt 2025 Cyngor Sir Ddinbych.
Gofynnwyd i ddisgyblion Sir Ddinbych fynd ati i dynnu ffotograff ar un o ddolydd blodau gwyllt y sir, dôl ysgol neu safle gwarchodfa natur gymunedol. Gallai fod yn llun o'r safle cyfan neu o ddarn bychan bach ohono, fel pryfyn neu flodyn – beth bynnag sy'n gwneud y llun gorau.
Yr enillwyr oedd Elis o Ysgol Esgob Morgan, a dynnodd lun o Gardwenynen Gyffredin ar ysgall yng Nghysgodfa, Dinbych, a Wynter ym Mlwyddyn 5 yn Ysgol Bryn Hedydd, a dynnodd lun yn dangos Cacynen Cynffonwen ar flodau melyn.
Cyflwynwyd gwobrau i’r ddau enillydd, sef llyfrau amgylcheddol i’w hysgolion a llun bach o’u ffotograff ar ganfas i’w ddangos adref neu yn yr ysgol. Cawsant eu cyflwyno gan Gadeirydd y Cyngor, y Cynghorydd Arwel Roberts a’r Cynghorydd Barry Mellor a’r Cynghorydd Peter Scott a fu’n ymweld â’r ysgolion i gwrdd â’r enillwyr.
Cyflwynwyd llyfr a cherdyn i Charlotte ym Mlwyddyn 5 yn Ysgol Bryn Hedydd hefyd am ei ffotograff yn y gystadleuaeth, ac i Osian yn Ysgol Esgob Morgan.
Camau gweithredu cyntaf y Cyngor ar ôl datgan argyfwng hinsawdd ac ecolegol yn 2019 oedd dechrau rheoli glaswelltiroedd i greu dolydd blodau gwyllt. Nod y prosiect yw adfer ac ehangu’r cynefinoedd sydd ar gael yn y sir i bryfed peillio a bywyd gwyllt. Mae’r prosiect hefyd yn dod â llawer o fanteision neu ‘wasanaethau ecosystem’ i drigolion y sir, fel llai o lifogydd, gwell ansawdd aer, ac oeri’r aer.
Meddai’r Cynghorydd Barry Mellor, Aelod Arweiniol yr Amgylchedd a Chludiant: “Roedd yn fraint cwrdd â’r enillwyr, ac rydw i’n gwybod bod fy nghydweithwyr yn teimlo’r un fath. Mae eu hangerdd dros helpu natur leol a dysgu amdani yn hynod o ysbrydoledig. Hoffem longyfarch Elis a Wynter eto am eu delweddau hyfryd a diolch i’r holl ddisgyblion a gymerodd amser i roi cynnig ar y gystadleuaeth.”
Bydd Cyngor Sir Ddinbych yn cynnal y gystadleuaeth eto yn y gwanwyn/haf.