Ymgyrch Siopa'n Lleol: #CaruBusnesauLleol

Mae'r Cyngor yn annog trigolion a busnesau i gefnogi eu hymgyrch i gefnogi busnesau lleol yn y sir. Mae'r ymgyrch #CaruBusnesauLleol yn anelu at gael pobl i ddangos eu cefnogaeth i fusnesau lleol drwy ddefnyddio'r hashnod ar Twitter a Facebook i hybu profiadau da eu bod wedi cael a hyrwyddo cynnyrch a gwasanaethau yn lleol eu bod wedi 'caru'. Rydym hefyd am i fusnesau Sir Ddinbych i ymgysylltu â'r ymgyrch ac i ddefnyddio'r hashnod i hyrwyddo eu nwyddau a'u gwasanaethau i helpu i ledaenu'r gair am yr holl gynhyrchion a gwasanaethau amrywiol sydd ar gael mewn trefi a phentrefi lleol.

Dyma rai yn unig luniau o drigolion a busnesau sydd yn cefnogi'r ymgyrch #CaruBusnesauLleol.

 

     

Cwsmeriaid Katrina and Eddie Foozies                    Mr a Mrs Dyson yn mwynhau yn Chatwins, Llangollen

 

     

Elevate your sole - Prestatyn                                     Jacob's Ladder - St Asaph

 

     

Leonardos - Ruthin                                                   Rejuve - Rhuddlan

Triawd busnes Llangollen yn arwain ymgyrch ar-lein #CaruBusnesauLleol

Mae triawd o fusnesau ffyniannus Llangollen yn helpu i arwain ymgyrch newydd i berswadio pobl i gefnogi busnesau lleol.

Mae archfarchnad Stans, y siop awyr agored Pro Adventure a Lilly Rose Interiors i gyd wedi newydd ymuno â'r band bach sy’n tyfu o lysgenhadon swyddogol ar gyfer yr ymgyrch cyfryngau cymdeithasol #CaruBusnesauLleol (#LoveLiveLocal).

Mae’r ymgyrch yn cael ei chefnogi gan y Cyngor i hyrwyddo siopau lleol annibynnol, cwmnïau bach a darparwyr gwasanaeth a'u helpu i fanteisio ar farchnata cyfryngau cymdeithasol.

Y syniad mawr y tu ôl i'r ymgyrch yw, os yw cwsmer yn caru'r cynnyrch y maent newydd brynu yn eu siop anrhegion leol neu wrth eu bodd gyda'r pryd maent wedi’i gael mewn bwyty, gallant ledaenu'r gair dros Twitter neu Facebook, yn syml drwy ychwanegu #CaruBusnesauLleol #LoveLiveLocal, i helpu eu ffrindiau a chymdogion busnes.

Mae Arweinydd Sir Ddinbych, Hugh Evans OBE wedi gwahodd busnesau ar draws y Sir i ymgysylltu â'r ymgyrch, defnyddio’r hashnod i hyrwyddo eu hunain a gofyn i’w cwsmeriaid ei ddefnyddio hefyd.

Dywedodd: “Mae yna gymaint o fusnesau gwych yma yn Sir Ddinbych ym mhob math o feysydd, o fwyd a gwestai, i siopau sy'n gwerthu crefftau unigryw a darparwyr gwasanaethau a phrofiadau unigryw.

“Mae angen i ni ledaenu’r gair a gwneud yn siŵr bod cymaint ag sy’n bosibl o bobl yn gwybod amdanynt ac yn eu defnyddio.

“Rydym yn galw ar bobl Sir Ddinbych i ddangos ysbryd cymunedol trwy gefnogi’r ymgais hwn i ddiogelu dyfodol ein strydoedd mawr.

“Mae busnesau bach yn helpu i greu economi rhanbarthol ffyniannus a darparu swyddi hanfodol i bobl leol.

“Dyna pam ein bod wir eisiau i bobl rannu eu profiadau cadarnhaol a rhoi hwb i'n hymgyrch #CaruBusnesauLleol drwy drosglwyddo’r neges ynghylch faint maent yn caru siopa'n lleol.

“Mae'n rhan o’n hymgyrch barhaus i ddatblygu ac ehangu'r economi leol, hyrwyddo siopa yn lleol ac annog busnesau i archwilio manteision defnyddio cyfryngau cymdeithasol ymhellach.”

Ymhlith y rhai sy’n cefnogi’r ymgyrch mae archfarchnad Stans ar Stryd Berwyn lle dywedodd y rheolwr Steve Jones: “Byddaf yn gwneud beth bynnag a allaf i’w gefnogi fel llysgennad.

