Lansiad Cenedlaethol Sialens Ddarllen yr Haf 2024

Roedd Llyfrgell Dinbych yn llawn bwrlwm ar 10fed o Orffennaf yn ystod lansiad y Sialens Ddarllen – Crefftwyr Campus.

Daeth dosbarth Blwyddyn 3 o Ysgol Twm o’r Nant i gyfarfod Leisa Mererid, actor ac awdur ‘Y Wariar Bach’ a’r ‘Goeden Ioga’. Cafwyd sesiwn llawn egni a hwyl yn dysgu am symudiadau ioga ac anadlu. Ymunodd y plant gyda’r sialens gan gofrestru a dewis llyfrau wedi’r sesiwn. Bydd cyfle i blant ymuno gyda’r sialens yn eu Llyfrgell leol neu arlein gan gasglu sticeri, darganfod straeon newydd a mwynhau amrywiaeth o weithgareddau am ddim dros yr haf. Cysylltwch a’ch Llyfrgell leol am fanylion neu ewch i sialensddarllenyrhaf.org.uk.

Leisa Mererid a phlant blwyddyn 3 Ysgol Twm o’r Nant yn y sesiwn ioga  

Croesawyd pawb i’r digwyddiad gan Shoned Davies, Rheolwr Prosiect Addysgol a Francesca Sciarillo, Swyddog Hyrwyddo Darllen o Gyngor Llyfrau Cymru. Hefyd cafwyd gwmni Maer Dinbych, Catherine Jones; Bethan Lee o Lywodraeth Cymru, Rona Aldrich, Is-gadeirydd Cyngor Llyfrau Cymru a Phennaeth Gwasanaeth Tai a Chymunedau, Liz Grieve.

Cafwyd air o ddiolch a chanmoliaeth am y sesiwn gan Y Cynghorydd Emrys Wynne, aelod arweiniol dros y Gymraeg, Diwylliant a Threftadaeth.

Dechrau ardderchog i haf o brysurdeb llawn llyfrau, darllen a gweithgareddau creadigol yn ein llyfrgelloedd.

Cyfarfod Awduron yn Llyfrgelloedd Sir Ddinbych

Simon McCleave

Cafwyd sesiwn prysur gyda’r awdur trosedd Simon McCleave yn trafod ei nofelau poblogaidd sydd wedi eu lleoli yng Ngogledd Cymru yn Llyfrgell Y Rhyl. Cyhoeddodd ei nofel gyntaf ‘The Snowdonia Killings’  gyda’r ditectif Ruth Hunter yn 2020, ers hynny mae wedi dod yn awdur llwyddiannus a phoblogaidd ar Amazon.

Les Jones

Daeth yr awdur lleol atom i Lyfrgell Y Rhyl i drafod  ei lyfr newydd ‘Twelve Doors’. Sgwrsiodd yr awdur a’r cyn-blismon am ei nofel sydd wedi ei lleoli yn ardal y Rhyl.  Mae’n sôn am ddeuddeg o ddynion a marched cyffredin sy’n ddiffoddwyr tân ‘ar alwad’ sy’n peryglu eu bywydau i achub eraill.

Martin Kaye

Roedd yr awdur Martin Kaye yn lansio y dryddydd nofel hanesyddol mewn cyfres wedi ei seilio ar y chwedlau Arthuraidd a’r cyfnod presennol sydd wedi eu lleoli yn ardaloedd Rhuthun a Dinbych. Mae Martin yn wreiddiol o Ddyffryn Clwyd ac yn byw yn Ne Cymru. Mae’r antur yn parhau yn ei nofel newydd ‘The Fallen and the Fled’

Holwch yn eich Llyfrgell leol am gopiau o’r llyfrau.

BorrowBox

Darganfyddwch rifyn diweddaraf Y Cymro a mwy o e-bapurau ar gael ar BorrowBox nawr!

Gallwch fenthyg a lawrlwytho e-lyfrau ac eLyfrau Llafar gan ddefnyddio'r ap BorrowBox.

Lawrlwythwch yr ap yn awr oddi ar yr App Store a Google Play, a dechreuwch fenthyca, lawrlwytho a mwynhau e-Lyfrau llafar heddiw. Defnyddiwch yr ap i ddarllen neu wrando 24/7