Mae ceidwad arfordir cefn gwlad wedi derbyn gwobr anrhydeddus am ei gwaith i helpu bywyd gwyllt yr arfordir.

Yn ddiweddar, bu i Geidwad Arfordir Cefn Gwlad Gogledd Sir Ddinbych, Claudia Smith, dderbyn Gwobr Treftadaeth Forol gan y Gymdeithas Cadwraeth Forol yn y Symposiwm Un Cefnfor a gynhaliwyd yn y Rhyl.

Mae Claudia yn unigolyn prysur ar hyd arfordir Sir Ddinbych, sy’n cadw llygad yn rheolaidd ar natur a bywyd gwyllt lleol, o’r Rhyl i Dwyni Gronant.

Ar hyd arfordir y sir, gyda chefnogaeth gan ei gwirfoddolwyr ymroddedig, mae Claudia wedi ailgyflwyno moresg i’r system dwyni o amgylch harbwr y Rhyl i gefnogi bioamrywiaeth leol, trwsio prennau'r llwybr a gosod meinciau newydd.

Maen nhw hefyd wedi helpu i osod disgiau ac arwyddion newydd ar gyfer Llwybr Arfordir Cymru ger yr harbwr, Trwyn Horton, Twyni Barkby a Gronant.

Mae Claudia a’r gwirfoddolwyr hefyd yn helpu gyda sefydlu nythfa ar gyfer môr-wenoliaid bychain yn Nhwyni Gronant ac maent o gymorth mawr gyda chynnal y nythfa o ddydd i ddydd yn ystod tymor y môr-wenoliaid bychain.

Yn ddiweddar, bu’n cynorthwyo â’r gwaith o sefydlu prosiect CoastSnap ar hyd yr arfordir i helpu i fonitro effaith newid hinsawdd ar hyd glannau Sir Ddinbych.

Meddai Claudia ar ôl iddi dderbyn y wobr: “Rwyf wedi bod yn gweithio ar brosiect Hiraeth yn y Môr, y Gymdeithas Cadwraeth Forol, sy’n dod i ben ddiwedd y mis. Nod y prosiect oedd cysylltu pobl leol rhwng Gronant a Phensarn â’r cefnfor, trwy gyfrwng digwyddiadau, addysg a hyfforddiant.

“Cymerais ran yn eu Fforwm Un Cefnfor fel cynrychiolydd Cefn Gwlad Sir Ddinbych, a lywiodd gyfeiriad y prosiect. Bu hyn yn gyfle i mi gwrdd â phobl o bob rhan o’r gymuned a hyrwyddo gwaith gwasanaethau Cefn Gwlad Sir Ddinbych.

Trefnais ymweliadau â’r môr-wenoliaid bychain yng Ngronant gyda nhw, yn ogystal â sesiynau glanhau’r traeth. Helpodd hyn gyda'n nodau o ran ymgysylltu yng Ngronant, yn ogystal â’u rhai hwythau. Bu i mi hefyd fynychu mwy o’u sesiynau glanhau’r traeth ac ambell un o’u digwyddiadau addysg, gan gynnwys eu Harddangosfa Forol a hyfforddiant arolygu sesiynau glanhau’r traeth, a fydd o gymorth i mi ar sesiynau glanhau’r traeth yn y dyfodol. Mae wedi bod yn brosiect gwych i fod yn rhan ohono!

Dywedodd Howard Sutcliffe, Swyddog Arweiniol Tirwedd Genedlaethol Bryniau Clwyd a Dyffryn Dyfrdwy: “Mae’n braf bod Claudia wedi’i chydnabod am y wobr hon gan nad yw llawer o’r gwaith y mae ein Ceidwaid yn ei wneud i’w weld, ond mae o fudd i fywyd gwyllt a hefyd yn gwella bywydau ein trigolion ac ymwelwyr, mae’r camau bach hyn yn gweithio tuag at dirwedd well ar gyfer cenedlaethau’r dyfodol.”

O glywed bod Claudia wedi derbyn y wobr, dywedodd y Cynghorydd Alan James, Aelod Arweiniol Datblygu Lleol a Chynllunio’r Cabinet: “Llongyfarchiadau mawr i Claudia. Mae hi’n ysbrydoliaeth enfawr i lawer oherwydd ei hymroddiad a’i hymrwymiad i gefnogi a chadw’r cynefin arfordirol penigamp sydd gennym yn y sir.”

Mae’r daith i greu cymunedau sy’n deall dementia ledled Gogledd Cymru wedi dechrau ers tro.