“Yn Stans yn Llangollen rydym o blaid cefnogi busnesau eraill o'r ardal ac rydym yn stocio eitemau oddi wrth 15 neu 16 o gyflenwyr lleol ochr yn ochr â'r prif frandiau.

“Rydym hefyd yn cefnogi achosion lleol ac yn y pedair blynedd ers i ni agor yn Llangollen rydym wedi cyfrannu tua £2,500 i ysgolion, timau pêl-droed a thîm Trefi Taclus yr ardal.

“Rwy'n credu bod #CaruBusnesauLleol yn ddefnyddiol gan fod y cyfryngau cymdeithasol yn arf marchnata gwerthfawr ac mae cael adborth am fusnesau lleol oddi wrth y bobl sy'n eu defnyddio yn bwysig iawn."

Llysgennad newydd arall #CaruBusnesauLleol yn Llangollen yw un o fusnesau ieuengaf y dref, Lilly Rose Interiors, a agorodd yn Stryd y Castell ddim ond pedwar mis yn ôl.

Mae'n cael ei rhedeg gan Jan Deeprose, sy'n byw yn yr ardal a defnyddiodd ei chefndir sylweddol mewn manwerthu fel man cychwyn i ddechrau ei siop ei hun yn gwerthu amrywiaeth eang o nwyddau cartref a thŷ, o ganhwyllau a chlustogau i lestri ac addurniadau gardd.

Dywedodd: “Rwy'n falch o fod yn llysgennad ar gyfer #CaruBusnesauLleol gan fy mod yn gwybod bod cyfryngau cymdeithasol mor hanfodol i fusnesau'r dyddiau hyn. Dyna pam dwi ar Facebook, Twitter ac Instagram.

“Mae hefyd mor bwysig i fod yn gwneud rhywbeth i gefnogi busnesau lleol llai, sef beth mae’r cyngor sir yn ei wneud gyda'r ymgyrch hon.

“Mae bod yn lleol yn hanfodol y dyddiau hyn. “Rwyf yn byw ac yn gweithio yn Llangollen, felly yr wyf yn ymhyfrydu ar adnabod y farchnad leol a beth mae pobl ei eisiau, ac mae gallu lledu’r gair am yr hyn sydd gan fusnesau i'w cynnig drwy’r ymgyrch hon i gyd yn helpu."

Pete Carol, sydd wedi bod yn rhedeg ei fusnes Pro Adventure yn Llangollen ers 1991 ac yn awr yn gweithio o’r hen Swyddfa Bost ar Stryd y Castell.

Dywedodd: “Rwy'n falch o fod yn rhan gan fy mod yn defnyddio cyfryngau cymdeithasol yn rheolaidd i helpu i farchnata fy musnes, sydd yn fanwerthwr arbenigol ar gyfer pobl sydd wrth eu bodd yn yr awyr agored.

“Mae’n fwy na dim ond dillad ac rydym yn stocio eitemau ar gyfer cerdded, gwersylla a byw yn y gwyllt, megis bwyeill a chyllyll.

“Drwy ein presenoldeb ar gyfryngau cymdeithasol, rydym yn sylwi ar drydar sy’n cael eu rhannu’n lleol a’u hail-drydar, sy'n dda i fusnes.

“Mae'r ymgyrch #CaruBusnesauLleol yn estyniad o hynny ac rwy'n falch iawn o fod yn rhan ohono gan y bydd yn bendant yn helpu i ddweud wrth bobl am yr hyn sy'n dda am ddefnyddio busnesau yn Llangollen a Sir Ddinbych."    

Colli swydd yn arwain at lwyddiant i bâr priod o entrepreneuriaid

Mae gŵr a gwraig yn adeiladu dyfodol newydd ar gyfer eu hunain ar ôl goresgyn y tor calon o golli’u swyddi drwy lansio busnes gwaith maen.

Mae Julie a Dylan Williams, cyd-berchnogion Stoneworkz Industries, wedi sicrhau cyfres o gontractau proffidiol ar draws y DU ers i'r Cyngor ddyfarnu grant datblygu busnes iddynt i dalu am gost peiriannau arbenigol i ateb y galw cynyddol.

Mae'r grant o £5,000, a ariannodd lif arbenigol ar gyfer torri cerrig a thanc dŵr pwrpasol, wedi galluogi'r cwmni o Ddinbych i wella ei effeithlonrwydd a chael mwy o archebion ac mae wedi bod yn allweddol i’w twf.

