Sir Ddinbych yn Gweithio
Yn Sir Ddinbych yn Gweithio rydym yma i helpu preswylwyr 16 oed a hŷn a allai fod yn ei chael yn anodd neu sy’n poeni am arian. P’un ai a ydych chi’n chwilio am waith neu angen cefnogaeth i godi eich hun yn ôl ar eich traed, rydym yma i’ch arwain chi tuag at ddyfodol gwell.
Peidiwch â cholli'r cyfle hwn i fuddsoddi yn eich dyfodol, cofrestrwch heddiw www.sirddinbych.gov.uk/sirddinbychyngweithio.
Am fwy o wybodaeth ac i archebu eich lle, ewch i'n tudalennau cyfryngau cymdeithasol @SirDdinbychynGweithio.
Diwrnodau Hyfforddiant a Gwybodaeth
Mae Sir Ddinbych yn Gweithio yn cynnig cyfleoedd hyfforddi rhad ac am ddim i rymuso preswylwyr Sir Ddinbych gyda’r sgiliau sydd eu hangen arnynt i ffynnu yn yr yrfa o’u dewis. P'un a ydych chi’n dymuno datblygu sgiliau newydd, ehangu ar yr hyn rydych chi’n ei wybod eisoes, neu archwilio llwybr gyrfa newydd, mae ein rhaglenni hyfforddi wedi’u teilwra i’ch helpu chi i lwyddo.
Diwrnodau Gwybodaeth:
- Cadw Tir - Diwrnod Gwybodaeth
- Garddwriaeth a Chadwraeth
- Llwybr Sector - Cadw Tir
- Cyflwyniad i'r sector Gofal Cymdeithasol
Hyfforddiant
- Hyfforddiant Barista
- Cymorth Cyntaf Brys yn y Gweithle
I archebu ymweliad, cliciwch ar y ddolen - www.eventbrite.co.uk/o/working-denbighshire-79434827543
Ffair Swyddi yn torri record ac yn croesawu dros 600 o bobl
Ar 19 Chwefror, mynychodd 603 o geiswyr swyddi, Ffair Swyddi Sir Ddinbych yn Gweithio ym Mwyty a Bar 1891 yn y Rhyl, lle roedd cyfle i drigolion gysylltu gyda dros 50 o gyflogwyr o sectorau megis lletygarwch, gweithgynhyrchu, iechyd a gofal cymdeithasol.
Roedd y digwyddiad yn llwyfan i drigolion lleol archwilio cyfleoedd gwaith, llwybrau gyrfa a dewisiadau hyfforddi, ac ymhlith y cyflogwyr a oedd yn bresennol roedd Seren Gobaith, Grŵp Llandrillo Menai, Cyfreithwyr Gamlins, G&H Phoenix, TG Williams Builders Ltd, a Grŵp Bwyd 2 Sisters.
Cynhaliwyd awr dawel rhwng 10am ac 11am ar gyfer unrhyw un oedd yn ffafrio awyrgylch tawelach a Chlwb Swyddi cyn y digwyddiad, a oedd yn cynnig cyngor i geiswyr swyddi o ran CVs a llythyrau eglurhaol.
Meddai Melanie Evans, Prif Reolwr Cyflogaeth Strategol:
“Rydym yn hynod falch fod cymaint wedi mynychu unwaith eto, ac o’r gefnogaeth anhygoel gan ein busnesau lleol.
Yn ogystal â dod o hyd i swydd, mae’r Ffair Swyddi yn gyfle i agor drysau i gyfleoedd newydd a helpu pobl i gymryd camau mentrus tuag at ddyfodol mwy disglair. Mae’n galonogol gweld cymaint o unigolion yn awyddus i wella eu bywydau, datblygu sgiliau newydd, a chysylltu â chyflogwyr sydd wir yn poeni am y gymuned.
Mae digwyddiadau fel hyn yn dangos gwir bŵer dod ynghyd i wneud gwahaniaeth ac yn cefnogi Strategaeth newydd Llywodraeth y DU, i Gael Prydain i Weithio.”
Ychwanegodd y Cynghorydd Jason McLellan, Arweinydd Cyngor Sir Ddinbych:
“Mae cyflogaeth yn un o bileri allweddol cymdeithas weithredol, sy’n ffynnu.
Mae’r Ffeiriau Swyddi hyn yn galluogi cyflogwyr i gysylltu gyda thrigolion sy’n chwilio am waith neu o bosibl newid gyrfa. Rwy’n falch o’r gwaith y mae’r tîm wedi’i wneud unwaith eto eleni i helpu trigolion lleol Sir Ddinbych i ymuno â’r farchnad swyddi.
Mae llwyddiant y digwyddiad hwn yn amlygu pŵer cydweithio â chyflogwyr a busnesau lleol i gefnogi ein cymuned a chreu cyfleoedd cyflogaeth ystyrlon.”
Mae Sir Ddinbych yn Gweithio yn cael ei ariannu’n rhannol drwy Raglen Cymunedau am Waith a Mwy Llywodraeth Cymru, sy’n cefnogi’r bobl sy’n wynebu’r anfantais fwyaf yn y farchnad lafur i oresgyn y rhwystrau sy’n eu hatal rhag cael gwaith.
Ariennir Sir Ddinbych yn Gweithio yn rhannol gan Lywodraeth y DU.
I gael rhagor o wybodaeth am Sir Ddinbych yn Gweithio, ewch i’r wefan.
