llais y sir

Llais y Sir: Mai 2023

Llyfrgelloedd Sir Ddinbych yn lansio cynllun newydd i allu Benthyca Tabled a Chromebook

Mae Llyfrgelloedd Sir Ddinbych wedi lansio cynllun benthyca dyfais yn ddiweddar a fydd yn galluogi aelodau llyfrgelloedd ledled y Sir i fenthyg tabled neu Chromebook o’u llyfrgell leol, yn union fel y buasent yn benthyca llyfr.

Mae llawer o wasanaethau erbyn hyn wedi symud ar-lein, o fancio i siopa, ac o gredyd cynhwysol i wneud cais am gerdyn bws, ac mae llyfrgelloedd eisiau helpu preswylwyr i gael mynediad i’r byd ar-lein a phrofi’r buddion o fod wedi cysylltu â’r byd ar-lein. 

Mae defnyddio tabled, chromebook neu ffôn clyfar hefyd yn agor y gwasanaeth llyfrgell ddigidol i’r defnyddiwr, gan alluogi aelodau i lawrlwytho llyfrau, llyfrau sain, papurau newydd a chylchgronau 24/7.

Bydd gan y dyfeisiadau fynediad i’r we a bydd cyrsiau ar-lein ar gael os ydi pobl eisiau dysgu mwy am eu dyfeisiadau a’r gwasanaethau y maen nhw’n ei ddefnyddio i adeiladu eu sgiliau digidol.

Mae Gwasanaeth Llyfrgelloedd y Sir hefyd yn rhan o’r Gronfa Ddata Cenedlaethol sy’n cynnig cardiau sim a data am ddim i bobl sy’n byw mewn tlodi data.  

Dylai pobl sydd â mynediad i ffôn clyfar ond sy’n ei chael hi’n anodd talu am fynediad i’r we gysylltu â’u llyfrgell leol am fwy o wybodaeth.

Dywedodd y Cynghorydd Emrys Wynne, Aelod Arweiniol y Gymraeg, Diwylliant a Threftadaeth:

“Bydd y gwasanaeth benthyca dyfais newydd hwn yn helpu pobl i fynd ar-lein ac i beidio â chael eu gadael ar ôl yn y byd digidol. Rwyf wrth fy modd yn gweld menter arall eto yn ein llyfrgelloedd sy’n cefnogi ein cymunedau lleol ac yn gwneud siŵr fod pawb wedi cysylltu â’r byd ar-lein.”

Cysylltwch â’ch llyfrgell leol am fwy o wybodaeth ar y gwasanaeth benthyca dyfais newydd.

Sylwadau

No comments have been left for this article

Dweud eich dweud...