Mae'r busnes yn awr yn cyflogi tri aelod o staff llawn-amser, mae ganddo gynlluniau i recriwtio un arall ac mae’n paratoi i lansio ei ystafell arddangos gyntaf ar Ystâd Fasnachu Spencer yn yr hydref.

“Mae'n mynd yn dda iawn. Mae wedi bod yn anodd ac mae’r ddau ohonom wedi gorfod gweithio oriau hir iawn ond rydym yn hynod falch gyda'r ffordd y mae'r busnes wedi cael ei adeiladu hyd yma ac rydym yn gobeithio tyfu ymhellach," meddai Julie, sy'n byw yn Ninbych.

“Ar y dechrau, pan wnaethom ni lansio, wnaethon ni ddim meddwl y byddai gennym ystafell arddangos a gweithdy o fewn blwyddyn, felly rydym yn falch iawn. Rydym yn mynd i'r cyfeiriad yr oeddem yn anelu amdano.

Roedd y grant yn gymorth mawr i ni. Yn ariannol, nid oedd y gefnogaeth gennym. Rydym wedi cymryd gostyngiad mawr mewn incwm i allu cychwyn y busnes a’i ddatblygu, sydd wedi bod ein cyfraniad ariannol personol ni.

“Rydym yn ceisio peidio â chymryd llawer o arian allan o'r busnes i allu symud ymlaen. Mae'r grant wedi ein helpu ni i dyfu yn ôl ein galw."

Mae Julie, 48, wedi bod yn gweithio yn y diwydiant ers 11 mlynedd tra bod ei gŵr Dylan, 39, â mwy na 16 mlynedd o brofiad.

Roedd y cwpl, sydd â thri o blant 10, 20 a 27 oed yn gweithio ar gyfer un cyflenwr cerrig lleol pan gollodd Julie ei swydd rheoli. Er iddi gymryd rôl dros dro mewn cwmni arall, roedd y cwpl yn awyddus i ddefnyddio eu profiad a'u gwybodaeth helaeth drwy ffurfio eu cwmni eu hunain.

“Fy mhenderfyniad i oedd sefydlu busnes yn y dechrau. Cael fy niswyddo oedd y peth allweddol a'r grym y tu ôl i'r penderfyniad, "meddai Julie.

“Roedd y ddau ohonom mewn swyddi rheoli ac fe sylweddolom fod y ddau ohonom wedi rhoi cymaint o ymdrech i mewn ar ran rhywun arall – roeddem wir wedi rhoi 100 y cant - ac nid oeddem am wneud hynny eto a dal bod heb unrhyw reolaeth dros ein swyddi.

Roedd yn frawychus ond roedd gennym fwy o reolaeth dros y penderfyniadau oedd yn cael eu gwneud. Un o'n prif fanteision fel busnes yw faint o amser yr ydym ein dau yn barod i fuddsoddi yn ein cwsmeriaid i ddod o hyd i’r deunyddiau maent wir eisiau. Byddwn yn mynd allan o'n ffordd i ddod o hyd i'r pris neu opsiynau steil gorau i ffitio’n berffaith i mewn i brosiect."

Lansiodd y busnes ym mis Mehefin 2015 a daeth yn amlwg yn gyflym bod angen buddsoddiad pellach i gaffael peiriannau torri cerrig a brics fel y gallent gwblhau archebion yn fewnol.

Fe wnaethant gais am grant busnes gan Gyngor Sir Ddinbych ar ddechrau'r flwyddyn hon ac roeddent yn falch iawn pan gafodd ei dderbyn.

“Roedd yn fath drud o fusnes i ddechrau ac nid oedd gennym unrhyw beth y tu ôl i ni heblaw am fenthyciad cychwyn busnes dechreuol," meddai Julie.

“Roeddem angen mwy o beiriannau ac roedd y grant yn benodol ar gyfer hynny.

“Fe wnaeth ein galluogi i gymryd cam ymlaen i wneud y gwaith roedd ein cleientiaid yn gofyn amdano a thyfu ein busnes. O ganlyniad, rydym yn awr yn gweithio gyda chwmni o Warrington sy'n ailwampio gwestai ym mhob cwr o’r byd ac rydym wedi cyflawni archebion yn Guernsey a Jersey. Rydym hefyd yn gweithio gyda chyflenwr cegin ar ben uchaf y farchnad, gan wneud gwaith yn ardal Dyfnaint.