Mae'r Mae Cynllun Cymunedau sy’n Deall Dementia yn ymwneud â helpu i ddatblygu cymunedau sy’n dosturiol, yn gynhwysol ac yn gydnerth i bobl sy’n byw gyda dementia, a hefyd i gynorthwyo eu ffrindiau, eu teuluoedd a’u gofalwyr di-dâl i gynnal cysylltiadau, a byw yn dda yn eu hardaloedd lleol. Lansiodd Bwrdd Partneriaeth Rhanbarthol (BPRh) Gogledd Cymru Gynllun Cymunedau sy’n Deall Dementia Gogledd Cymru ar 1 Ionawr 2024.

Mae’r fenter hon yn adeiladu ar waith gwerthfawr Cymdeithas Alzheimer, y mae ei chynllun bellach wedi dod i ben, ac mae’n golygu cydweithio â chwe chyngor lleol, Cynghorau Gwirfoddol Sirol, Bwrdd Iechyd Prifysgol Betsi Cadwaladr, busnesau lleol, ac elusennau.

Mae Cyngor Gwasanaethau Gwirfoddol Sir Ddinbych (DVSC) wedi gwneud cyfraniad allweddol at ddatblygiad y cynllun, gan rannu arbenigedd o'u prosiect Sir Ddinbych Ymwybodol o Ddementia i gynorthwyo cynghorau eraill a hyrwyddo'r fenter ar draws y rhanbarth.

Dywedodd Rebecca Bowcot, Sir Ddinbych Ymwybodol o Ddementia, DVSC:

“Mae codi ymwybyddiaeth o ddementia ledled Sir Ddinbych wedi bod yn ffordd wych o rymuso unigolion a chymunedau i weithredu er mwyn helpu pobl y mae dementia yn effeithio arnynt yn eu cymunedau lleol. Mae’n hynod werth chweil gweld pobl yn dod at ei gilydd i gyflawni eu nodau unigol yn ymwneud â dymuno cynorthwyo pobl fel y gall pawb barhau i gael eu cynnwys a chyfrannu’n weithredol at fywyd eu cymuned. Rydym yn cynnal cyfarfodydd Rhwydwaith Sir Ddinbych Ymwybodol o Ddementia bob yn ail fis ac mae hynny’n galluogi cymunedau sy’n deall dementia i ddod at ei gilydd i rannu syniadau a chynorthwyo ei gilydd i alluogi eu cymunedau sy’n deall dementia i ddatblygu a ffynnu.”

Dywedodd Dilwyn Jones, Cadeirydd Dinbych sy’n Deall Dementia:

“Roedd yn anrhydedd i mi ddod yn Gadeirydd Dinbych sy’n Deall Dementia a bod yn rhan o’r broses o godi ymwybyddiaeth yn lleol, trwy sesiwn wybodaeth. Rydym wedi gallu rhoddi eitemau megis teclynnau Alexa a chathod a chŵn robotig i helpu'r sawl sy'n byw gyda dementia a'u gofalwyr."

Gall cymunedau sy’n cyfranogi yn y cynllun gael cydnabyddiaeth am eu hymdrechion, a gallai hynny gynnwys:

• Hyfforddiant ar gyfer staff mewn busnesau lleol
• Arwyddion eglur a hawdd eu deall o amgylch y dref
• Gweithgareddau deall dementia

Ar hyn o bryd, mae 12 cymuned yng Ngogledd Cymru yn cael eu cydnabod am eu cynnydd tuag at ddod yn gymunedau sy’n deall dementia, o Ynys Môn i Wrecsam. Rhagwelir y bydd 12 cymuned arall yn ystyried cyflwyno cais am achrediad statws cymuned sy’n deall dementia yn ystod 2025.

Ym mlwyddyn gyntaf y cynllun:

• Cynorthwywyd dros 1,000 o bobl sy'n byw gyda dementia a'u gofalwyr di-dâl trwy grwpiau dementia.
• Mynychodd mwy na 150 o bobl sesiynau hyfforddiant ynghylch dementia.
• Dywedodd dros 1,400 o bobl fod ganddynt wybodaeth well am wasanaethau dementia yn eu cymuned.

Dywedodd un unigolyn sy’n byw gyda dementia:

“Mae bod yn rhan o gymuned sy’n deall dementia yn helpu i sicrhau y caiff eich llais ei glywed. Mae hynny hefyd wedi helpu i hyrwyddo’r grŵp Precious Memories yn y Rhyl sy’n cynnal cyfarfodydd wythnosol ac sy’n ffynhonnell werthfawr o gymorth gan gymheiriaid i bobl”.

