Newyddlen Gwirfoddolwyr y Gogledd

Pwll Brickfields

Mae gwirfoddolwyr wedi clirio’r drain duon a’r mieri ar hyd rhan ddeheuol y llwybr ac wedi agor golygfeydd newydd o’r pwll. Defnyddiwyd y torbrennau i greu tomenni o gynefinoedd newydd i helpu twf bioamrywiaeth. Mae’r gwirfoddolwyr hefyd wedi dechrau clirio ardal newydd ar ochr ogleddol y warchodfa, lle’r oeddem yn arfer gweld llygod pengrwn y dŵr. Maen nhw wedi creu tomenni newydd o gynefinoedd ac yn bwriadu plannu mwy o lystyfiant i helpu’r anifeiliaid bach yma.

Coed y Morfa Iasol

Ddydd Mawrth 31 Hydref, bu’r gwirfoddolwyr yn brysur iawn yng Nghoed y Morfa yn gwneud pryfaid cop dychrynllyd yn defnyddio coed cyll wedi’u bôn-docio. Defnyddiwyd amrywiaeth o offer i siapio’r corff, a defnyddiwyd rhywogaethau eraill i wneud y coesau a’r dannedd. Dull traddodiadol o reoli coetir yw bôn-docio, sef torri coed drosodd a throsodd yn y bôn i greu stôl. Mae’r goeden sy’n tyfu’n ôl yn sythach na’r un wreiddiol a gellir ei chynhaeafu mewn cylch yn dibynnu ar ddefnydd arfaethedig y pren wedyn, gan ddarparu ffynhonnell gynaliadwy o bren. Wedi’u rheoli yn defnyddio’r dull yma, mae coed wedi’u bôn-docio yn gallu byw am gannoedd o flynyddoedd. Credir bod y bisgwydden deilen fach yng Ngardd Goed Genedlaethol y Comisiwn Coedwigaeth yn Westonbirt yn oddeutu 2000 o flynyddoedd oed!

Wrth gwrs, dydi pryfaid cop ddim ar gyfer Calan Gaeaf yn unig. Ceir dros 660 o wahanol fathau o bryfaid cop yn y DU. Mae ganddyn nhw ran bwysig iawn yn yr ecosystem – maen nhw’n bwyta amrywiaeth o bryfed ac yn bryd bwyd i sawl anifail arall. Maen nhw’n bwysig ar gyfer rheoli rhywogaethau pla a chadw’r rhan fwyaf o glefydau dan reolaeth. Bydd gennym ni ychydig o sesiynau crefft / gwaith coed wedi’u hariannu gan Natur Er Budd Iechyd gyda hyn, felly cofiwch wirio’r amserlen a’r calendr gwirfoddoli.

Dulliau cynaliadwy ar Safleoedd Newid Hinsawdd

Fel rhan o’n cynllun i greu coetir byddwn yn plannu coed ar sawl safle newydd yng ngogledd y sir. Wrth blannu coed, yn draddodiadol rydym yn ychwanegu haen o domwellt i ddarparu maetholion ac i ddal lleithder ar gyfer y glasbren. Yn ein hymdrechion parhaus i ganfod ffyrdd mwy eco-gyfeillgar a charbon niwtral o wneud ein gwaith, rydym ni wedi penderfynu defnyddio cnu defaid yn lle tomwellt. Gellir cael gafael ar gnu yn hawdd ac mae’n ddefnydd lleol sy’n rhyddhau nitrogen i’r pridd wrth iddo bydru, a bydd yn ddeunydd da i ddal lleithder yn y pridd o amgylch ein coed. I osod y cnu yn ei le byddwn yn creu pegiau pren syml. Fel y gallwch ddychmygu, bydd arnom ni angen llawer o bobl i’n helpu yn y Willow Collective yn y Rhyl ar 8 Rhagfyr i hogi a chreu’r pegiau.

Y wybodaeth ddiweddaraf am wirfoddoli ar yr arfordir

Mae gwirfoddolwyr wedi bod yn helpu i wella’r arwyddion ar hyd Llwybr Arfordir Cymru, drwy osod polion a disgiau arwyddion newydd. Ym mis Tachwedd gosodwyd stribedi gwrthlithro ar y llwybr newydd yn Barkby. Rydym ni hefyd wedi bod yn clirio prysg ar dwyni tywod Traeth y Tŵr, Barkby ac ar badog merlod Gronant.

Mae mwy o gyfleoedd arfordirol ar yr amserlen isod.

Amserlen Gwirfoddolwyr y Gogledd - Rhagfyr / Ionawr

MAN CYFARFOD	TASG	DYDDIAD / AMSER	STAFF ARWEINIOL
Pwll Brickfields, Y Rhyl	Gwaith ar y Llwybr Pren	Dydd Iau 21 Rhagfyr	Vitor Evora  Vitor.evora@sirddinbych.gov.uk
Maes Parcio Traeth Barkby, Prestatyn	Clirio Prysg	Dydd Llun, 8 Ionawr              10am - 3pm	Claudia Smith claudia.smith@sirddinbych.gov.uk
Maes Parcio Isaf, Castell Bodelwyddan	Creu Blychau Adar	Dydd Mercher, 10 Ionawr          10am	Rich Masson richard.masson@sirddinbych.gov.uk
Coed y Morfa, Prestatyn	Ffensys Plethwaith	Dydd Mawrth, 16 Ionawr        10am - 1pm	Sasha Taylor sasha.taylor@sirddinbych.gov.uk
Pwll Brickfields, Y Rhyl	Gwaith ar gynefin - Llygoden bengron y dwr	Dydd Iau, 18 Ionawr              10am - 3pm	Vitor Evora vitor.evora@sirddinbych.gov.uk
Maes Parcio Gwarchodfa Natur Rhuddlan	Plygu gwrychoedd	Dydd Gwener, 19 Ionawr        10am - 3pm	Jim Kilpatrick jim.kilpatrick@sirddinbych.gov.uk
Parc Bruton, Porth Maes Menlli	Gosod rheiliau coed llwyf	Dydd Mawrth, 23 Ionawr        10am - 3pm	Sasha Taylor sasha.taylor@sirddinbych.gov.uk
Pwll Brickfields, Y Rhyl	Plygu gwrychoedd	Dydd Iau, 25 Ionawr              10am - 3pm	Vitor Evora vitor.evora@denbighshire.gov.uk
Gât mynediad Ysgol Llanfair Dyffryn Clwyd	Plannu gwrych	Dydd Gwener, 26 Ionawr        10am - 3pm	Matt Winstanley matt.winstanley@sirddinbych.gov.uk