Digwyddiadau am ddim i gefnogi trigolion
Mae Sir Ddinbych yn Gweithio yn cynnig digwyddiadau misol yn rhad ac am ddim wedi'u cynllunio i gefnogi trigolion 16 oed a hŷn i wella eu sgiliau, gwella eu lles, a symud yn nes at gyflogaeth. Mae'r digwyddiadau hyn yn darparu amgylchedd croesawgar i ddysgu pethau newydd, cysylltu ag eraill, a chynyddu eich hyder. P'un a ydych am archwilio cyfleoedd am swydd newydd, datblygu eich sgiliau proffesiynol, neu roi hwb i'ch lles personol, mae ein digwyddiadau yma i helpu. Peidiwch â cholli'r cyfle hwn i fuddsoddi yn eich dyfodol - cofrestrwch heddiw!
Am fwy o wybodaeth ac i archebu eich lle, ewch i'n tudalennau cyfryngau cymdeithasol @SirDdinbychynGweithio / @WorkingDenbighshire
- Sesiwn galw i fewn yn Llyfrgell Y Rhyl:
-
- Dydd Mawrth 17 Rhagfyr rhwng 2pm – 4pm
- Dydd Iau 19 Rhagfyr rhwng 10am – 12pm
- Sesiwn galw i fewn yn Llyfrgell Corwen:
-
- Dydd Mercher 4 Rhagfyr rhwng 10am – 12pm WEDI BOD
- Sesiwn galw i fewn yn Llyfrgell Llangollen:
-
- Dydd Mercher 18 Rhagfyr rhwng 2pm – 4pm
- Sesiwn galw i fewn yn Hwb Dinbych:
-
- Dydd Iau 19 Rhagfyr rhwng 10am – 12pm
- Sesiwn galw i fewn yn Llyfrgell Rhuthun:
-
- Dydd Iau 12 Rhagfyr rhwng 1pm – 3pm WEDI BOD
- Sesiwn galw i fewn yn Llyfrgell Prestatyn:
-
- Dydd Gwener 20 Rhagfyr rhwng 10am – 12.30pm
Digwyddiadau gwybodaeth a lansiwyd i gefnogi ceiswyr gwaith
Mae cyfres o ddigwyddiadau gwybodaeth rhad ac am ddim wedi’u lansio, gyda’r bwriad o helpu preswylwyr Sir Ddinbych i archwilio dewisiadau gyrfa ar draws diwydiannau gwahanol. Mae’r sesiynau hyn, a gynhelir o ddiwedd mis Tachwedd a thrwy fis Rhagfyr, yn gyfle i ddysgu mwy am swyddi, datblygiad gyrfa, sgiliau, hyfforddiant, cyflog a’r hyn y mae cyflogwyr yn chwilio amdano yn y sectorau allweddol.
Dyma amserlen y digwyddiadau:
Gweithio ym Maes Gofal Cymdeithasol
- Diwrnod Gwybodaeth: 10 Ionawr, 10am – 11am, Swyddfa Sir Ddinbych yn Gweithio, Llyfrgell y Rhyl, Stryd yr Eglwys, y Rhyl, LL18 3AA
Gweithio yn y Sector Lletygarwch
- Diwrnod Gwybodaeth: 17 Rhagfyr, 1pm – 2:30pm: Swyddfa Sir Ddinbych yn Gweithio, Llyfrgell y Rhyl, Stryd yr Eglwys, y Rhyl, LL18 3AA gyda Sophie, Siaradwr Gwadd o Hamdden Sir Ddinbych.
Yn dilyn y diwrnodau gwybodaeth, bydd rhai o’r sectorau hyn hefyd yn cynnig sesiynau blasu ymarferol, gan roi cyfle i’r sawl a fynychodd gael syniad o’r amgylchedd gwaith ym mhob sector. Cynhelir sesiwn flasu’r sector Coedwigaeth a Chadwraeth ar 5 Rhagfyr rhwng 12:30pm a 4pm, a bydd sesiynau tebyg i ddilyn.
Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd:
“Mae digwyddiadau sector Sir Ddinbych yn Gweithio yn enghraifft wych o sut yr ydym yn helpu preswylwyr i ddod o hyd i yrfaoedd gwerth chweil. Mae’r sesiynau hyn yn rhoi mynediad uniongyrchol i bobl at wybodaeth a chipolwg ar ddiwydiannau, sy’n ffordd wych o roi hwb i gyflogaeth leol a chryfhau ein cymuned.”
Meddai Rachael Sumner-Lewis, Rheolwr Perthnasoedd Cyflogwyr a Hyfforddiant, Sir Ddinbych yn Gweithio:
“Nod ein digwyddiadau gwybodaeth am sectorau yw pontio’r bwlch rhwng ceiswyr gwaith a diwydiannau lleol. Drwy edrych yn fanwl ar bob sector, rydym yn eu cefnogi i ddatblygu sgiliau, ailhyfforddi neu hyd yn oed cael cipolwg ar y farchnad swyddi.”
I gael rhagor o wybodaeth ac er mwyn archebu eich lle, ewch i gwefan Eventbrite.
I gael rhagor o wybodaeth am Sir Ddinbych yn Gweithio a’r gefnogaeth sy’n cael ei chynnig drwy’r gwasanaeth, ewch i’r wefan.
Ariennir Sir Ddinbych yn Gweithio yn rhannol drwy Raglen Cymunedau am Waith a Mwy Llywodraeth Cymru, sy’n cefnogi’r rhai sydd dan yr anfantais fwyaf yn y farchnad lafur i oresgyn y rhwystrau sy’n eu hatal rhag cael gwaith.
Ariennir Sir Ddinbych yn Gweithio yn rhannol gan Lywodraeth y DU.
Preswylydd o Sir Ddinbych yn cyflawni rôl wrth frwydro yn erbyn heriau meddygol
Swydd ddelfrydol Emily o Sir Ddinbych oedd gweithio ym myd addysg. Mae hi wedi brwydro i oresgyn rhwystrau personol a phroffesiynol a sicrhau lleoliad dechrau gweithio fel Cymhorthydd Addysgu yn Ysgol Frongoch, er gwaetha’r ffaith ei bod hi’n wynebu heriau meddygol.
Roedd Epilepsi bob amser am ddylanwadu ar daith Emily at gyflogaeth. Mae’n gyflwr meddygol sydd wedi effeithio'n sylweddol ar ei hyder a’i phrofiadau bywyd. Ers cael diagnosis, mae Emily wedi wynebu amryw heriau, o lywio bywyd ysgol i oresgyn canfyddiadau cymdeithas.
Mae Emily yn gweld ei Hepilepsi fel cyflwr meddygol, ond mae’n cydnabod y bydd pobl eraill ag Epilepsi yn gweld pethau’n wahanol. Cafodd hyn effaith fawr ar ei bywyd, yn enwedig yn ystod yr ysgol uwchradd, pan oedd angen cymorth arni fel cadeiriau arbenigol a chymorth un i un, gan wneud iddi deimlo’n hunan-ymwybodol o flaen ei chyfoedion. Soniodd am fethu allan ar brofi cerrig milltir allweddol yn ei harddegau, fel mynd allan gyda ffrindiau, dysgu sut i yrru, a chanfod swydd ddiogel.
Roedd Emily’n benderfynol o wneud newid cadarnhaol a helpu pobl ifanc eraill a chysylltodd â Sir Ddinbych yn Gweithio ar ôl dysgu am y gwasanaeth trwy ei gweithiwr cymdeithasol. Soniodd Emily am ei dymuniad i weithio gyda phlant ac roedd am gynyddu ei phrofiad trwy weithio mewn ysgol.
Yna cafodd Emily ei pharu â Mentor, Byron, a ddaeth o hyd i leoliadau perthnasol a chysylltu ag Ysgol Frongoch, i drafod y posibilrwydd o drefnu lleoliad di-dâl, trwy gynllun Dechrau Gweithio Sir Ddinbych yn Gweithio. Gan weld potensial Emily, cefnogodd y Pennaeth Dylan Thomas y fenter a sicrhau bod swydd ar gael iddi wneud cais amdani.