“Mae ein gwaith ym mhob cwr o’r wlad ac mae ein henw allan yno, ond mae mwy o waith i'w wneud. Nid ydym wedi gwthio mor galed ag yr oedd arnom wneud i gael ein staff wedi’u hyfforddi'n llawn, ond mae'n ymddangos i fod yn gweithio yn barod. Rydym yn edrych ymlaen at y dyfodol."

Dywedodd Kirsty Davies, Swyddog Cefnogi Busnes a Rhwydweithio ar gyfer Cyngor Sir Ddinbych bod ei gynllun grant wedi helpu llawer o gwmnïau lleol i dyfu ar gyfradd gyflymach nag y byddent wedi’i wneud fel arall heb gymorth ariannol.

“Mae busnesau bach yn wynebu cymaint o rwystrau yn y dyddiau cynnar, yn enwedig mewn perthynas ag offer ac adeiladau - y ddau ohonynt yn gofyn am fuddsoddiad sylweddol.

I gael gwybod sut i wneud cais am Grant Datblygu Busnes ewch i www.sirddinbych.gov.uk/busnes neu ffoniwch 01824 706896.

Cwmni jam â chic yn dathlu ffrwyth ei lafur gyda charreg filltir o ran stocwyr

Mae pâr o entrepreneuriaid sy’n gwisgo masgiau a dillad amddiffynnol i wneud eu jam chilli tanllyd yn dathlu carreg filltir bwysig – cael eu 150fed stociwr.

Mae Dominic Haynes a Llyr Jones, a lansiodd y Dangerous Food Company lai na thair blynedd yn ôl pan gafodd y ddau eu diswyddo o laethdy Gwyddelig, yn awr yn cyflenwi eu brand unigryw o jamiau chilli i fwytai, siopau fferm a siopau bwyd ar draws y DU - a hyd yn oed mor bell i ffwrdd ag Alphen yn yr Iseldiroedd.

Maent yn dweud fod grant o £2,300 gan Gyngor Sir Ddinbych wedi ysgogi eu twf cyflym, gan gynnwys ehangu yn ddiweddar i’r farchnad caws gafr moethus, a’u helpu i ateb galw cwsmeriaid yn fwy parod drwy brynu oergell y gallwch gerdded i mewn iddi.

Ac fel mae’r fenter o Lanelwy yn paratoi i ddadorchuddio, cynnyrch cyfrinachol newydd cyn gŵyl fwyd Hamper Llangollen ar 19 a 20 Hydref, mae'r ddeuawd wedi cael eu 150fed allfa i werthu eu cynnyrch – Siop Fferm Frankie’s yn Nyserth.

“O’r diwedd, rydym yn y cyfnod lle rydym yn gwybod ei fod yn gweithio," meddai Dominic, 33, sy'n byw yn Llanelwy.

“Rydym wedi gwneud y cyfan yn ddiddyled ac mae wedi mynd o nerth i nerth. Bu rhai dyddiau tywyll ar y dechrau, fel pob busnes, ond erbyn hyn mae popeth yn disgyn i'w le. Erbyn hyn mae o i gyd ynghylch ehangu a gwneud pethau yn gyflymach.

“Er mwyn i fusnes dyfu yn rhaid i chi wario arian ond os gellir tynnu hanner y gost ymaith, mae'n golygu eich bod yn teimlo'n fwy hyderus ac yn fwy diogel am ehangu a gallwch dyfu yn gyflymach a gwneud y busnes yn fwy llwyddiannus.

“Eisoes, gyda dim ond y ddau ohonom, rydym wedi caffael rhan fach o'r farchnad fwyd ac rydym yn awyddus i ledaenu ein cynnyrch ymhellach.

“Mae gennym gwsmeriaid yn Llundain a gororau’r Alban ond mae mwy na 2,000 o siopau fferm a delis yn genedlaethol, felly'r cam nesaf yw i wthio hyn. Ein nod yw cyrraedd cynifer â phosib."

Dechreuodd y ddeuawd, sydd wedi bod yn ffrindiau ers 11 mlynedd, wneud siytni chilli tanllyd sy'n addas ar gyfer cig, caws a barbiciws yn Ionawr 2013, gan gyfuno chilli poeth gyda ffrwythau Prydeinig traddodiadol i chwyddo’r blas.

Roedd Dominic, a raddiodd o Brifysgol Nottingham gyda gradd mewn dylunio cynnyrch, yn enwog am ei sgiliau coginio ymhlith ffrindiau a theulu ac roedd wedi creu dim llai na 38 fersiwn o’r hyn sydd bellach yn gynnyrch gwreiddiol y cwmni, Jam Chilli Coch a Leim, yn ei gegin gartref cyn penderfynu ar ei rysáit 'waw ffactor' terfynol.

