Annog mwy o bobl i ddod yn ofalwyr maeth

Mae ymchwil newydd yn tynnu sylw at yr arbenigedd a’r cymorth a ddarperir gan weithwyr cymdeithasol yn Sir Ddinbych, er mwyn ceisio annog mwy o bobl i faethu. Gyda dros 7,000 o bobl ifanc mewn gofal ledled Cymru – 198 ohonynt yma yn Sir Ddinbych – mae’r angen am fwy o Ofalwyr Maeth yn fwyfwy pwysig. 

Ym mis Ionawr, lansiodd y rhwydwaith cenedlaethol o 22 o dimau maethu awdurdodau lleol Cymru, Maethu Cymru, ymgyrch i recriwtio 800 o deuluoedd maeth ychwanegol erbyn 2026. Ymunodd Maethu Cymru Sir Ddinbych â’r ymgyrch, ‘gall pawb gynnig rhywbeth’ i rannu profiadau realistig y gymuned faethu ac ymateb i rwystrau cyffredin sy’n atal pobl rhag gwneud ymholiad. Mae rhai o’r rhain yn cynnwys diffyg hyder, camsyniadau ynghylch meini prawf, a chred nad yw maethu’n cyd-fynd â rhai ffyrdd o fyw.

I ddarllen mwy am yr ymgyrch 'Gall Pawb Gynnig Rhywbeth' a hefyd sut y gallech ddod yn ofalwr maeth, ewch i wefan Maethu Cymru Sir Ddinbych.