Gyda chefnogaeth ei mentor, cymerodd Emily ran mewn hyfforddiant arbenigol trwy Gronfa Ddysgu Undebau Cymru, gan gynnwys cyrsiau mewn Cynllunio Gwersi i Gymorthyddion Addysgu, Rheoli Ymddygiad yn yr Ystafell Ddosbarth, Tystysgrif Cymhorthydd Addysgu Lefel 2 a Diogelu Myfyrwyr, er mwyn rhoi hwb i’w hyder a gwella sgiliau eraill oedd eu hangen ar gyfer y lleoliad hwn.
Ar ôl cwblhau cyrsiau angenrheidiol, trefnodd Byron gyfweliad cyn sgrinio yn yr ysgol i Emily. Roedd ei hymroddiad yn ystod ei lleoliad cyntaf wedi creu argraff barhaus, a chynigiwyd lleoliad fel Cymhorthydd Addysgu i Emily. Bydd hyn yn rhoi profiad perthnasol iddi a chyfle i gael swydd gyflogedig.
Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd:
“Mae stori Emily yn enghraifft ysbrydoledig o sut gall penderfyniad, cefnogaeth wedi’i theilwra a chyfleoedd cynhwysol drawsnewid bywydau. Mae Sir Ddinbych yn Gweithio wedi ymrwymo i rymuso unigolion i oresgyn rhwystrau a chyflawni eu dyheadau. Mae’r llwyddiant hwn yn amlygu pwysigrwydd creu gweithleoedd sy’n croesawu a chefnogi unigolion dawnus â chyflyrau meddygol, gan sicrhau bod pawb yn cael cyfle i ffynnu.”
Trwy gydol y broses, bu Sir Ddinbych yn Gweithio yn gweithio’n agos gydag Ysgol Frongoch i sicrhau bod anghenion meddygol Emily yn cael eu cefnogi’n llawn. Mae’r bartneriaeth hon yn dangos pwysigrwydd recriwtio unigolion dawnus â chyflyrau meddygol ac mae’n amlygu’r gwerth y gall ymgeiswyr posibl ei rhoi i’r gweithle, gyda chefnogaeth effeithiol.
Ychwanegodd Dylan Thomas, Pennaeth Ysgol Frongoch:
‘’Cafodd Emily y cyfle i weithio yn Frongoch ac mae hi wedi goresgyn nifer o rwystrau i sicrhau ei bod hi’n barod i ddechrau ei hamser yn y gweithle. Gobeithir mai dyma’r cyntaf o nifer o gyfleoedd i Emily yn y gweithle.’’
Mae Sir Ddinbych yn Gweithio yn ymrwymedig i hyrwyddo cyfle cyfartal a dangos sut gall arferion cynhwysol fod o fudd i gyflogwyr a gweithwyr.
Wrth fyfyrio ar ei phrofiad, dywedodd Emily:
‘’Roedd cael y cyfle i weithio yn Ysgol Frongoch ar ôl gorffen fy arholiadau lefel A yn gyfle anhygoel i mi. Gwnaeth Sir Ddinbych yn Gweithio helpu i ddatblygu fy sgiliau cyfweliad, adeiladu fy hyder ac ehangu fy newis o swyddi. Dwi’n ddiolchgar iawn am hynny. Mae’r cyfle hwn wedi dangos bod unrhyw beth yn bosib gyda’r gefnogaeth briodol.’’
Mae Sir Ddinbych yn Gweithio yn cael ei ariannu’n rhannol drwy Raglen Cymunedau am Waith a Mwy Llywodraeth Cymru sy’n cefnogi’r bobl sy’n wynebu’r anfantais fwyaf yn y farchnad lafur i oresgyn y rhwystrau sy’n eu hatal rhag cael gwaith.
Ariennir Sir Ddinbych yn Gweithio yn rhannol gan Lywodraeth y DU.
Digwyddiad Nadolig Lles
Diolch yn fawr i bawb a ddaeth i’n gweld ni yn y Digwyddiad Nadolig Llesiant yn y Rhyl ar yr 28ain o Dachwedd!
Cafodd ein Tîm Barod ddiwrnod gwych yn cyfarfod cynifer ohonoch, yn sgwrsio am y gefnogaeth y gallwn ei chynnig, ac yn mwynhau’r gweithgareddau Nadoligaidd
Diolch arbennig i’r trefnwyr am gynnal digwyddiad mor gynnes a chroesawgar – rydyn ni eisoes yn edrych ymlaen at y nesaf!
