Mali Flur Owen, Cynorthwyydd Gofal, Cartref Gofal Dolwen
Mae Mali yn unigolyn sydd â ffocws mawr a’i gyrfa’n greiddiol i’w bywyd, ac o oedran ifanc, cefnogodd ei Mam trwy ddarparu gofal a chefnogaeth i'w brawd hŷn ag anableddau cymhleth, yn ogystal â darparu gofal diwedd oes i'w Thaid a oedd â dementia.
Nid oedd Mali’n gweithio ond fe wnaeth ei rolau gofalu o fewn y teulu ei hysbrydoli i ymuno â'r sector gofal fel llwybr gyrfa dewisol. Er nad oedd gan Mali brofiad uniongyrchol o fewn y sector roedd ganddi'r empathi a'r angerdd i anelu at ei nodau.
Ar ôl mynychu diwrnod agored ‘Camu Mewn i Waith’ sy’n cael ei redeg gan Fwrdd Iechyd Prifysgol Betsi Cadwaladr, cofrestrodd Mali ar y Rhaglen ‘Blas ar Ofal’. (Mae’r Rhaglen Blas ar Ofal yn Brosiect Gofal Cymdeithasol sy’n mynd i’r afael â’r angen am staff cynaliadwy, cymwys a phroffesiynol yn y Sector Gofal).
Rhoddodd y rhaglen wybodaeth fanwl i Mali am y sector gofal, gan gynnwys cyfleoedd gyrfa, manylion yr hyfforddiant gorfodol a’r disgwyliadau o weithwyr. Ar ôl cwblhau'r rhaglen hon, roedd Mali yn 'barod am swydd'. Unwaith y bydd y rhaglen orfodol wedi'i chwblhau a'r cyfranogwyr yn “barod am swydd”, maent yn camu ‘mlaen i gwblhau lleoliad i gael profiad ymarferol trwy leoliad 4 wythnos, gyda lleiafswm o 8 awr yr wythnos.
Ar ôl cwblhau’r Rhaglen Blas ar Ofal cofrestrodd Mali ar Gynllun Dechrau Gweithio, Sir Ddinbych yn Gweithio ar ôl gweld lleoliad 12 wythnos yn Nolwen wedi’i hysbysebu ar wefan Swyddi Den Sir Ddinbych yn Gweithio.
Cefnogodd Sir Ddinbych sy'n Gweithio Mali trwy gydol ei chais a derbyniodd y lleoliad yn llwyddiannus.
Trwy gydol ei lleoliad, rhoddodd Mali gefnogaeth ymarferol ac emosiynol i'r preswylwyr mewn digwyddiadau cymdeithasol, sesiynau crefft ac amser bwyd. Rhoddodd hyn y profiadau angenrheidiol iddi weithio ym maes Gofal. Cwblhaodd Mali hefyd ei hyfforddiant Codi a Chario a Chymorth Cyntaf fel rhan o'i lleoliad.
Roedd Mali yn awyddus i wneud cais i gael swydd barhaol mewn gofal a thua diwedd ei lleoliad, daeth yn ymwybodol o swydd wag Cynorthwyydd Gofal yng Nghartref Gofal Dolwen. Helpodd Swyddog Cymorth Prosiect y Cynllun Dechrau Gweithio Mali i lenwi'r ffurflen gais, ysgrifennu datganiad personol a rhoddwyd cymorth ar ôl cyfweliad hefyd a oedd yn cynnwys ffug gyfweliad. Llwyddodd Mali i gael y swydd, a ddechreuodd ar ei phen-blwydd yn 18 oed ac mae'n parhau â'i chymhwyster Pasbort i Ofal ochr yn ochr â'i swydd.
Mae’r stori lwyddiant hon yn dangos y budd enfawr o ddilyn a galluogi ymagwedd strategol at gyflogadwyedd a chymorth sgiliau. Roedd cefnogaeth Mali yn cynnwys:
- Rhaglen Blas ar Ofal - lefel mynediad ac anwytho i'r sector Gofal
- Cefnogaeth mentora 1-2-1 – Swyddog Cefnogi Lleoliad Sir Ddinbych yn Gweithio
- Lleoliad gwaith cyflogedig 12 wythnos – Cynllun Dechrau Gweithio Sir Ddinbych yn Gweithio
- Hyfforddiant – cymhwyster sy'n gysylltiedig â'r sector
Cyflawnwyd hyn i gyd, gan alluogi Mali i wneud y mwyaf o incwm a'i hatal rhag gorfod cael cymorth budd-daliadau. Dywedodd Mali heb gefnogaeth Blas ar Ofal a’r Cynllun Dechrau Gweithio a’i Swyddog Cefnogi Lleoliad y byddai’n dal i chwilio am waith.
Gwybodaeth Bellach:
Sir Ddinbych yn Gweithio - Y Cynllun Dechrau Gweithio
Mae’r rhaglen cynllun Dechrau Gweithio yn cynnig cyfle i ddinasyddion Sir Ddinbych sy’n ddi-waith neu’n economaidd anweithgar gael profiad gwaith â thâl neu’n ddi-dâl o fewn sectorau amrywiol. Y gwerth ychwanegol yw'r gefnogaeth a ddarperir trwy gydol y lleoliad ar gyfer y cyfranogwr a'r cyflogwr yn ogystal â'r cyfleoedd hyfforddi am ddim i uwchsgilio a sicrhau swydd barhaol.