Mae hwn yn un o nifer o gynlluniau a gyflwynwyd gan Fwrdd Partneriaeth Rhanbarthol Gogledd Cymru (RPB) a’u partneriaid, sy’n gweithio i sicrhau bod cymunedau’n fwy cynhwysol a grymusol.

I gael rhagor o fanylion am Gynllun Cymunedau sy’n Deall Dementia Gogledd Cymru a sut i gyflwyno cais, cliciwch yma.

Dementia cyntaf yng Ngogledd Cymru I gael rhagor o wybodaeth am waith DVSC, cliciwch yma.

Oherwydd costau cynyddol, cytunwyd i gynyddu cost prydau ysgol 5c, a fydd yn cael ei weithredu ar Ebrill 28.

Mae’r Gwasanaeth Arlwyo Ysgolion wedi’i gydnabod yn ddiweddar fel y gwasanaeth arlwyo sy’n perfformio orau yng ngwobrau’r Gymdeithas er Rhagoriaeth Gwasanaeth Cyhoeddus (GRGC) yn gynharach eleni.

Mae'r gydnabyddiaeth hon, gan y Gymdeithas er Rhagoriaeth Gwasanaethau Cyhoeddus yn seiliedig ar gymariaethau â gwasanaethau prydau ysgol eraill o bob rhan o'r DU.

Mae'n ystyried agweddau fel y nifer sy'n cael prydau bwyd am ddim ac am dâl, hyfforddiant staff, perfformiad y gwasanaeth a rheolaeth y gwasanaeth.

Dywedodd y Cynghorydd Diane King, Aelod Arweiniol Addysg, Plant a Theuluoedd:

“Ni chymerwyd y penderfyniad i gynyddu cost prydau ysgol yn ysgafn, ond hyd yn oed ar ôl y cynnydd hwn, bydd y prisiau newydd hyn yn dal yn gymharol isel o gymharu ag awdurdodau lleol eraill.

“Fel y gwelwyd yn eu llwyddiant diweddar yng ngwobrau GRGC, mae gwasanaeth Arlwyo Ysgolion y Cyngor wedi ymrwymo i ddarparu gwerth am arian o ran ansawdd y bwyd a roddir i ddisgyblion ar draws ein hysgolion”.

I weld y fwydlen prydau ysgol, neu am fwy o wybodaeth ewch i wefan prydau ysgol Sir Ddinbych.

Bydd cerbyd traws gwlad trydan, a gynhyrchwyd yn y DU, yn ymuno â fflyd y Cyngor gan fentro ar fryniau Sir Ddinbych a’r ardaloedd cyfagos.

Mae Adran Fflyd Cyngor Sir Ddinbych wedi sicrhau cerbyd Munro 4x4 trydan Cyfres M i gefnogi’r tîm Tirwedd Cenedlaethol Bryniau Clwyd a Dyffryn Dyfrdwy.

Mae’r cerbyd wedi’i gefnogi’n rhannol drwy gyllid llenwi bwlch gan Wasanaeth Ynni Llywodraeth Cymru.

Bydd y cerbyd traws gwlad, sydd wrthi’n cael ei gynhyrchu yn yr Alban ar hyn o bryd, yn disodli tryc sy’n cael ei bweru gan danwydd ffosil ac sydd wedi dod i ddiwedd ei oes yn y fflyd. Bydd wedi’i leoli ym Mharc Gwledig Loggerheads.

Bydd ceidwaid cefn gwlad yn defnyddio’r Cerbyd Cyfres M, y cerbyd cyfres cyntaf i ddod o’r Alban ers dros 40 o flynyddoedd, i gefnogi eu rolau dyddiol wrth reoli’r tirweddau yn eu hardal.

Dewiswyd y cerbyd i fynd i’r afael â thirwedd Bryniau Clwyd a safleoedd bryniog eraill, oherwydd y profion manwl a gynhaliwyd ar bob math o sefyllfaoedd oddi ar y ffordd a’i allu i ymdopi â llethrau serth dros 40 gradd.

Mae cyflwyno Munro yn rhan o ymdrech barhaus Cyngor Sir Ddinbych i leihau allyriadau carbon y fflyd, gwella ansawdd yr aer, a lleihau costau cynnal a chadw a gwasanaeth hirdymor drwy ddisodli cerbydau ar ddiwedd eu hoes gyda cherbydau trydan cyfwerth.