“Rwyf wastad wedi bod yn eithaf da yn y gegin. Roedd pawb yn gwybod fy mod yn coginio bwyd sbeislyd ofnadwy yn y brifysgol ac roeddent yn arfer cwyno am yr arogl, "meddai.

Yn y dyddiau cynnar, penderfynodd y cyfeillion werthu rhywfaint o'r jam mewn digwyddiad bwyd penwythnos a chawsant eu synnu pan werthodd pob un o’r 600 jar ar y stondin. Y diwrnod nesaf, darganfu’r pâr eu bod yn cael eu diswyddo o'u swyddi gwerthu a roddodd y cymhelliad iddynt i werthu'r jamiau llawn amser.

Erbyn mis Mai 2014, roedd y gwŷr busnes wedi datblygu tri chynnyrch jam; eu Jam Chilli Coch a Leim gwreiddiol, Jam Chilli Habanero gyda Mango wedi’i Aeddfedu yn yr Haul, a enillodd ddwy seren yn y Gwobrau Great Taste yn 2015, a Jam Jalapeno Chilli ac Afal, sydd wedi symud y gwaith cynhyrchu allan o gegin cartref Dominic i eiddo yn Patchwork Paté yn Rhuthun.

Dilynodd mwy o flasau, gan gynnwys y Jam Ghost Chilli sy’n cynnwys un o'r chillis poethaf yn y byd ac sy'n golygu gorfod gwisgo offer llygaid amddiffynnol yn ystod y broses gynhyrchu.

Ym mis Awst y llynedd, mentrodd y ddau i fyd cynnyrch caws gafr moethus o’r Iseldiroedd a gynigwyd o dan eu brand sydd wedi cael ei groesawu yn y farchnad fwyd ‘gourmet’ - ac mae wedi arwain at gontract stoc chwenychedig ar draws y Sianel ar gyfer eu jamiau.

A diolch i grant busnes a ddarparwyd gan Gyngor Sir Ddinbych ar ddechrau 2016, roeddent yn gallu prynu cyfleuster storio awyr agored pwrpasol a'u galluogodd i luosi eu capasiti archebion ac ehangu.

“Roedden ni wedi cael rhai contractau cyfanwerthwyr mawr ac roedd yr oergell yn golygu ein bod yn gallu storio'r cynnyrch yn rhwydd," meddai Dominic, a fynychodd Ysgol Uwchradd Gatholig y Bendigaid Edward Jones yn y Rhyl pan oedd yn tyfu i fyny.

“Gwnaeth y grant ein twf yn hylaw ac yn haws. Ar gyfer unrhyw fusnes fel ein un ni, mae mis Ionawr a Chwefror yn dawel, a byddai gwario’r math yma o arian ein hunain wedi bod yn llawer mwy o risg.

“Rydym yn dal i weithio 50 neu 60 awr yr wythnos. Cafodd Llyr a'i bartner eu plentyn cyntaf, Molly, wyth wythnos yn ôl. Gwnaeth faint o waith mae angen i ni ei wneud hi’n anodd cael unrhyw absenoldeb tadolaeth ond roeddem yn gallu gweithio’r oriau hyn pan oeddem eisiau, felly roedd rhywfaint o hyblygrwydd."

Dywedodd Kirsty Davies, Swyddog Cefnogi Busnes a Rhwydweithio ar gyfer Cyngor Sir Ddinbych: “Mae'n rhoi boddhad anhygoel i wylio busnesau lleol yn llwyddo, yn enwedig mor fuan ar ôl lansio.

“Mae ein cynllun grant busnes wedi ei gynllunio i annog busnesau newydd i gymryd y camau cyntaf hynny tuag at ehangu ac yn y pendraw creu swyddi newydd a chefnogi datblygiad yr economi leol, sy'n flaenoriaeth i’r cyngor.

“Mae llawer o fusnesau bach yn wynebu rhwystrau ar y llwybr i dwf, gan gynnwys diffyg adnoddau neu gyfleusterau ac mae'r prosiect hwn yn helpu i liniaru rhai o'r rhain, gan ganiatáu arloesed a dawn i ffynnu’n ddirwystr."

I gael gwybod sut i wneud cais am Grant Datblygu Busnes ewch i www.sirddinbych.gov.uk/busnes neu ffoniwch 01824 706896.