- Proses recriwtio
- Cyflwyno cais CV i gynllun Dechrau Gweithio
- Swyddog lleoliad wedi'i neilltuo i'r swydd wag
- Cael gwahoddiad i fynychu cyfweliad cyn sgrinio
Mae’r Cynllun Dechrau Gweithio ar gael i unrhyw un sy’n 16 oed neu’n hŷn sy’n byw yn Sir Ddinbych ac sydd angen cymorth i ennill profiad gwerthfawr yn y gweithle yn ogystal â gwybodaeth a sgiliau.
Mae'n efelychu cyfle cyflogaeth gwirioneddol lle gwahoddir ceisiadau a chynhelir cyfweliadau cyn sgrinio sydd hefyd yn rhoi cyfle i'r ymgeiswyr ofyn cwestiynau am y rôl. Cynigir cymorth pellach i'r ymgeiswyr llwyddiannus i sicrhau bod ganddynt yr hyder a'r wybodaeth i fynychu cyfweliad ffurfiol gyda'r cyflogwr. Gall hyn fod ar ffurf ffug gyfweliadau neu ymchwil. Darperir cymorth ariannol hefyd megis tocynnau teithio a chynigir dillad ar gyfer y cyfweliad lle bo angen er mwyn helpu i gael gwared ar eu rhwystrau rhag dilyniant.
Tra ar y lleoliad mae'r cyfranogwr yn cael Swyddog Cefnogi Lleoliad sy'n darparu cefnogaeth ymarferol ac emosiynol 1-2-1 i'r unigolyn. Mae'r gefnogaeth, er nad yw'n gynhwysol, yn cynnwys trefnu tocynnau teithio am y mis cyntaf hyd nes y byddant yn derbyn eu cyflog, ymweld â'r cyfranogwr a'r cyflogwr trwy gydol y lleoliad yn ôl yr angen, dod o hyd i hyfforddiant, gwneud chwiliadau swydd a diweddaru'r CV.
Croesawu Awtistiaeth yn y gweithle
Trefnodd Sir Ddinbych yn Gweithio gyfres o ddigwyddiadau creadigol i bobl sy’n eu hystyried eu hunain yn Awtistig ac yn cael trafferth dod o hyd i waith, er mwyn gwella eu lles.
Cynhaliwyd y gweithdai yn Costigan’s yn y Rhyl, a thîm Prosiect Barod Sir Ddinbych yn gweithio a’u trefnodd.
Bu’r bardd proffesiynol a chynhyrchydd creadigol lleol, Martin Daw, yn helpu pobl yn y digwyddiadau hyn i gyfansoddi cân a fideo wedi’i animeiddio.
Mae’r gân a’r fideo’n sôn am feddu ar y grym i fynd allan a dod o hyd i waith ac mae’n ceisio annog pobl sy’n eu hystyried eu hunain yn awtistig i fagu dewrder a chael y swydd a ddymunant.
Sir Ddinbych yn Gweithio yn cynnig cyrsiau hyfforddi
Mae Sir Ddinbych yn Gweithio yn cynnig cyfle i ailhyfforddi ac ennill mwy o gymwysterau i unrhyw un sy’n byw yn Sir Ddinbych, gan ganiatáu i fwy o bobl gael swydd newydd neu i symud ymlaen yn eu swyddi presennol.
Mae cyfleoedd hyfforddi hefyd yn cael eu trefnu drwy’r cynllun Dechrau Gweithio, gyda’r nod o uwchsgilio preswylwyr.
Gellir trefnu cynlluniau hyfforddi i breswylwyr sydd â diddordeb mewn gweithio mewn diwydiannau poblogaidd fel Adeiladu, Lletygarwch a Gwallt a Harddwch, ond sydd heb brofiad.
Trefnir cyrsiau drwy gydol y flwyddyn hefyd i unrhyw un sydd eisiau cymhwyster mewn Cymorth Cyntaf neu Iechyd a Diogelwch, sy’n caniatáu iddynt gael cerdyn CSCS.
Mae Sir Ddinbych yn Gweithio yn gweithio’n agos gyda cholegau lleol a darparwyr hyfforddiant eraill.
Meddai Melanie Evans, Prif Reolwr Cyflogaeth Strategol: “Rwyf yn falch bod ein cyrsiau hyfforddi yn boblogaidd yn barod, roedd ein cwrs Barista diweddar yn llawn mewn ychydig ddyddiau.
"Byddwn yn annog unigolion a busnesau yn y sir i gymryd mantais o’r cyfleoedd hyfforddi rydym yn eu cynnig ar hyn o bryd i wella eich siawns o gael swydd sy’n talu’n well, neu os ydych yn fusnes, gwella sgiliau eich tîm.”
Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd: “Mae’r cyrsiau hyfforddi hyn yn gyfle i bobl Sir Ddinbych ehangu eu gorwelion, ac o bosibl, i ddod o hyd i lwybr gyrfa sy’n fwy addas i’w nodau.
"Mae arnom eisiau i holl breswylwyr Sir Ddinbych fwynhau’r yrfa maent yn ei dewis, mewn maes ble gallant fynegi eu hunain a rhagori.”
I gael rhagor o wybodaeth ewch i: https://forms.office.com/e/VK2Ub5Vnmu
Mae Sir Ddinbych yn Gweithio yn cael ei hariannu’n rhannol drwy Raglen Cymunedau am Waith a Mwy Llywodraeth Cymru sy’n cefnogi’r bobl dan yr anfantais fwyaf yn y farchnad lafur i oresgyn y rhwystrau sy’n eu hatal nhw rhag cael gwaith.
Mae Sir Ddinbych yn Gweithio wedi cael £3,529,632 gan Lywodraeth y DU drwy Gronfa Ffyniant Gyffredin y DU.