Dywedodd y Cynghorydd Barry Mellor, Aelod Arweiniol yr Amgylchedd a Chludiant: “Mae’r Cyngor yn parhau i ymrwymo i fynd i’r afael â’r Argyfwng Hinsawdd ac Ecolegol a ddatganwyd yn 2019 a braf yw gweld cerbyd trydan a ddatblygwyd yn y DU yn disodli cerbyd tanwydd ffosil sydd wedi dod i ddiwedd ei oes. Bydd yn darparu gwasanaeth traws gwlad cadarn ar gyfer y ceidwaid tra’n gwneud teithio’n fwy gwyrdd a glân a gan leihau costau tanwydd a chynnal a chadw ar yr un pryd. Cerbyd delfrydol i’w gael yn ein Hardal o Harddwch Naturiol Eithriadol.”

Dywedodd Russell Peterson, Prif Weithredwr a Chyd-Sylfaenydd Munro Vehicles: “Rydym yn falch iawn o fod mewn partneriaeth gyda Chyngor Sir Ddinbych, fel yr awdurdod lleol cyntaf yng Nghymru i ddefnyddio Munro Cyfres-M. Mae hyn yn nodi cam arwyddocaol tuag at allu traws-gwlad, cynaliadwy ar gyfer gwasanaethau cyhoeddus. Mae ymrwymiad Sir Ddinbych i arloesedd a sero net yn cyd-fynd yn berffaith â’n hymgyrch i ddarparu cerbydau 4x4 trydan sy’n gadarn a dibynadwy. Rydym yn edrych ymlaen at weld y Cerbyd Cyfres-M ar waith, gan brofi y gall cerbydau heb allyriadau gyflawni’r tasgau mwyaf heriol.”

Mae gwaith wedi’i gwblhau ar ymestyn cynllun i gefnogi natur leol ym Mharc Gwledig Loggerheads.

Mae Tîm Bioamrywiaeth y Cyngor a Cheidwaid Cefn Gwlad Loggerheads wedi creu ardal o flodau gwyllt Caru Gwenyn ar hyd y glannau a grëwyd gan y gwaith amddiffyn rhag llifogydd a gwblhawyd yn ddiweddar ger adeiladau’r parc.

Mae’r Cynllun Caru Gwenyn yn fenter i sicrhau bod Cymru’n gyfeillgar i beillwyr gyda chefnogaeth Llywodraeth Cymru a Phartneriaeth Bioamrywiaeth Cymru.

Crëwyd y safle Caru Gwenyn cyntaf ym Mharc Gwledig Loggerheads yn y maes parcio’r llynedd.

A nawr mae ail safle wedi’i leoli ar y glannau newydd a adeiladwyd ar hyd yr Afon Alun ar ôl cwblhau gwaith atal llifogydd ar y safle gyda chyllid Llywodraeth y DU.

Eglurodd Ellie Wainwright, Swyddog Bioamrywiaeth: “Dyma’r ail Ardal Caru Gwenyn yn Loggerheads! Rydym wedi plannu dros 200 o blanhigion blodau gwyllt yn yr ardal gyda chymorth myfyrwyr profiad gwaith. Tyfwyd y cyfan ar ein cyfer gan y Ganolfan Sgiliau Coetir ym Modfari o hadau lleol a gasglwyd o ddolydd blodau gwyllt Sir Ddinbych, fel rhan o’n Prosiect Caru Gwenyn.

“Y rhywogaethau yr ydym wedi’u plannu yn yr ardal newydd i gefnogi natur leol yw gludlys coch, y bengaled, crafanc brân y gweunydd, clust y gath, peradyl yr hydref, pys y ceirw a bysedd y cŵn.”

Meddai’r Cynghorydd Barry Mellor, Aelod Arweiniol yr Amgylchedd a Chludiant: “Mae ein dolydd yn hanfodol ar gyfer cefnogi natur leol sydd wedi dioddef effeithiau’r Newid yn yr Hinsawdd. Bydd sefydlu mwy o safleoedd o dan fenter Caru Gwenyn fel yr ardal wych yn Loggerheads yn darparu gwell cefnogaeth i beillwyr sydd mewn perygl ac sy’n cynorthwyo i roi bwyd ar ein byrddau ac yn cynyddu bioamrywiaeth a lliw er mwyn i’r ymwelwyr eu mwynhau wrth ymweld â’r parc”.

