Y Cyngor yn atgoffa busnesau lleol o’r gefnogaeth sydd ar gael
Wrth i’r flwyddyn ariannol newydd ddynesu, hoffai’r Cyngor atgoffa busnesau lleol Sir Ddinbych o’r gefnogaeth a’r cyngor sydd ar gael iddynt.
Drwy gydol mis Mawrth bydd y Cyngor yn cynnal ei ymgyrch boblogaidd ‘Mis Mawrth Menter’, sy’n darparu gweithdai, digwyddiadau rhwydweithio a sesiynau cyngor yn rhad ac am ddim i fusnesau ledled Sir Ddinbych. Cynhelir y digwyddiadau wyneb yn wyneb ac ar-lein. Rhagor o wybodaeth yma.
Mae Grant Datblygu Eiddo Masnachol, sydd wedi derbyn cyllid gwerth £290,000 o Gronfa Ffyniant Gyffredin Llywodraeth y DU, yn cynnig grantiau buddsoddi cyfalaf i adfywio eiddo masnachol yng nghanol trefi a dinas Sir Ddinbych. Mae’r cynllun grant yn rhan o’r Prosiect Cynllun Gwella Eiddo Canol Trefi ehangach. Mae grantiau rhwng £5,000 a £50,000 ar gael i wella neu ddatblygu eiddo masnachol.
Mae Grant Datblygu Eiddo Masnachol Sir Ddinbych yn agored i eiddo masnachol sydd wedi’u lleoli yng nghanol un o’r 8 prif drefi a dinas yn y sir, sef:
- Corwen
- Dinbych
- Llangollen
- Prestatyn
- Rhuddlan
- Y Rhyl
- Rhuthun
- Llanelwy
Mae’n rhaid i’r prosiect fodloni meini prawf penodol. Ceir rhagor o fanylion ar ein gwefan.
Mae busnesau micro a bach presennol, busnesau newydd a mentrau cymdeithasol yn gymwys i wneud cais am grant ‘Sir Ddinbych Ffyniannus’ a ddarperir drwy Gadwyn Clwyd. Ariennir hyn gan Lywodraeth y DU drwy Gronfa Ffyniant Gyffredin y DU drwy flaenoriaeth fuddsoddi ‘cefnogi busnesau lleol’. Mae nod y prosiect yn cyd-fynd â nodau Cronfa Ffyniant Gyffredin y DU, sef rhoi hwb i gynhyrchiant, cyflog, swyddi a safonau byw drwy dyfu’r sector preifat, gyda phwyslais ar gefnogi mentrau micro a bach o fewn Sir Ddinbych. Ceir rhagor o fanylion ar wefan Cadwyn Clwyd.
Mae tîm Gwarchod y Cyhoedd yn y Cyngor yn darparu cyngor ac arweiniad defnyddiol yn rhad ac am ddim i sicrhau bod busnesau’n cydymffurfio â’r cyfreithiau a rheoliadau sy’n berthnasol. Mae hyn yn cynnwys cyngor ynglŷn â pha drwyddedau sydd eu hangen, cyngor am iechyd a diogelwch, diogelwch bwyd a labelu, materion safonau masnach mewn busnesau, a llawer mwy. Mae rhagor o wybodaeth ar gael ar wefan y Cyngor.
Meddai’r Cynghorydd Jason McLellan, Arweinydd y Cyngor ac Aelod Arweiniol Twf Economaidd a Threchu Amddifadedd: “Mae’r Cyngor yma i gefnogi busnesau lleol y stryd fawr, sy’n gweithio’n galed – maent yn hanfodol i’r economi leol.
"Pa un a ydych yn fusnes newydd neu’n fusnes sy’n bodoli eisoes, gall y Cyngor ddarparu gwybodaeth ac adnoddau defnyddiol i’ch cynorthwyo, ac mae hyn yn cynnwys ‘Mis Mawrth Menter’, sydd ar ddod.”