Yn ddiweddar, mae Swyddog Digidol Cyngor Sir Ddinbych wedi bod yn gweithio gyda phreswylwyr a busnesau sydd wedi’u lleoli mewn ardaloedd gwledig, er mwyn sicrhau cysylltiad rhyngrwyd gwell drwy Brosiectau Ffibr Cymunedol Openreach.

Mae’r Prosiect Ffibr Cymunedol yn rhoi’r cyfle i breswylwyr a busnesau i gael mynediad at well band eang gydag Openreach, er nad ydyn nhw’n rhan o’u cynlluniau cyflwyno presennol.

Mae yna bedwar cynllun Partneriaeth Ffibr Openreach yn y Sir ar hyn o bryd sy’n tynnu tua’r terfyn, a fydd yn darparu cysylltiad rhyngrwyd ffibr llawn ar gyfer 803 eiddo gwledig yng Nghlawddnewydd, Llidiart-y-Parc, Glyndyfrdwy, Tremeirchion a Llandyrnog.

Meddai Philip Burrows, Swyddog Digidol Sir Ddinbych: “O bosibl y bydd rhai cymunedau yn profi problemau, lle bydd angen ymyrraeth gan Openreach, fodd bynnag, ni all unigolion gysylltu’n uniongyrchol ag Openreach, ac mae hynny’n rhan o fy rôl i fel Swyddog Digidol y Cyngor.

“Gallaf fod yn gyswllt rhwng y ddwy ochr gyda’r gobaith o leihau’r straen o ddelio gyda phroblemau o’r fath. Gallaf hefyd gynghori ar sut i sicrhau cyllid i sefydlu Partneriaethau Ffibr Cymunedol os oes yna gymunedau penodol sy’n profi problemau tebyg”.

Meddai’r Cynghorydd Emrys Wynne, Aelod Arweiniol y Gymraeg, Diwylliant a Threftadaeth: “Rwy’n falch o glywed am y cynlluniau sydd ar waith i ddarparu cysylltiad rhyngrwyd dibynadwy i gymunedau mwyaf anghysbell ein Sir. Mae Cyngor Sir Ddinbych wedi ymrwymo i helpu preswylwyr ddeall y dewisiadau a’r atebion ar gyfer cysylltiad rhyngrwyd gwell, sy’n hollbwysig yn yr oes ddigidol rydym yn byw ynddi.

“Dw i’n annog unrhyw un sydd eisiau dysgu mwy am y cyllid amrywiol sydd ar gael neu sy’n cael problemau gyda’u rhyngrwyd i gysylltu â Philip a fydd y gallu eich cynghori ar y camau gorau i’w cymryd.”

Os hoffech gael rhagor o wybodaeth neu drafod sut y byddai modd i chi gyflymu eich mynediad i’r rhyngrwyd, cysylltwch â Philip Burrows ar communitydevelopment@sirddinbych.gov.uk

Mae'r tŷ tref ffrâm bren chwil-chwâl sy'n cynnig dros 500 mlynedd o hanes i ymwelwyr o dan yr un to a’r gerddi cudd hardd, yn llawn arddangosfeydd, gweithgareddau a llwybrau newydd diweddar, wedi'u cynllunio i adrodd hanes diddorol yr atyniad hanesyddol hwn, mewn ffyrdd newydd a rhyngweithiol.

Un o brif uchafbwyntiau ar gyfer 2025 yw cyflwyno arogleuon hanesyddol. O ganhwyllau gwerog myglyd yn yr ystafell ganoloesol, i fara ffres yn y gegin a rhosod cain yn yr ystafell wely Georgaidd, mae persawr atgofus yn ychwanegu at y profiad ymgolli, gan ategu'r gwisgoedd cyfnod, seinweddau, a gweithgareddau ymarferol sy'n helpu i ddod â hanes Nantclwyd y Dre yn fyw.

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth: "Edrychaf ymlaen at Nantclwyd y Dre yn agor y drysau unwaith eto. Mae'n ddarn hanfodol o hanes Rhuthun ac yn wir Sir Ddinbych. Mae'r tŷ tref, tawelwch y gerddi yn rhai o'r rhesymau dros ymweld â Nantclwyd y Dre a byddwn yn eich annog chi i gyd i wneud hynny."

Meddai Kate Thomson, Rheolwr Safle Nantclwyd y Dre: "Rydym yn edrych ymlaen yn fawr at groesawu ymwelwyr yn ôl am dymor arall. Mae ein staff a'n gwirfoddolwyr brwdfrydig yn rhoi'r cyffyrddiadau olaf i'r ffyrdd newydd sydd gennym i ymwelwyr archwilio'r tŷ a'r gerddi - ni allwn aros i weld ymwelwyr yn eu mwynhau!"

Wedi'i gynllunio i wneud hanes yn 'ymarferol', mae profiad unigryw ymwelwyr Nantclwyd y Dre yn cynnig digon o ffyrdd i ymwelwyr o bob oed ddysgu am y tŷ a phrofi sut beth oedd bywyd bob dydd i'r cymeriadau a fu'n byw ac yn gweithio yma. Yn dal statws Trysor Cudd, achrediad Plant mewn Amgueddfeydd a sgôr o 4.5 seren ar TripAdvisor, mae Nantclwyd y Dre yn cynnig taith bleserus iawn i selogion hanes a theuluoedd fel ei gilydd.

Bydd Nantclwyd y Dre ar agor rhwng 10.30am a 4.30pm (mynediad olaf 3.30pm), dydd Iau – dydd Sadwrn tan 30 Medi 2025. Am fanylion llawn am oriau agor a phrisiau tocynnau, ewch i www.sirddinbych.gov.uk/treftadaeth.

Mae’r hen dŷ rhyfeddol hwn, lle trigai’r anfarwol Ferched Llangollen tua diwedd y ddeunawfed ganrif, yn ailagor unwaith eto ddechrau mis Ebrill.

Daliodd y Foneddiges Eleanor Butler a Miss Sarah Ponsonby ddychymyg cymdeithas yng nghyfnod y Rhaglywiaeth. Deuai llu o ymwelwyr i’r bwthyn bach diymhongar a weddnewidiwyd gan y Merched ar hyd y blynyddoedd yn ffantasi Gothig o wydr lliw a phren derw wedi’i naddu’n gain. Cewch ddysgu mwy am eu hanes rhyfeddol a phrynu tocynnau i ymweld â’r tŷ rhwng 11am a 4pm, saith niwrnod yr wythnos.

Gallwch gael te, fel y gwnaeth Wordsworth, Syr Walter Scott a Dug Wellington ers talwm, a mwynhau tamaid blasus i’w fwyta yn ystafelloedd te’r Hen Stabl rhwng 10am a 4pm bob dydd o Ebrill 1 ymlaen.

Mae gerddi Plas Newydd yn enwog am eu rhamant a’u hanes cyfoethog. Roedd y Merched wrth eu boddau â byd natur a garddio, ac aethant ati i weddnewid y gerddi’n lle rhamantus, llawn planhigion lliwgar, llwybrau troellog, rhaeadrau ac addurniadau sy’n dal i gyfareddu ymwelwyr hyd heddiw. Cewch grwydro’r gerddi’n rhad ac am ddim bob dydd, gydol y flwyddyn, o 8am nes mae hi’n nosi.

Cadwch lygad am ddigwyddiadau a gynhelir cyn bo hir, a hyrwyddir yn lleol ar dudalen Facebook Plas Newydd, Llangollen: www.facebook.com/plasnewyddllangollen Bydd tymor 2025 yn llawn o weithgareddau difyr fel gweithdai crefft, teithiau tywys a darlithoedd yn y gerddi, digwyddiadau hanesyddol, dramâu, perfformiadau a gweithgareddau i deuluoedd, gan gynnwys yr helfeydd trysor tymhorol sy’n arbennig o boblogaidd â phlant ac yn cynnig gwobrau newydd gwych. Eleni, bydd Plas Newydd hefyd yn cynnal yr wythnos gyntaf erioed i glodfori Gwaddol Merched Llangollen ym mis Mehefin, pan fyddwn yn cynnal llu o weithgareddau’n canolbwyntio ar y Merched, eu hanes unigryw a’r gwaddol y maent wedi’i adael inni.

“Mae gan y tîm ym Mhlas Newydd raglen gyffrous o ddigwyddiadau a phethau newydd i’w rhannu â’n hymwelwyr yn 2025, ac rydyn ni’n edrych ymlaen at groesawu pobl o bell ac agos,” meddai Sallyanne Hall, Swyddog Cyswllt Cymunedol y Dirwedd Genedlaethol.

Dywedodd y Cynghorydd Alan James, Aelod Arweiniol Datblygu Lleol a Chynllunio: “Mae Plas Newydd yn drysor hanesyddol yr ydym ni’n ffodus iawn o’i gael yma ar garreg ein drws yn Sir Ddinbych. Mae’r eiddo hanesyddol yn gyfle i archwilio cyfoeth o hanes ac mae’n le gwych i ymweld ag o yn 2025.”